వదిలేసుకున్నా/ A Moment I Let Myself

 వదిలేసుకున్నా  

పూలు ఇప్పుడే మేల్కొంటున్నాయి కలల నిద్ర నుండి

గాలి తారట్లాడింది పరిమళాన్ని చుట్టబెట్టుకుని పోవాలని

తుమ్మెద అక్కడక్కడే చక్కర్లు కొడుతోంది ఉపాహార సేవనం కోసమని

నన్ను నేను వదిలేసుకున్నాను కాసేపు విరుల సౌందర్యాన్ని ఆస్వాదిస్తూ 

A Moment I Let Myself  - Vanaja Tatineni

The flowers are just waking

From the sleep of dreams

The wind is wandering about

Wanting to wrap itself in their fragrance

The bumblebee circles here and there

For its morning meal

And I...

I let myself go for a while

Lost in the beauty of the blossoms...

30 July 2026.  09:15 am.

#వనజతాతినేని

పలకరింపు / A Greeting

 

పలకరింపు  - వనజ తాతినేని. 

ఈ మిట్టమధ్యాహ్నపు ప్రశాంత ఏకాంత సమయంలో.. 

ఉన్నట్టుండి   నీ పై ప్రేమ గంగలా పొంగిపొర్లింది. 

నిన్నొకసారి పలకరించాలనే తలంపు చిత్తంలో బలపడింది. 

ఎలా వున్నావ్ లాంటి క్షేమసమాచారాలను

మించి నీకూ నాకూ తెలిసిన పలకరింపు ఒకటుంటుంది కదా!

అది కాలాతీత నిశ్శబ్దం నుండి ఉద్భవించిందేమో

అన్నట్టు వుంటుంది కదూ! 

నాభి నుండి వెలువడిన ఆ  మృదువైన స్వరం 

పంట చేనుపై పైరగాలి  వీచినట్లు

నీటి అలలపై గాలి మృదువుగా ప్రవహించినట్లు 

నైటింగేల్ పక్షి శ్రావ్యంగా పాడినట్లు.

అలౌకికమైన అనుభూతిలో తడిసిపోతాను. 

తిరిగి నేనూ అదే ప్రేమతో అదే స్వరంతో పలకరించగలనో లేదో

అని  సంశయిస్తూ  సిగ్గుపడుతూ  మాట రాని మౌనంతో 

మిగిలిపోతాను. 

నిన్ను పిలవాలనుకున్న ఆ పిలుపు లక్షలసార్లు 

నాలోపల ప్రతిధ్వనిస్తూ వుంటుంది మిత్వా! 

26 July 2026  01:15 pm.

*English Translation*

*A Greeting*

_- Vanaja Tatineni_

In this tranquil solitude of the mid-afternoon..

Suddenly, my love for you surged and overflowed like the Ganges.

The thought of greeting you once grew stronger in my mind.

Beyond mere "how are you" and pleasantries,

there is a greeting that only you and I know, isn't there!

It feels as if it emerged from timeless silence, doesn't it!

That soft voice that arose from my navel was like

a gentle breeze blowing over a crop field,

like the wind flowing softly over water waves,

like a nightingale singing melodiously.

I get drenched in that transcendental feeling.

And then, doubting and blushing, wondering if I can

greet you back with the same love, with the same voice..

I remain, left with a speechless silence.

The call with which I wanted to call out to you

keeps echoing within me millions of times, Mithva! (My friend)

జన్మ సాఫల్యం

 నేనెప్పుడూ Sticky వుండను.. నన్ను అల్లుకున్న బంధాలతో తప్ప. అప్పుడప్పుడు 

మనసులో వుంది రాసేసుకుంటాను. 

మాయా ఏంజెలో రాసుకున్న “ Yellow Pages “ మాదిరిగా. 

ఎవరైనా రాయమంటే రాయలేను,వద్దంటే ఆగలేను. ఏ పనైనా చేయమంటే చేయను. నాకు నచ్చితే తప్ప. అలా అనిపించినప్పుడు ఇలా వస్తూవుంటాయి. ఇవాళెందుకో పాతికేళ్ళు వెనక్కి వెళ్ళాను.  ఫోటో అప్పటిదే! 😊😍

రాసిందంతా philosophy నే! 😊🤗

***************

జన్మ సాఫల్యం   - వనజ తాతినేని 

చదివి చదివి పుస్తకం అంటే విసుగు పుట్టినప్పుడు 

జీవిత పుస్తకంలో ఎవరికీ చెప్పని రహస్యాన్ని చదువుకుని చూడు

 

విని విని సంగీతం కూడా విసుగు తెప్పించినప్పుడు లోన దాగిన 

రాగాన్ని బయటకు లాగి కూనిరాగం అందుకో

 

చూసి చూసి విరుల సౌందర్యం కూడా సాధారణమై పోయినప్పుడు 

ఆకుల రూపురేఖలు రంగులను గమనించు

మనుషులను ప్రేమించి ప్రేమించి విసుగు చెందినప్పుడు 

కొన్నినాళ్ళు దూరంగా జరిగిచూడు.

అసలు ఈ రెండు కాళ్ళ రథాన్ని కదిలించి చూస్తే.. 

సరికొత్త  పుస్తకాలు సరికొత్త సంగీతం

సరికొత్త రంగులు సరికొత్త అనుభూతి

అసలు ప్రపంచమే నీ కొరకే సరికొత్త ద్వారాలు తెరిచినట్టు వుంటుంది.

పాతదాన్ని మోసుకుంటూ తిరగడం అంత 

అసంబద్ధమైనది మరొకటి లేదు 

ఒకే చోట ఒకే లాగా అతుక్కుని బతకడం నీతో నువ్వు 

దాగుడు మూతలు ఆడుకోవడం లాంటిదే. 

జీవితాన్ని పైపై మెరుగులుతో అలంకరించుకోకు. 

ఆత్మతో జీవిస్తూ . ఆత్మరాగాన్ని ఆలపిస్తూ . 

జీవితాన్ని యోగంగా మార్చుకుంటామో 

యాగంలో సమిధలుగా బలిచేసుకుంటామో.. 

అంతా మన చేతుల్లోనే!

ఒక్క జీవితాన్ని గెలిపించడానికి

వందల కొలది ప్రయత్నాలు వేలకొలది గుమ్మరించే భావోద్వేగాలు  

అవకాశాలు నైరాశ్యం సహనం సర్దుబాటు ఇవి కాదు. 

ఎదుగుదల కంటికి కనిపించేది కాదు 

వెలుగు చీకటి కలిసిపోయే చోట అది కనబడని మాయాజాలం. జీవించు..  

జీవించడంలో వున్న ఆనందాన్ని అనుభవించు. 

పునర్జన్మ వుందో లేదో ఎవరికి తెలుసు!? 

( Vanaja Verses) 

#వనజతాతినేని

పక్వానికి రాని పండు

 పక్వానికి రాని పండు  - వనజ తాతినేని 

నా ప్రేమ నీకు యెన్నడూ భారం కాకూడదు. 

గాలి అలలపై తేలియాడే పాటలా నీతో ప్రవహిస్తూ వుంటాను.. 

వేరొక ప్రేమకై దేవులాడను నేను 

దొరికిన ప్రేమను ఎలా కాపాడుకోవాలో తెలుసుకుంటాను

పక్వానికి రాని పండు ఎంత కఠినంగా ఉంటుందో నాకు తెలుసు. 

ప్రయాణాలు వేరయ్యాక వెనుదిరిగి చూసుకుంటే ఏం లాభం? 

పక్కనే  నిరంతరం వెలిగే నక్షత్రాన్ని చూడలేని చత్వారపు పక్షిని నేను 

నేనెప్పుడూ హృదయం తెరిచి చెప్పలేని ప్రేమను,

ఎప్పుడూ నిను  అల్లుకుని వుండే పేరులేని బంధాన్ని, మౌనంలోని సంగీతాన్ని.

వేదనలో ఏకాంత వైణికురాలిని. 

అయితేనేం.. పరిపూర్ణమైన ప్రేమను సేవించి

సంతోషంగా వున్న నేను ఒకప్పుడు బాధలో వున్నప్పటి

నన్ను ని  కౌగిలించుకుంటాను. . 

లెక్క సరిపోతుంది. 

ఫలించని పుష్పించని చెట్లు కూడా 

శిశిరానికి రాలి వసంతానికి చిగిర్చి 

పచ్చదనాన్ని ప్రసాదిస్తాయి చూడు.. 

నేను అలాంటి దేవదారు వృక్ష  ప్రేమని!

The Unripe Fruit

_- Vanaja Tatineni_

My love should never be a burden to you.

I will flow with you like a song drifting on the waves of the wind..

I will not yearn for another love

I will learn how to cherish the love I have found.

I know how hard an unripe fruit can be.

What is the use of looking back after our paths have diverged?

I am the sparrow that failed to see the star shining constantly beside me.

The love I could never speak of with an open heart,

The nameless bond that always entwines you, the music in silence.

I am the lone veena player in sorrow.

So what? Having embraced perfect love and found happiness, 

I will now embrace the version of myself that once knew sorrow.

The accounts are settled.

Even the trees that neither bore fruit nor blossomed,

shed their leaves in winter and sprout anew in spring,

gifting us their greenery, you see..

I am that kind of Deodar tree love!

16 July 2026. 09:30 pm

ఆవరణ

 ఆవరణ   - వనజ తాతినేని 

నువ్వు కేవలం రెండు కాళ్ళ వస్తువువి  

అందులో తొణికిసలాడే జీవాన్ని నింపింది నా ప్రేమ

నువ్వు కేవలం ప్రేమించానన్నావు

నా అస్తిత్వం మరిచిపోయి నీ ప్రేమగా మారిపోయాను

వెగటుగొట్టి  మరో ప్రేమ కోరి పాక్కుంటూ వెళ్ళిపోయావు 

శ్రమ పడకుండా వచ్చే స్వేచ్ఛ ఎగరడానికి పనికి రాదు

కావాలంటే.. 

కూకూన్ లో వుండే సీతాకోకచిలుకను అడిగి తెలుసుకో.

ప్రేమంటే.. 

ఖాళీ ఇవ్వకుండా ఆక్రమించడం కాదు 

వెలుగులా మబ్బులా వెన్నెలలా పచ్చని చెట్టులా 

అమ్మ చీర చెంగులా నాన్న వాత్సల్యంలా ఆవరించడం

నేను పొందింది ఓటమి కానే  కాదు

నీ నుండి విముక్తి, దోపిడి నుండి విముక్తి

ద్రోహం నుండి విముక్తి.

కొన్ని శబ్దాలు యుద్ధాలు  స్పర్శలు సువాసనలు 

ప్రేమలు  చేదులు జ్ఞాపకాలేవి  వదిలి మనలేను నేను.

నువ్వు నాలో బతికే వున్నావు శాశ్వతంగా

కానీ ఒక అందమైన దుఃఖంలా

విరక్తి లేని విషాద గీతికలా. 

గోడలో మర్రి విత్తనం

 

గోడలో మర్రి విత్తనం 

యాభైల్లో కూడా ఇరవైల్లో  లాగా 

ఇవ్వడంలో నీకు నీ మీద గొప్ప నమ్మకం

అది మాత్రం  యెల్లప్పుడూ ..

ప్రపంచానికి వెల్లడి చేయని రహస్యమై వుండాలంటూ

పదే పదే .. నన్ను  మెప్పించే ఒప్పించే ప్రయత్నం. 

కానీ నాపై నమ్మకం లేదు నీకు.  

నీ గౌరవం, నీ మర్యాద, నీ పరువు అనే  

అద్దాల మేడను నేను భంగ పరుస్తానని  

ఎనలేని భయం నీ అంతరంగంలో

ఇచ్చిన వాగ్థానం  అవలీలగా వెనక్కి తీసుకుంటావు  

ప్రేమలో విశ్వాసం, మనిషిపై నమ్మకం లేని చోట  

బంధం యెలా వేళ్ళూనుతుంది చెప్పు?  

ఎడారిలో వర్షం కురిసినట్టా?  

గోడలో మొలిచిన మర్రి విత్తనానికి వున్నపాటి 

ఆత్మవిశ్వాసం నీ మనసుకు లేకపోయినాక,  

నువ్వు చేసే ఏ ఆరాధన, ఏ అంకితభావం సత్యం కాదు.  

అది భయం. అది కాలక్షేపం. అది వ్యాపారం.  

ముందు సత్యశోధన మొదలెట్టు.  

నీ లోపలికి తొంగి చూసుకో.  

నేను యెందుకు నమ్మలేకపోతున్నాను? అని.  

నేనిక్కడే వుంటాను.  

నీ అనుమానం శిఖరాగ్రం అంచున నిలబడినా సరే,  

నా నిజంతో నేను వేచి చూస్తాను.  

అసలు ..

ఈ బోలు ప్రేమలను నేనెందుకు నమ్మనో తెలుసా! 

నా గుండె గోడల్లో  నమ్మకంగా ఓ విత్తనం మొలకెత్తి

అది మహావృక్షమై విస్తరించింది. ఆ లోపలి నీడ నను

గొడుగై నిలువెల్లా కమ్ముకుని బయట కూడా 

ఊడల్లా విస్తరించింది మరో మొక్క పెరగకుండా. 

28 June 2026. 02:40 pm.

వజ్రాల వైరం

 వజ్రాల వైరం    

నువ్వు తూర్పు గాలివైతే 

నేను పడమటి మబ్బుని  

నువ్వు నమ్మిన నిజం 

నాకు అబద్ధం అవుతుంది  

ఒకే గదిలో ఉన్నా మధ్య ఎడారి దూరం  

మాటలు మంచులా కురిసినా 

తడవని నేల మనం  

నువ్వు పుస్తకం చదివితే 

నేను పాట వింటాను. 

ఒకే పాటను నువ్వు విషాదం అంటావు,

నేను వేదాంతం అంటాను

నువ్వు నేలవైతే నేను నింగిని  

ఒకే ప్రపంచంలో ఉన్నా  

ఎప్పటికీ తాకలేం.  

నువ్వు కట్టిన కలల ఇంటికి  

నా ఊహలు గుమ్మాలు కావు

ఇద్దరం రెండు వజ్రాలం  

రెండూ విలువైనవే, మెరిసేవే  

కానీ పొదగగలం, అతికించలేం.  

పక్కపక్కన పెడితే  

ఒకదాని కాంతి 

ఇంకోదానికి నీడ అవుతుంది.  

రాపిడిలో మెరుపు కాదు

నిప్పు రవ్వలే రాలతాయి.  

మరి.. రెండు గుండెలు!? 

కొన్ని స్నేహాలు బంధాలు 

కలిసి వుండటానికి కాదు 

విడిపోవడానికి కలుస్తాయి 

గాలిలో దీపాల్లా కొట్టుకుంటాయి 

ఆరిపోతాయి

23 June 2026   10:40 am

Life is beautiful

 లైఫ్ ఈజ్ బ్యూటిఫుల్ - వనజ తాతినేని. 

తీర్చి దిద్దినట్లు వుండే కనుబొమ్మలు అర్దచంద్రాకారంలోకి 

కుంచించుకుపోతుంటాయి

వయసు తరుగుతున్నందుకు సాక్షిగా.

రెండు దశాబ్దాలుగా తెరకు అలవాటైన విశాల నేత్రాలు 

అలసి రెప్పలను మడతవేస్తాయి. 

వైభవం కోల్పోయిన ఫాలభాగం చిన్న స్టిక్కర్ తో 

సరిపెట్టుకుంటుంది.

కాంతులీనే కేశసంపద రంగు రూపు మార్చుకుని సౌందర్యాన్ని సగం మింగేస్తాయి.

వయసు పెరుగుతుందని అద్దంలో చూసుకున్న ప్రతిసారీ గుర్తు చేస్తూ.

విటమిన్ లోపం వల్ల తళతళలాడే పలు వరుస క్రమం తప్పి 

వంకర టింకర చిరునవ్వును దాచుకుంటాయి.

హార్మోన్ ఇన్ బ్యాలెన్స్ వల్ల అవాంచిత రోమాల తొలగింపులో 

బెల్లం ముక్కలాంటి గడ్డం నల్లగా నిగనిగలాడుతుంది. 

శంఖంలాంటి కంఠానికి పెట్టని నగలా వుండే చారలు 

ముడతలుగా స్థిరపడిపోతాయి. 

నీ గోధుమ రంగు ఛాయ నలుపు క్రమంలో జారుతూ 

నిస్తేజంగా మారుతుంటుంది.

ఖరీదైన చీరలు మాటున రింగ్ నెక్  బ్లౌజ్ మాటున 

బాడీ ఫిట్నెస్ బాల్యాని వెతుక్కుని పారిపోతుంది. 

టాల్కెం పౌడరు కూడా స్వీకరించలేని నీ శరీర సున్నితత్వం

బ్యూటీ కేర్ స్కిన్ కేర్  అంటే ఏమిటని ప్రశ్నించే నీ తత్వం 

ఆర్థో డాంటిస్ట్ ని కూడా కలవడానికి ఇష్టపడని విముఖత్వం 

ఇదే ఇప్పటి నీ అలంకారం. 

 

నలబై ఏళ్ళ క్రితం నిన్ను నా ఫస్ట్ క్రష్ అని చెప్పుకున్న అతను 

హఠాత్తుగా ఎదురైన నిన్ను చూసి ఆ అందమంతా ఏమైపోయింది 

అంటాడు ఆశ్చర్యంగానూ జాలిగానూ.

నువ్వు పగలబడి నవ్వుతావ్ అప్పుడు. లోలోపల కొద్దిగా దిగులు పడతావ్.

జీవితం కాటేయకపోతే అలాగే వుండేదాన్నేమో అనుకుంటావు కూడా.

అయినా సరే…

నువ్వు ఆత్మవిశ్వాసం అనే అందంతో  ఆకర్షణీయంగా వుంటావ్

ఎవరికి తలొంచని తలెగరేసే  పొగరుతో మెరిసిపోతావ్, 

ఇంకో రెండేళ్ళకు ఆరవ దశాబ్ధంలోకి అడుగుపెట్టబోయే నీకు

అందానికి నిర్వచనం ఏమిటో బాగా తెలుసు. 

ఈస్తటిక్ సెన్స్ అంటే ఏమిటో కూడా తెలుసు. 

అందుకే నీకు నువ్వు అందంగా గర్వంగా వుంటావ్

ఎవరేమి అనుకుంటే నాకెందుకు!? 

Did you Know!  I am Very beautiful. 

Life is Beautiful Life is Beautiful. 

 (Manifesto for Women Over Forty)

21 June 2026. 10:20 pm.