Core Philosophy

 Core philosophy -వనజ తాతినేని

ప్రతి రోజూ… జీవితాన్ని ఆస్వాదిస్తావ్

అసలెలా సాధ్యం నీకు!? 

అబ్బురంగా ఆమెనే చూస్తూ

అడిగాడతను. 

ఆమె చిరునవ్వుతో అతని కళ్ళల్లోకి 

చూస్తూ చెప్పింది.నువ్విప్పుడు నాలో నుండి 

నీ ప్రపంచాన్ని చూస్తున్నావు 

కాబట్టి అలా అనిపిస్తుంది. 

ఆమె మాటల్లో లోతు అతను గ్రహించకుండా 

నేనూ నీతో కలిసి నడుస్తాను అన్నాడు 

చిన్నపిల్లాడిలా మారాం చేస్తూ.. 

ఆమె విడమర్చి చెప్పింది. ఇప్పుడు అద్భుతంగా 

అనిపించినన్నీ త్వరలోనే అతి సాధారణం 

అయిపోతాయి నీకు. అప్పుడు 

నేనంటే నీకు తప్పక విసుగు వస్తుంది.

ఏం కాదు, నువ్వేదో మాయచేస్తున్నావు.

నిన్ను విడిచి నేను వెళ్ళలేను.వెళ్ళి వుండలేను

రా.. పోదాం. బతిమిలాడాడు. 

ఆమె సున్నితంగా తిరస్కరిస్తూ.. అంది.

ఎదుటివారి కళ్లలో నుంచి చూస్తూ నీ జీవితాన్ని 

ఊహించకు. నీ దృష్టికోణంలో నుంచి నిశితంగా చూడు. 

జీవితం ఇంకా అద్భుతంగా ఉంటుంది.

అతను బేలగా చూసాడు.

ఆనకట్ట తెగినట్టు చెంపలపై కన్నీరు ఉరికింది.

ఆమె అతని కలల రంగులన్నీ మూటగట్టుకుని

సూర్యునిలా కనుమరుగైంది. 

చుట్టూ పెను చీకటి. 

తూర్పు ఆకసంలో ఉదయించిన చంద్రుడు.. 

చెరువులో నెమ్మదిగా రేకులు విప్పుతున్న కలువ. 

అతని గళంలో ఆవేదన విచ్చుకుంది. 

దూరాన దూరాన తారాదీపం.

©️Vanaja Tatineni

 

#వనజతాతినేని

#vanajatatineni

#hilights

#follower