అమృతభాండం
జీవితం యెడా పెడా వాయిస్తుంది
అనేక విధాలుగా.
చేయడానికి యేమీ పని లేనట్లు
అస్తమానం ఈ ఇష్క్ ముచ్చట్లు యేమిటి
పైత్యం కాకపోతే అంది విసుగ్గా ఆమె
జీవితాన్ని రసరంజితం చేసేది ప్రేమ
జీవిత రథచక్రాల ఇరుసుకి కందెన
ప్రేమ
ప్రేమ లేకుండా యెన్ని వున్నా పూజ్యం
తవ్విన కొద్దీ ఊరే చెలమ ప్రేమ అన్నాడు విశ్వాసంగా..
ఆమె తల పంకించింది - కాదనలేక, కాదనాలనిపించక!
వనజ తాతినేని
03/11/2026. 01:20pm.
భరద్వాజ పిట్ట
వాన తెరిపి ఈయడంలేదు
నీ గురించిన ఆలోచనలు కూడా
సూర్యుడు చంద్రుడు తమ తావుల్లో నుండే
భూమిని వెదుక్కుంటున్నారు
నువ్వూ నన్ను వెతికే పనిలో పడ్డావా?
ఆఖరి ఆకులా ఆశల వృక్షానికి వేలాడుతున్నా
సూర్యుడి దగ్గరకు చేరే భరద్వాజ పిట్టలా
వసంతం కొరకై యెదురుచూస్తాను
నువ్వు వెతకకపోయినా ఫరవాలేదు
నా వెతుకులాటే నిన్ను చేరుతుంది!
03/11/2026.06:20am
ఆరాధ్యదేవత
నా ప్రేమకు యేదో వొక ఆధారం వుండి వుండాలి
అది నీలోనే యెందుకు దొరకాలి
నీ అంత ప్రేమాస్పదమైన వ్యక్తిని నేనింతవరకూ చూడలేదు
నువ్వు ప్రేమించావని బదులుగా నిన్ను ప్రేమించలేదు
నాకొకటే చింత; నీలాంటి మనిషి వొకరు తారసిల్లితే
ఈ జీవితం వ్యర్ధం అయ్యేదికాదు
ఇప్పటికి మాత్రం యేమయ్యిందని?
ప్రేమించడానికి ప్రేమింపబడటానికే పుట్టివుంటాం
ఆ సంపూర్ణత నేను అనుభవించాను
అనుక్షణం ఆలోచనతోనూ హృదయం తోనూ
శరీరంతోనూ. ప్రేమించాను
కాలదేవత కరుణించి యిచ్చిన బహుమానం నువ్వు
నా ఆరాధ్య దేవత నువ్వు
ప్రియతామ్ నమామ్యహం
31/10/2026. 03:40pm
