కాటుక మబ్బులు కథ వెనుక.. కథ

 మిత్రులందరినీ పలకరించడానికి… ఓ కథ తో వచ్చేసాను. 

ఆ కథ వెనుక  … కథ

 వనజ గారూ.. “ఔనా!” అనే కథ రాసి ఆశ్చర్యపరిచారు అని  ఒకరు, మీరు అలాంటి కథ రాయడం విభ్రాంతి కల్గిస్తుందని ఒకరు, కథ లో  ఒక పాత్ర లో మీరు స్పష్టంగా కన్పిస్తున్నారని ఒకరు, మీరు బ్రిలియంట్ రైటర్ అని ఒకరు.. ఇలా కథలతో అనుబంధం వున్న మిత్రులు వ్యాఖ్యానించారు. నిజానికి ఆ కథలోనే చెప్పేసాను. రచయితలు సెల్ఫ్ సెన్సారింగ్ చేసుకుంటూనే కథలు రాయాలని. అలా రాయకుండా దశాబ్దం పైన లోలోలల అణచిపెట్టిన  కథ “ఔనా!” అని. ఆ కథ చదివిన ఒక మిత్రురాలు “ఏమిటి!? ఔనా! మీనమ్మ ను అలా వొదిలేసారు, తర్వాత ఏం జరిగిందో రాయరా? “ అంటూ ప్రేరేపించారు. ఆమె.. ఓ ఛానల్ లో ఫ్యామిలీ కౌన్సిలర్. అలా ఆమె అడిగిన తీరు వెనుక చలం మైదానం రాజేశ్వరి గురించి చర్చ నడిచింది మా మధ్య. 

తర్వాత.. ఈ కథ “కాటుక మబ్బులు” వచ్చింది. ఇప్పుడు.. ఆ ఫ్యామిలీ కౌన్సిలర్ ఈ కథ చదువుతారు. ఆమె లా ఆలోచించగల “ఔనా!” పాఠకులు చాలా మందికి ఈ కథ శాంతినిస్తుంది. రెండు కథలూ రాసింది నేనే. మొదటి కథ లో నిజం అనిపించే కల్పన వుంది కల్పన అనిపించే నిజం వుంది. ఇక ఆ కథకు సీక్వెల్ అయిన ఈ కథ లో  సమాజం కోరుకునే జడ్జిమెంటు వుంది. రెండు కథలు రాసిన రచయిత లో (నా లో ) సమాజం అర్ధం చేసుకోలేని సహృదయత హృదయ వైశాల్యం కరుణ మెండుగా వుంది. అందరికీ తమలో తమకు తెలియని ఈ కోణం వుంటుంది. ప్రతి మనిషి లో పేరెంటల్ వ్యూ అనే మనసు  వొకటి వుంటుంది. అలాంటి మనసు ప్రతి రచయిత లో తప్పకుండా వుండాలి అంటాను నేను. సమాజం అర్దం చేసుకోవడంలో విఫలమైనా రచయితలు కొన్ని పాత్రలను పోలిన (కొందరు రచయితలు సృజింజించిన పాత్రలు) మనుషులను అర్ధం చేసుకోవడానికి పేరెంటల్ మనసు వుండాలి. అప్పుడే జీవితంలో తడి వుంటుంది అని.. నేను బలంగా విశ్వసిస్తాను. సమాజం అర్దం చేసుకోవడంలో విఫలమైన చోట రచయిత వుంటాడు వుండాలి కూడా. రచయిత కు కన్ను స్థానం లో హృదయం వుండాలి అని. 

“కాటుక మబ్బులు” కథ చదివి “భూదేవమ్మ” పాత్ర లో  మీరే కనబడ్డారు అని ఒక కథకురాలు అంది. అందుకే.. ఈ వివరణ చెప్పుకున్నాను రాసుకున్నాను. 

మీకూ చెబుదామనిపించింది. 

ఆఖరిగా ఒక మాట. మనిషి ని సమాజం అర్ధం చేసుకోవాల్సిన పని లేదు. వుంటే గింటే నోరు ఓ క్యాజువల్ చూపు తప్ప. కానీ మనుషులకు వారి కుటుంబం, నా అనుకునే వాళ్ళు వుంటారు చూడండి వారు తప్పకుండా లోతుగా అర్ధం చేసుకోవాలి. వారికి క్షమించగల్గే పెద్ద మనసు వుండాలి. అవి లేనప్పుడు గిల్ట్ మరణాలు వుంటాయి. ఇగో సాటిస్పై లు వుంటాయి. అవి చెప్పాలనే నా ప్రయత్నం .. ఈ “కాటుక మబ్బులు” కథ. 

వీలైతే.. “ఔనా” కథ కూడా చదవండి. కింద కామెంట్ రూపంలో లింక్ జతపరుస్తాను. 

ఈ కథ ను లింక్ ద్వారా చదవలేకపోతున్నామనే మిత్రుల కోసం.. 

“కాటుక మబ్బులు” కథ pdf జతపరిచాను.. కథ ను చదివి మీ అభిప్రాయం చెబుతారు కదూ.. 

- వనజ తాతినేని.

ఆదివారం ఆంధ్రజ్యోతి లో 20/08/2022 న ప్రచురితమైన కథ..