కవిత్వవనంలో నేను లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
కవిత్వవనంలో నేను లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

19, నవంబర్ 2026, గురువారం

నిషిద్ధ ప్రేమ

 



ఈ “మమేకం” సిరీస్ లో “నేనూ నువ్వు” అనేది “అనేకం”. నేను నేను కాదు, నువ్వు యెవరూ కాదు. ఇది వొక కవితా సిరీస్ మాత్రమే ! కథలు రాసే మూడ్ లేక అసలు యేమీ రాసే మూడ్ లేక రాస్తున్న రాతలు యివి. ఇంతేసంగతులు. 😊😊✍️. 


నిషిద్ధ ప్రేమ - వనజ తాతినేని. 


నువ్వు కల్పిత మానవుడివి కాదు

కథలోని పాత్ర కాదు

నిరంతర నా ఆలోచనా స్రవంతికి

ఏకైక ఆధారం నువ్వు

జీవిత గమనంలో రహస్య బంధం నువ్వు


అసంపూర్ణంగా నిర్మితమైన వంతెనపై

ప్రయాణం నిషిద్ధమెలాగో

అసంపూర్ణ ప్రేమపై సాధికారతమంత

విడ్డూరం.


చెరసాలగా మారిన ప్రేమలో

జీవితం గాయంతో విలవిలలాడే పక్షి

రెక్కలున్నా ఎగరలేని వేదన

గూడున్నా చేరలేని దూరం


నా కథకు నువ్వే ప్రారంభం

ఈ మౌనానికి నేనే ప్రారబ్ధం

నిశ్శబ్దపు గోడలు కూల్చేద్దాం రావోయ్ 

క్షతగాత్రులమైనా సరే దివ్య ఔషధాన్ని 

లేపనంలా పూసుకుందాం


శిశిరంలో వాసంతి రంగు చీర చుట్టుకుని 

ప్రకృతి కాంత యెదురు చూస్తుంది 

రావోయ్! 


19/11/2026. 07:16am.


#హృదయకవితలు

#మమేకం

#వనజతాతినేని

#vanajatatineni


15, నవంబర్ 2026, ఆదివారం

కళ్ళు చెప్పే కథలు

 నేనొక కథ విన్నాను పిమ్మట




కళ్ళు చెప్పే కథలు


ఆ కళ్ళు చెప్పే అనేక కథలు విన్నాను. 

ఒక నిశ్శబ్ద పుస్తకాన్ని విన్నాను

బెరుకు చూపుల కథలు విన్నాను

అపనమ్మకాల నీడల కథలు విన్నాను

కరుకు గాయాల కథలు విన్నాను


కన్నీళ్లు కార్చే బరువైన కథలు విన్నాను

మాటల్లో చెప్పలేని నష్టాలను విన్నాను

తన పక్కనే అండగా నిలబడినప్పుడు 

ఆనందం వెల్లువెత్తే కథలు విన్నాను

రాత్రి గుసగుసల కథలు విన్నాను

 

నేనొక సరికొత్త ప్రపంచాన్ని కనుగొన్నాను

సమయం వెచ్చించి సూక్ష్మం కనిపెట్టాను 

నిగూఢమైన లోతుల్లోకి దూకి ఈదులాడి 

హృదయానికి దగ్గర దారి కనిపెట్టాను 

కళ్ళు చెప్పే కథలు వినడం ద్వారా

తన మనసుని  అమితంగాచూరగొన్నాను.


15/11/2026. 03:55 am.

12, నవంబర్ 2026, గురువారం

నేను నేను కాదు

 



నేను నేను కాదు


చిత్రంగా చిత్రంలో 

నేను నేను కాదంటారు

AI ఓ చెయ్యేసిందని

నేను అదే అన్నాను… 

మనసుపై మనసు పడ్డాక 

నేను నేను కాదని 

నువ్వేనని. 


12/11/2026. 07:14 am. 


#హృదయకవితలు

#vanajatatineni

#వనజతాతినేని

#మమేకం


11, నవంబర్ 2026, బుధవారం

వెలిసిపోని రంగు




 వెలిసిపోని రంగు  - వనజ తాతినేని 


ఆకాశం రంగులు మారుస్తుంది 

బుతువులు రంగులు మారుస్తాయి

కాలిబాటలన్నీ  పూల రంగులు మార్చినట్లు

వీధులన్నీ శబ్ధాల రంగులు మార్చుతాయి

మనిషి ఆశలన్నీ  వెలిసిపోయి 

రంగులు మార్చుకుంటాయి

సత్యం బోధపడినప్పుడు మనుషులు కూడా 

రంగులు మారుస్తారు 

నా రంగు రూపురేఖలు కూడా 

రంగు మార్చుకున్నాయి 

కొన్ని రంగులు యెప్పటికి వెలిసిపోవు 

అదేమిటంటే.. 

దశాబ్దాలుగా వీసమెత్తు రంగు కూడా 

మార్చుకోనిది నీ ప్రేమ వొక్కటే!


ఆంగ్ల అనువాదంలో


The Colour That Never Fades


        -Vanaja Tatineni 

The sky changes its colours,

The seasons change their colours,

As if footpaths change the colours of flowers,

The streets change the colours of sounds,

All human hopes fade away and change their colours,

When truth is realised, people too change their colours,

Even my own colour and features have changed their colour,

But some colours never fade,

Do you know what it is?

It is only your love,

That has not changed even a speck of its colour for decades!


12/11/2026. 05:37am



10, నవంబర్ 2026, మంగళవారం

నాలో నాలుగు గదులు


 నాలో నాలుగు గదులు - వనజ తాతినేని


నెమరువేసే జంతువుకు

కడుపులో నాలుగు గదులు ఉన్నట్టు,

మనిషి గుండెలో

నాలుగు గదులు ఉన్నట్టు,

నాలోనూ నాలుగు భాగాలు.


ఒక గదిలో -

పూలలోని సున్నితత్వాన్ని,

పసిపాప మనస్తత్వాన్ని

ఎల్లప్పుడూ పదిలంగా కాపాడుకుంటాను.


రెండో గదిలో -

కుటుంబానికే అత్యంత ప్రాధాన్యతనిస్తూ

బతకడానికి ఇష్టపడతాను.


మూడో గదిలో -

రచయితగా సామాజిక బాధ్యతను

నెత్తికెత్తుకుంటాను.


నాలుగో గదిలో -

అన్నింటికన్నా మిన్నగా,

నీ ప్రేమ సాఫల్యంలో

దినదినాభివృద్ధి సాధిస్తాను.


10/11/2026. 04:55 am.


#వనజతాతినేని #vanajatatineni #హృదయకవితలు #నాలోనాలుగుగదులు #indianpoetrycommunity #మమేకం

---

9, నవంబర్ 2026, సోమవారం

ప్రేమ బైరాగి


 ప్రేమ బైరాగి   


నువ్వు నాకు

వరసకి అన్ని బంధాలూ, బంధుత్వాలూను.


నీలో తల్లి ప్రేమను చూశాను,

సోదరి వాత్సల్యాన్ని చవిచూశాను.

అనేక సందర్భాల్లో గురువుగా నిలిచావు,

శిష్యురాలిగా ఒదిగావు,

స్నేహితురాలిగా తోడున్నావు,

సేవకురాలిగా అలసిపోయావు.

అనేక పర్యాయాలు ప్రేయసిగా ఊరించావు.


విధి చేసిన వింత వల్ల

ఒక్క భార్యగా మాత్రమే మిగలలేదు.


నీతో కలిసి జీవించలేను,

సంపూర్ణ స్త్రీగా నిన్ను చూసిన కళ్ళతో

మరొక స్త్రీని భార్యగా ఊహించలేను

అపరాధ భావనతో మరణించలేను

అందుకే విరాగినయ్యాను

బైరాగిగా సంచరిస్తున్నాను

ఎదురు చూస్తున్నాను

ఏ మలుపులోనైనా యెదురొస్తావేమో అని. 


09/11/2026. 08:10pm. 


అలంకారం

 అలంకారం

 

నన్ను నేనూ నిన్ను కూడా గొప్పగా చిత్రించుకున్నాను 

ఆ చిత్రపటంపై కొన్ని పువ్వులను ఆశల విహంగాలను ఎగరేసాను

పువ్వులు ఆకురాలు కాలానికి రాలి  చెల్లాచెదురు అయిపోయాయి 

పక్షులు వలస పోయి తిరిగి రాలేదు

చిత్రం ఒంటరిగా అలంకారంగా మిగిలిపోయింది.  

జీవితంలో శూన్యాన్ని వేణువు పాట పూరిస్తూంది.

పాట అలంకారంగా మిగలకుండా ప్రాణం పోస్తోంది. 


08/11/2026. 09:20pm


కాపలా కుక్క

 

కాపలా కుక్క - వనజ తాతినేని 


జనులకు మితిమీరిన ఆసక్తి

నీ వివరాలు అడిగారు 

నేను అంత తెలివితక్కువ మనిషినా

గోప్యంగానే వుంచాను 

నువ్వు చపలచిత్తుడివి అని కాదు

నీపై అపనమ్మకం కాదు


ప్రేమికుడు/ప్రేమికురాలు ని నమ్మి 

మోసపోయినవారు వున్నారు

కానీ నాకు ప్రేమపై విశ్వాసం 

నీ ప్రేమ నాకు కాపలా కుక్క

అనుక్షణం నన్ను కాచుకునే వుంటుంది


నా అసూయ  అభద్రతాభావం గురించే

దిగులంతా; కీడెంచి మేలెంచు తత్వం

నేను మాములు మనిషిని మిత్రమా! 


09/11/2026. 08:03 am


8, నవంబర్ 2026, ఆదివారం

నీ పేరు ప్రేమ




 నీ పేరు ప్రేమ

నువ్వు కథ కల్పన ఊహ భ్రాంతి కానే కాదు. 

నా ఆలోచనల్ని అనుభూతుల్నీ అనుభవాలను 

నీ రూపంలోకి మార్చుకున్నాను

నీపై నాకున్న ప్రేమ నాపై నీవు వెల్లడించే ప్రేమ 

బహిరంగ రహస్యం

నువ్వు యెవరు అన్నది నిగూఢ రహస్యం 

ఎంతోమంది ఆసక్తి చూపారు నీ పేరు తెలియజేయమని. 

నీ పేరు ప్రేమ అన్నాను

చికాకుగా అప్రసన్నంగా చూసారు. 

నువ్వే చెప్పు!? నువ్వెవరో లోకానికి 

విదితం కావాల్సిన అవసరమేముంది. 

ప్రేమ అనే దివ్య ఔషధం లేకుండా 

యెవరు జీవించగలరు?

బహుశా నా మరణానంతరం నీ పేరు వెల్లడి కావచ్చు

నా అముద్రిత కవిత్వంలో నీ పేరు

పదే పదే ప్రస్తావించబడింది

అలాంటి విషాద సమయాలు 

మనుష్యుల హృదయాన్ని వున్నతం చేస్తాయి.

అప్పుడెవరూ మనిద్దరి గురించి 

చెవులు కొరుక్కోరు అని నా ఆలోచన. 


08/11/2026.12:45pm.

రాయని ఉత్తరాలు


 రాయని ఉత్తరాలు 

ఇక ఆపేయ్ తల్లీ 

ఎరక్కపోయి అన్నాను 

గుల్జార్ లా రాయగలవా అని

ప్రవాహంలో కొట్టుకుపోతున్నాను

ఇక ఆపేయ్ తల్లీ!


భావప్రకటన నా ఉనికి 

ఎలా ఆపగలను

మది గది నిండా

రాయని యెన్నో ఉత్తరాలు 

వెలుగుచూడనీ ప్రియతమా!


08/11/2016. 03:03am.


7, నవంబర్ 2026, శనివారం

చీకట్లోనే మేల్కొంటాను


 చీకట్లోనే మేల్కొంటాను


“స్త్రీ కి ఏళ్ళ తరబడిగా తాను వొకప్పుడు తిరస్కరించిన పురుషుడిపై ఆసక్తి  జాలి సానుభూతి వుంటుంది అంటారు. 

కనీసం నీకు అదికూడా లేదు. నువ్వు కసాయివి” అన్నాడతను కక్షగా 


“కఠినంగా వున్న బండను తాకిన బంతి దూరంగా పడుతుంది పడాలి కూడా. .. 

నేను చీకట్లోనే మేల్కొంటాను.  

ఊసరవెల్లి ప్రేమల్ని నేను నమ్మను” అంది ఆమె కఠినంగా.


07/11/2026. 09:20pm.

5, నవంబర్ 2026, గురువారం

రెప్పపాటు దూరం

 



నిందారోపణ

ఒదిగి వుండాలని

అణిగిమణిగి వుండాలని 

కోరుకునే మనుషుల మధ్య

నా అహాన్ని నేను తప్ప 

మరొకరు భరించలేరు

నువ్వు మాత్రం  నన్ను అవలీలగా 

తలకెత్తుకుంటావ్ 

ఉనికి భద్రంగా వున్నచోటనే

బందీగా వుంటారని

సూక్ష్మం తెలియని లోకం యిది

పైగా నాకు ప్రేమించడం తెలియదని

నిందారోపణ.


04/11/2026. 06:05am

 

*******

రెప్పపాటు దూరం


విశ్రాంత జీవనంలో

మనుషులు 

ఒంటరిగా వుండకూడదు 

అయినవాళ్ళకు 

దగ్గరగా వుండాలి అంటారు. 


నాకు అయినవాళ్ళందరూ 

నిమిషాల వ్యవధిలో వున్నారు 

ఆప్తుడువైన నువ్వు 

రెప్పపాటు దూరంలో వున్నావు. 

ఎంత అదృష్టం నాది!!


04/11/2026. 05:25am