సరదాగా కాసేపు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
సరదాగా కాసేపు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

6, మార్చి 2026, శుక్రవారం

కాలర్ ట్యూన్ కథా కమామిషు

 చిన్న కథ సరికొత్త కథ చదివేయండి.. ఫ్రెండ్స్!!

కాలర్ ట్యూన్ కథాకమామీషు 

  • -వనజ తాతినేని. 

నగరం నడ్డిబొడ్డున వున్న  టెలికామ్ నెట్ వర్క్ మెయిన్ ఆఫీస్ కి వెళ్ళాడు ఆనంద్. 

రిసెప్షన్ లో ఇచ్చిన టోకెన్ నెంబర్ తీసుకుని లాంగ్ సోఫా లో విశ్రాంతిగా కూర్చున్నాడు. ఆ హాల్లో పదిమందికి పైగానే వున్నారు. ఎవరి మొబైల్ లో వారు తలదూర్చి ఎందుకొచ్చారో అన్న సంగతి మర్చిపోయి బ్రౌజింగ్ లో మునిగిపోయారు. క్యూ కదులుతూ వుంది. ఆనంద్ వంతు వచ్చింది. 


“చెప్పండి సర్! మీకు ఏ విధంగా సహాయపడగలను!?”


“మేడమ్! నాకు నాకిష్టమైన కాలర్ ట్యూన్ సెట్ చేసుకోవాలని వచ్చాను. మీరు హెల్ప్ చేయాలి” 

“ఇంత చిన్న విషయానికి మీరు స్టోర్స్ వరకూ రావాల్సిన పని లేదు, మై ఎయిర్ టెల్ ఆప్ డౌన్లోడ్ చేసుకుని కాలర్ ట్యూన్ సెట్ చేసుకోవచ్చు” అంటూ.. ఆనంద్ వైపు చూసి నవ్వింది. ఆ నవ్వులో ఎగతాళి గోచరించింది ఆనంద్ కి. 


స్ట్రాంగ్ గా ఆన్సర్ చేసాడు.  “ఇరవై సంవత్సరాల నుండి నాకిష్టమైన పాటను కాలర్ ట్యూన్ గా సెట్ చేసుకోవాలని ప్రయత్నం చేస్తున్నాను. నా ఆశ నెరవేరడం లేదు.. కావాలంటే నా నెంబర్ పోర్టబిలిటీ చేసుకోగలను. కానీ నేను వుండే ఏరియాలో ఆ నెట్ వర్క్ సరిగ్గా వుండదు. నేను మీ నెట్ వర్క్ మారను, నాకిష్టమైన కాలర్ ట్యూన్ కావాల్సిందే!” మొండి పట్టు పట్టాడు. 


 “మీకిష్టమైన పాట ఏమిటో చెప్పండి!? నేను ట్రై చేస్తాను” అంది కాస్త జాలి ప్రదర్శిస్తూ.


ఇంకెప్పుడన్నా అయితే.. మీ జాలి నాకవసరం లేదు అని తలపొగరుతో బయటకు వచ్చేసేవాడే!కానీ తన కల నెరవేరాలి! తప్పదు, ఆమె జాలి చూపులను విధిగా భరించి పని చేయించుకోవాలి అని మనసులో అనుకుంటూ… తనకు కావాల్సిన పాట చెప్పాడు. వింటూనే

ఓహ్.. ఈ పాటేనా.. అంటూ అతి తేలికైన స్వరం ప్రదర్శించి సిస్టమ్ లో చెక్ చేసింది. ఐదు నిమిషాలు చెక్ చేసింది మధ్య మధ్యలో ఆనంద్ ని చూసి చిరునవ్వులు చిందిస్తూ.. క్రమంగా సెంట్రల్ ఏ సి లో  కూడా ఆమె ముఖంలో చిరుచెమటలు. టిష్యూ పేపర్ తో చెమట తుడుచుకుని.. 

“సర్! మీరు అడుగుతున్న పాట ఫిమేల్ వెర్షన్ లో వుంది కానీ మేల్ వర్షన్ మా నెట్ వర్క్ పరిధిలో లభించడం లేదు. పోనీ ఇదే సెట్ చేయమంటారా!?” అడిగింది ఓపికగా.


“నో నో… గట్టిగా అరిచాననుకున్నాడు ఆనంద్ అరవకుండానే. “ సారీ! మేడమ్, ఇరవై ఏళ్ళ నుండి ప్రయత్నిస్తున్నా మీరు ఇవ్వలేకపోతున్నారు. ఈ విషయంలో మీరు టోటల్లీ ఫెయిల్యూర్!. BSNL లో ఇవ్వగల్గినప్పుడు మీరు ఎందుకు ఇవ్వరు!? అసహనం ప్రదర్శించాడు. 


“ఆ మేల్ వెర్షన్ సాంగ్ కి copyrights వారు ముందుగానే తీసేసుకున్నారు సర్! ఈ నెట్ వర్క్ లో రావడం కష్టం” ఈసారి వీలైనంత సానుభూతిగా చెప్పింది. 


హ్మ్… అంటూ కూర్చున్న కుర్చీని శబ్ధం అయ్యేటట్టు జరిపి విసురుగా బయటకు వచ్చాడు. ఇలా అనుకున్నాడు బాధగా..


“సారీ! పూజా! నువ్వు నిరాశ అందించినట్టే నాకిష్టమైన ఈ పాట కాలర్ ట్యూన్ గా సెట్ చేసుకుందాం అంటే..  ఏళ్ళ తరబడి నిరాశ పరుస్తుంది. నువ్వెప్పుడైనా నీ జ్ఞాపకాల నిధి నుండి.. నా జ్ఞాపకాన్ని వెలికి తీసి నన్ను ఒకసారి ప్రేమగా పలకరిస్తావని… నువ్వు ఫోన్ చేసినప్పుడు.. 

నీకు నాకు ఇష్టమైన పాట “కభీ కభీ మేరే దిల్ మే ఖయాల్ ఆతా హై” ముఖేష్ పాట నీ చెవినబడాలని నేను నిన్ను మర్చిపోలేదు అని చెప్పాలన్న  నా ప్రయత్నం. ఇరవై ఏళ్ళుగా నువ్వు నాకు ఫోన్ చెయ్యలేదు. నువ్వు ఎప్పుడైనా ఫోన్ చేయవచ్చు అని నేను నా నెంబర్ కూడా మార్చకుండా వున్నాను. ఇవాళే ఈ పాట కాలర్ ట్యూన్ గా వినిపించే నెట్ వర్క్ కి మారిపోతాను. నువ్వు నన్ను తలుచుకుంటున్నావని నా మనసుకు గట్టిగా అనిపిస్తుంది. ఇప్పుడే .. నాకిష్టమైన నీకిష్టమైన పాట.. నా కాలర్ ట్యూన్ గా.. సెట్ చేసుకుంటాను.


మరి… నీ ఫోన్ నెంబర్ ఏమిటీ!? నీ కాలర్ ట్యూన్ ఏమిటో… నాకెలా తెలుస్తుంది!? ఇన్నాళ్ళు నువ్వు నాకు కాల్ చేయలేదు, కేవలం రెండు రోజులు మాత్రమే వెయిట్ చేయ్, ప్లీజ్!! మనకిష్టమైన పాట వినిపిస్తాను” మనసులో ప్రాధేయపడుతున్నాడు ఆనంద్. పూజ కు అది వినిపిస్తుందా!? 


పూజ రెండు రోజులు ఆగి ఆనంద్ కి ఫోన్ చేయాలని కథకురాలినైన నేనూ మనసారా కోరుకుంటున్నాను. 


 ఆనంద్ ఇప్పటి ఈ యాతనకు ఈ కథ…  రేపు మరో రూపం కవిత అనుకుందాం. సరేనా!


(2006 నుండి 2012 వరకూ Hutch network లోనూ అప్పటి నుండి ఇప్పటి వరకూ ఎయిర్ టెల్ నెట్ వర్క్ లోనూ కూడా .. కభ కభీ మేరే దిల్ ముఖేష్ వెర్షన్ లభ్యం కాని విషయాన్ని  తీసుకుని సరదాగా ఈ కథ రాసాను. 😊😊) 

చదివినందుకు ధన్యవాదాలు మిత్రులారా! 🙏


“

5, జనవరి 2026, సోమవారం

సంభాషణలు

 సంభాషణ 1

చలికి ముడుచుకుని పడుకుని వున్న సహచరుణ్ణి రెక్కతో తట్టింది. 

నేనొక విషయం చెప్పనా.. అంది. 

పక్కకి తిరిగాడు విముఖంగా.. 

తన ధోరణిలో తాను చెప్పుకుపోయింది.. 

రంగులు ఒకొరినొకరు ప్రశంసించుకుంటున్నాయి. నేనూ ప్రశంసించాను. చేతులు చూడు ఇనబింబం లా కందిపోయాయి అని అనగానే.. 

అతను చప్పున కళ్ళు విప్పి దగ్గరకు జరిగి ఆమె చేతులను ముక్కు తో చుంబించాడు ప్రేమగా.. 


నీ అనుభవాలతో నువ్వు గాయపడితే.. 

నీ గాయానికి లేపనం అద్దేది అసలైన తోడు.


****************

సంభాషణ 2


ప్రియతమా! 

ఈ చిన్ని తోట చెవులు రిక్కించి నీ పద ధ్వని కోసం ఎదురు చూసింది. 

నీవు రావటం ఆలస్యం కాలేదు. 

మంచు తెర మన మధ్య తెరసెల్లా పట్టింది. 

సిగ్గుతో తలదించుకునే వొడలంతా కనులు చేసుకుని  ఓర కంట నిను చూస్తున్నాను. 

నీ దరహాస ధ్వని వినబడుతుందిలే ! 

వేచి చూడటానికి ఓరిమి ని ఇచ్చిందిలే!!


******************

 సంభాషణ 3


ఈ ఉదయకాలం మరింత సఫలం అయింది అన్నాను పువ్వులతో. 

నా మాట వినిపించుకోకుండా.. 

“చలిగాలికి వణికిపోతున్నా.. ఒళ్ళు వెచ్చబెట్టుకుందామంటే ఈ మంచుతెర వొకటి అడ్డం గా వుంది” అని విసుక్కుంది. 

నేను అన్నాను.. 

“నీ సౌందర్యం చూద్దామనుకుంటే కాఫీ కప్ లో ఆవిరి నాకళ్ళద్దాలను మసక చేసింది మరి”.


#వనజతాతినేని #follower #hilights #mobileclicks #mobilephotography


14, సెప్టెంబర్ 2025, ఆదివారం

సంతకం

 



సంతకం -వనజ తాతినేని 


నేనే నిలువెత్తు సంతకం అంటాను గర్వంతో

కానీ అడ్డంగా పెడతాను సంతకం

కొంతవరకూ పెరగడం నా అభిమతం 

తర్వాత అడ్డంగా పెరగడమే నా బలం బలహీనం 

నిలువు అడ్డం పొడవు వెడల్పు గుండ్రం 

ఎందులోనూ వొదగనిది నా అహం 

ఒక్కసారి గా జారింది ఆ.. పంతం 

అర రోజు బతికే ఈ పువ్వు కెంత  వైభవం 

అందుకేనా ఆకసం వైపు దాని  వీక్షణం

మరి నాకేది.ఇన్నేళ్ళలో ఆ భాగ్యం 

మీకు నచ్చిందా ఛాయాచిత్రం 

మరెందుకు ఆలస్యం.. 

మెచ్చుకోండీ..  అవశ్యం




29, అక్టోబర్ 2024, మంగళవారం

ఇనబింబం చేతికందేలా

 అరె..రే… వచ్చేసినావా సామీ.. 

ఇప్పుడు దాకా యెదురుచూసినా.. ఇంకా రాలేదేమిటబ్బా.. అని. 

పొంగుమాలిన పనులేవో చెయ్యక తప్పదు కనుక.. వాట్సాప్ లో తలదూర్చినా. 

తలెత్తి చూస్తిని గందా.. నా యెత్తు చేయి యెత్తితే కాని నువ్వు ఫ్రేమ్ లో ఇరుక్కోవు. అలా ఇరకపెట్టాలంటే నా యెడమ చెయ్యి లేస్తే కదా! 

అదేదో Frozen Shoulder Pain అంట. నరకం చూపెడతా వుంది. Screen time తగ్గించండి.. చూడబాకండి అంటారు. అదిగాక ఇంకేం పని వుంది.. ఈడ. Cup లు Cup లు coffee లు తాగుడు.. స్క్రీన్ చూసుడు, కథలు చదువుడు. ఆ చదువుడు కళ్ళతోటి మనసుతోటి మెదడు తోటి గాకుండా నోటితోటి కూడా అయిపోయే..

శుభోదయం చెప్పడానికి.. ఇంతజెప్పాల్నా అమ్మి!!? సర్లే.. ఇంకాసేపు నీ పొడన కూసో.. కాస్త డి విటమిన్ వస్తదిలే అని.. 

నా కెమెరాకి అందకుండా పోయినాడు. 

అబ్బా.. ఏమి సూరప్పా.. ఇంత తొందర నీకు.. 

perfect frame కి అందకుండా పోయావు. రేపు చెబుతా నీ పని. ఐదంతస్తుల మిద్దె మీదకి పోతే అందవా యేంటి!?

అయినా నీ పని చెప్పడానికి Tripod కొంటానుండు. 😘🥰😊


దయ తలచి ఈ పొద్దు ఈమె కూడా వచ్చింది నా బాల్కనీ గార్డెన్ లోకి. 

పిల్లలు పువ్వులు పక్షులు దయతలిస్తేనే మన దరికి వస్తాయట. బుల్లి పిట్టలు బట్టలారేసే తీగె పై ఉయ్యాలలూగుతాయి తమ సంగీత కచేరి చేస్తూ. నేను కదిలానా.. శపించినట్లు భావించి ఎగిరిపోతాయి. మానవులు ప్రకృతి పాలిట శాపం కదూ!!



15, నవంబర్ 2019, శుక్రవారం

అమ్మ అమ్మే ...

చిన్న కథ .. 

మా ఊరిలో సామూహిక వన భోజనాలు అంట. కాస్త నదురుగా వుండేవాళ్ళు వేదికనలంకరిస్తారట.
"అదేంటి.. ఆ లిస్ట్ లో నువ్వు వుంటావనుకున్నాను" అంది.. నాఫ్రెండ్.
నేను చిన్నగా నవ్వి ..
ఒకటి:నేనెప్పుడైనా కాకా పట్టడం చూసావా..
రెండు: నిర్మొహమాటంగా మాట్లాడే నన్ను చూపి.. పెద్ద పెద్ద అన్నవాళ్ళు “ మనవాళ్ళే.. కాస్త ఓ చూపు చూస్తూ వుండు “ అని సిఫారసు చేస్తారా..
మూడు: ఈ రెండూ వుండకపోవడం వల్ల.. నాకెవరైనా బాకాలు ఊదగలరా..
అన్నాను.
నా ఫ్రెండ్ కంగు తిని .. ‘’ నీతో మాట్లాడడం చాలా కష్టం “అంది.
‘’ మరే... మాటలు వండటం యెక్కడ యెన్ని వడ్డించాలో అన్ని వడ్డించడం, చమత్కారం నాకసలు తెలియదని నీకు తెలియదా.. ‘’ అన్నాను.
‘’నీ కాఫీ కన్నా మాటలే మరింత చేదుగా వున్నాయి. తప్పకుండా రా.. ‘’అని ఇన్విటేషన్ చేతిలో పెట్టి.. ‘’కాస్త వినయంగా వుండటం నేర్చుకోరాదు. వచ్చే పేరును చెడగొట్టుకుంటున్నావు ‘’ అంది.
“నిర్మాత కె.మురారి.. దర్శకుడు కె.రాఘవేంద్రరావు పై చెప్పు విసిరివేసాడంట. అది తగలకుండానే రాఘవేంద్రరావు కారెక్కి కూర్చున్నాడంట... తప్పించుకుని అవమానపడకనే బతికిపోయాడు పాపం“అన్నాను.
‘’అర్దమైంది’’ అంది లేచి నిలబడి.
*************
రచయిత వ్యాఖ్యానం :
PS: స్వభావం అమ్మలాంటిది. అమ్మ అందగత్తె లేదా కురూపి .. అని వుండదు. అమ్మ అమ్మే!
దట్సాల్. 👸👸

11, ఫిబ్రవరి 2019, సోమవారం

తపన

ఈ కథలతో చచ్చే చావొచ్చి పడిందంటే నమ్మండి  :) అయినా బుద్ధి రాదు.


"దుఃఖపు రంగు" కథ వ్రాసి  ఒక సంవత్సరం పైన. కథకి టైటిల్ సమంజసంగా ఉందా లేదోనని కొన్నాళ్ళు సంశయం. ఒక పేరున్న పత్రికకు పంపాను . రెండు నెలలకు మీ కథ ప్రచురణకు ఎంపిక కాలేదు అన్నారు. కొద్దిగా నిరుత్సాహం. 



మరలా ఒక మాసపత్రిక వారిని  కథను పంపమంటారా అని అడిగి వారు పంపమంటే కథ పంపాను. ఆరు నెలలు కాలంలో కథ పంపిన నాలుగుమాసాలు దాటిన దగ్గర్నుండి  రెండు నెలల కాలంలో ఆ కథ ఎంపిక సంగతి తెలియజేయమని నాలుగుసార్లు మెయిల్ పంపాను. ఆఖరికి వారు సమాధానం చెప్పారు. కథలు వేయకపోవడం వల్ల మీ కథ ప్రచురించలేకపోయామనీ  కథ మాత్రం చాలా బాగుంది అని ప్రశంసించారు. వారికి ధన్యవాదాలు చెప్పి (కథ బాగుందని చెప్పి నాలో ఉత్సాహం నింపినందుకు) మరో పత్రికకు పంపాను. రెండు నెలలు ఓపికగా చూసి కథ పరిస్థితి తెలుసుకున్నాను, అదెక్కడో పాతాళంలో పడిపోయిన దానిని వెదికి ఈ కథ మరీ చిన్నదిగా ఉందని పెద్దగా వున్న మరో కథ పంపమని అంటే ఇంకో కథ పంపాను. (అది అర్హత పొందలేదు). 


సరే మూడు పత్రికలకు పంపి తిరిగొచ్చిన పెళ్ళికూతురుని ఇంకో పత్రికకు పంపాను. రెండు వారాలకు కథ ఎంపికైంది. త్వరలో ప్రచురిస్తున్నాం అని సమాచారం పంపారు. అంటే నాలుగు గుమ్మాలు ఎక్కితే గాని ఒక గుమ్మం లో నుండి ప్రపంచంలో పడటానికి అవకాశం ఉంటుంది కాబట్టి పట్టు వదలని విక్రమార్కుడిలా మన ప్రయత్నం మనం చేస్తూ ఉండాల్సిందే. 


కథ మొదటి పత్రికకు పంపినప్పుడు ఏదైతే పంపానో ఇప్పటికీ  అదే కథ. ఒక్క చిన్న సవరణ లేకుండా ఏర్పూ కూర్పు చేయబడని  కథ " దుఃఖపు రంగు " 


అది ప్రచురణలోకి రావడానికి ఇంత కథ  అంత సహనం వుంది. కాబట్టి కొత్త కథకులు తెలుసుకోవాల్సింది యేమిటంటే... కథ తిరిగొచ్చిందని నిరాశ పడవద్దు. గతంలో పిడికిట్లో పూలు అనే కథ వ్రాసిన తర్వాత రెండు సంవత్సరాలు చాలా పత్రికల గుమ్మం ఎక్కి దిగి వచ్చింది. ఆఖరికి ఆ కథ "సారంగ" లో ప్రచురితమైంది. ఇంకో విశేషం కూడా సాధించింది ఈ  కథ. ఆ సంగతి తర్వాత పంచుకుంటాను. 


ఇదండీ.. కథలు వ్రాసి అవి ప్రచురణ లోకి రాకపోతే కలిగే నిరాశ మనోవేదన. ఇంత అనుకుంటానా .. కథ రాయకపోతే ఏమైంది అని మెదలకుండా కూర్చోను. మళ్ళీ ఎప్పుడో రాయడం మొదలెట్టి మళ్ళీ ఇలాంటి పాట్లు పడుతూ  శిరోభారం  మోస్తూ వుంటాను.  ఇదంతా పేరాశకి  మాత్రమే కాదు  ఎమోషన్స్ ఫీలింగ్స్ వెళ్ళగ్రక్కుకోవడానికి కూడా ! నా చుట్టూ ఉన్నవాళ్ళ జీవితాలను చూస్తూ కొంత అవగాహనతో ఆవేశంతో ఆవేదనతో అక్షరాల్లోకి వొంపేస్తూ వుంటాను.  రాయడమంటే అదొక తపన. అంతే ! ఆ రాతలు చదివి మెచ్చుకుంటే అదో  తృప్తి. 


త్వరలో "దుఃఖపు రంగు " కథ  వస్తుంది. అప్పుడు చదవాలండోయ్ మరి.




11, డిసెంబర్ 2018, మంగళవారం

గడ్డిపూవు జ్ఞానం

సెల్ఫ్ ప్రమోషన్ కోసం పొగిడించుకోడం సర్వసాధారణమైన రోజులలో... విని చూసి వెగటుపుట్టినప్పడు పుట్టిన కథ. ఈ..చిన్న కథ.

అనగనగనగా.. ఒక కదంబమాల... అంట. అందులో పద్దెనిమిది పూలంట. ఒకో పువ్వు గురించి మిగతా పదిహేడు పూలు .. గోడెక్కి దారిన పోతున్న అందరికి వినబడేటట్టు అబ్బ.. యేమి రంగు యేమి పరిమళం యెంత సొగసు అని నోరార పొగుడుకుంటూ వున్నాయంట. దారినపోతున్న దానయ్య .. సుందరమైన సుకుమారమైన అద్బుతమైన పూవుల్లారా..మీలో వొకరినొకరు పొగుడుకునే సంబడమాపేసి దండగా మారిన మీరు దండగవకుండా దేవి పూజకు వెళ్ళండి ఆలస్యమవకుండా.. అని చెప్పి వెళ్ళిపోయాడంట.

అసుర సంధ్య వేళ దేవి మెడలో అలంకారంగా మారాలనుకుని గుడికి వెళ్ళింది అంట కదంబమాల. పూజారి దేవి మెడలో కదంబమాల వేశాక ఈ సారి ఒకొరినొకరు పొగడుకోకుండా యెవరిని వారు పొగుడుకుంటూ.. అందుకే నేనంటేనే దేవికి యెక్కువ యిష్టం అని.. చెప్పుకుంటున్న రొద విని .. దేవి కి విసుగొచ్చి ... ఇక ఆపండి మీ స్వీయస్తోత్రం. మీ అందరిని సృష్టించిన నాకు తెలియదా మీ గురించి. మీతో పాటు నేను సృజించిన ఆ గడ్డి పూవును చూడండి .. యెంత వినయంగా నా పాదాల దగ్గర వొదిగి వుందో .. అని అందట.

దేవి : జ్ఞానదేవత

పంకం లేనిదే పద్మం పుట్టదు, కానీ పంకం వాసన పద్మానికి అంటదు. జ్ఞానవంతుడికి ప్రచారం అవసరంలేదని నా భావన. 



24, అక్టోబర్ 2018, బుధవారం

ఓక్ వృక్షం ప్రేమలో ..


మొక్కలతో సంభాషించని రోజు నాకు వెలితిగా ఉంటుంది. మా అబ్బాయి ఉండే ప్రాంతంలో పచ్చదనానికి ఏ మాత్రం కొరత లేకపోయినా వాటిని సృశించకుండా ఆ పచ్చదనాన్ని అనుభూతిలోకి ఒంపుకోవడం సాధ్యం కానీ పని . ఆకురాలు కాలానికి ముందు నేను అమెరికా దేశానికి రావడం ఆనందం కల్గించే విషయమే. ఎన్నో రకాల వృక్ష జాతులని వాటి ఆకుల రూపు రేఖల్ని పూల పొదలని ప్రత్యక్షంగా చూసాను. వాటిని సృశించకుండా ఉండటమే అసలైన శిక్ష . 

నన్ను బాగా ఆకర్షించిన వృక్షం "ఓక్ " 
ఆ వృక్షపు రాలు ఆకులు రాలిన పండ్ల గింజలు చూస్తూ కాసిని యేరుకుంటూ ఫోటోలు తీసుకుంటూ చిన్న పిల్లలా పేర్చుకుంటూ గడిపే ఆనందకర సమయాన్ని కాస్త మీతో ఇలా పంచుకుంటూ .. ఈ చిత్రాలు. 









20, అక్టోబర్ 2018, శనివారం

ఈర్పెన

పనిలేని పంకజాక్షి ఈపి మీద  ఈసు (ఈర్ష్య) పడిందంట అనే సామెతని  మా నానమ్మ  వాడుతూ  ఉండేది.

ఈపి  అంటే ఏమిటో అనుకునేరు. మనకందరికీ తెలిసినదే.. పేలు గుడ్లు. హాస్టల్ లో పిల్లలని  సెలవలకి ఇంటికి తీసుకొచ్చి  అమ్మలందరూ వెంటబడి మరీ దువ్వి పోసేవి. అయినా ఇప్పుడు అందరికీ చుండ్రే, పేలు ఎక్కడ వున్నాయిలెండి. అసలు జుట్టే తక్కువ. అమ్మలు ఇంకేమి దువ్విపోస్తారు ? అసలు ఆ ఈపిని జుట్టు క్రింద నుండి  దువ్వి జుట్టు ఎంత పొడవు ఉంటె అంత పొడవునా జాగ్రత్తగా లాగి ఈర్పెన పళ్ళని ఎడమచేతితో దగ్గరకి చేర్చుతూ ఇసుకు ఇసుకు అనే శబ్దాన్ని పేలగుడ్లు శబ్దంకన్నా ఎక్కువ వినిపించే అమ్మలకి యెంత అమితానందమో. ఆ ఆనందం కోసమే పిల్లల ఎంబడి పడీ  పడీ మరీ కూలేసేవారు.  పిల్లల ఆటలకి శత్రువులా అడ్డుపడేవారని నా గట్టి  నమ్మకం. మా అమ్మ కూడా అంతే నండి.  అందుకే  ఈ విషయమంటే నాకంత  జ్ఞాపకం.

సోది చెప్పే వాళ్ళ దగ్గరో, నక్కలాళ్ళ దగ్గరో  చెక్క దువ్వెనలు కొని భద్రంగా దాపెట్టేవాళ్ళు .  సందు దొరికినప్పుడు పేల  మీద పేక్షనిజం చూపించే వారు. చెక్క దువ్వెనలు పోయి రకరకాల  దువ్వెనలు వచ్చేసాయి.  అసలు జుట్టులే మూడొంతులకి పైగా తగ్గిపోయాయి కాబట్టి ఏ దువ్వెనయితే యేం పోయింది అనిపిస్తూ ఉండటంలో తప్పులేదు.  కానీ..  ప్లాస్టిక్ దువ్వెనలు ఎందుకు వాడాలి? సహజమైన చెక్క దువ్వెనలు ఎందుకు వాడటం లేదు   అనే అనుమానం వచ్చింది.  ఈకో గణేశుడి లాగా ఈకో దువ్వెనలు వాడాలి అని కంకణం కట్టుకున్నాను .

 ఈర్పెన బొమ్మ కోసం వెదికి  వెదికి ప్లాస్టిక్ దెబ్బకి పురాతన ప్రదర్శనశాలలో పెట్టబడి ఉంటుంది అనుకున్నాను . నిజంగా ఈర్పెన చిత్రం గూగుల్ అంతా గాలించినా దొరకలేదిప్పుడు. ఏదో సామీప్యమైన చిత్రాలు దొరికాయి. మనం చిన్నప్పుడు చూసిన, ఉపయోగించిన ఈర్పెన ని ఈర్పెన అంటే యేమిటని అడిగిన భావితరాల వారికి చూపాలి కదా!

నేను చూడండి, వ్రాసుకుంటున్న కథ ప్రక్కన పడేసి ప్రొద్దున్నే యీ ఈర్పెన వెంట బడ్డాను. కథ కంచికి వెళ్లకముందే కనకదుర్గమ్మ ముంగిట ఆగింది.  కథలో సామెతని వాడి చేటు తెచ్చుకున్నాను సుమీ!  కథ వ్రాసే .. mood పోయి ఈర్పెన లో ఈపి పై చిక్కుకుంది.

ఉండండి ఇంత చెపుతుంటే తల ఒకటే దురదపుట్టి చస్తుంది. ప్రస్తుతానికి ప్లాస్టిక్ దువ్వెనతో అయిననూ కానీ...  తల దువ్వి పోయాలి.  :)




31, జనవరి 2018, బుధవారం

పరుగులే పరుగులు

ఈ వేళ మనసేమీ బాగోలేదు.. త్వరత్వరగా రోజుని ముందుకు జరిపేయ్..
అయ్యో ! అప్పుడే ..ఇంత సమయం గడిచిపోయిందా..కాస్త నెమ్మదిగా వెళ్ళకూడదా !
కాస్త కాలాన్ని డౌన్లోడ్ చేసుకునే సదుపాయం ఉంటే బాగుండును,దాచుకుని వాడుకోవచ్చు
అనుకునే నాలాంటి  అమాయక మానవమాతృలకి ..
చిన్నదైన చిన్నమెదడు చెప్పిన విధం ఇట్టిది .. కావున ఒక్క క్షణమాగి చదివి తరించండని విన్నపాలు.

పరుగులే పరుగులు ..

కాలం నీ యింటి పాడి ఆవుకాదు
గుదికొయ్యకి కట్టేసుకోను
కాలం నీవెక్కి పరుగుతీసే అశ్వం కాదు
కళ్ళెం వేయయటకు
వలవేసి పట్టుటకు కాలమేమి చేప కాదు
కాలాన్ని బంధించుట సాధ్యమా .........
సూర్యచంద్రుల రథమునెక్కి
కాలంతో పరుగులు దీయటం తప్ప.




19, డిసెంబర్ 2017, మంగళవారం

జపాకుసుమాల జావళి

మా వరండా తోటలో విరబూసిన .. మందారాలతో ..ఒక చిత్రాన్ని రూపొందించాను . 
చూడండి  మరి ..
ఈ చిత్రంలో వినిపించిన సంగీతం ఆకాశవాణి కడప కేంద్రం ప్రసారంచేసే "క్రాంతిరేఖలు " కార్యక్రమం సిగ్నేచర్ ట్యూన్ అని గమనించమనవి.
 ధన్యవాదములతో ..

వీడియోని చూడండి ఈ లింక్ లో .. 



10, ఫిబ్రవరి 2016, బుధవారం

మేక్ ఇన్ ఇండియా

మా విజయవాడకి పండగ కాని పండగ 27 సంవత్సరాలగా వస్తూనే ఉంది.  ఆ పండగ వస్తుందనగానే ఇల్లిల్లూ జేబు తడుముకుంటుంది. జనవరి 1 వ తేదీ నుండి అంట. హమ్మయ్య పర్వాలేదు . .. జీతం రాళ్ళు జేబులో పడ్డాకే 11 రోజుల పండగ వస్తుంది. పిల్లలకి మొన్న మొన్ననేగా క్రిస్టమస్ కో, న్యూ ఇయర్ వేడుకల కోసమో  బట్టలు కొన్నాం. మళ్ళీ ఇప్పుడే ఈ పండగ  ముంచుకొచ్చింది. సంక్రాంతికి అమ్మమ్మ ఇంటికో నాయనమ్మ దగ్గరకో వెళ్ళాలని ముచ్చట పడుతుంటే అటెళ్ళాలా - ఇటెళ్ళాలా  అని డైలమా లో పడ్డారు పిల్లలు.

నాన్నా ..నాన్నా ! ముందు ఈ పండక్కి వెళదాం. ఇక్కడ మా కోసం ఖర్చు పెట్టినదంతా ఊరు నుండి రాగానే ఇచ్చేస్తాం . ప్లీజ్ ఒప్పుకో నాన్నా ! పిల్లలు బతిమలాడుతున్నారు. "నన్నే  అడుగుతున్నారు కానీ  మీ అమ్మ దగ్గర టెండర్ పెట్టాలని మీకు తోచడం లేదు. ఆవిడ గారు అన్నింటి కంటే చీరలకో, నగలకో ప్రాధాన్యత ఇస్తారు. ఈ సారికి మీ అమ్మని అడగాల్సిందే " .అని చెప్పాడు నాన్న.   "మీరేం ..ఎగతాళి చేయనవసరం లేదు. ఈ సారి నా జీతంలో అగ్ర భాగం ఈ పండగ కోసమే ఖర్చు పెట్టాలనుకుంటున్నాను. అయితే ఒక షరతుకి అందరూ ఒప్పుకోవాలి".. ఏదో మెలిక పెడుతుంది అమ్మ. అది సాధ్యం కానిదే అయుంటుంది అని ఆలోచిస్తున్నారు.

అంతగా ఆలోచించాల్సిన పని లేదు. రోజూ ఇంటికి రాగానే మీ మొబైల్స్ స్విచ్ ఆఫ్ చేసేయాలి. టీవి ఆన్ చేయకూడదు. ఇంట్లో ఉన్న నలుగురు చేతిలో అదే  ఉండాలి .. అలా అయితే ప్రతి నెలా నా జీతం లో నుండి అగ్రభాగం ఇలాంటి పండగల కోసం ఖర్చు పెడతాను. మీ ముగ్గురూ ఆలోచించుకోండి .. అమ్మ సవాల్ విసిరి వంటింట్లోకి వెళ్ళింది. పిల్లలిద్దరూ నిరాశగా ముఖాలు పెట్టారు.

మన PM "మేక్ ఇన్ ఇండియా మేక్ ఇన్ ఇండియా " అని స్తోత్రం వల్లిస్తుంటే  ... అమ్మ ఏంటో మొబైల్, టీవి ఇంట్లో నిషిద్దం కాని నిషిద్దం అంటుంది"  ఆ ... యన్స్ వాళ్ళు పేస్ బుక్ కూడా ఫ్రీ గా ఇచ్చారు. ఫ్రీ గా ఇచ్చిందాన్ని  ఉపయోగించుకోకపొతే ఎలా ?  మెదడు మోకాలులో ఉంటుందని అమ్మ లాంటి వాళ్ళని చూసే అని ఉంటారు .  విసుగ్గా అన్నాడు అబ్బాయి. మొబైల్ స్విచ్ ఆఫ్ చేస్తే ఫ్రెండ్స్ తో చాట్ చేయడమెలా !? అమ్మాయి అసంతృప్తితో ఆలోచనలో పడింది.
ఏమిటో ఈ ఆడవాళ్ళు . కాసిని డబ్బులు సంపాదించడం మొదలు పెట్టగానే అంతా తామే కరక్ట్  గా మాట్లాడుతున్నట్టు, కరక్ట్ గా చేస్తున్నట్లూ బిల్డప్ ఇస్తారు. టీవీ చూడక,మొబైల్  వాడకపోతే  అవి  ఉండటమెందుకు ?  ఇంట్లో అలంకారినికి తప్ప ?  స్వగతంలో అనుకున్నానుకుని పైకే అనేసాడు నాన్న.

అమ్మ వంటింట్లో నుండి కోపంగా బయటకి వచ్చి ... నేను..  మరి దాని గురించే అడుగుతున్నాను . ప్రతి సంవత్సరం మా విజయవాడలో పండగ పండగ అంటూ వెళ్లి మోయలేక మోయలేక మోసుకొచ్చి మరీ షో కేస్ లో అలంకరిస్తున్నారు అవేంటో అలంకరణ సామాగ్రిలా ! అవలా పడి  ఉంటునప్పుడు ... ఆ పడి ఉండేదేదో ... పెట్టెలో పడుండే నగో ..బీరువాలొ వరసల్లో అమిరిపోయే చీరైతే మాత్రమేమిటీ ? మేక్ ఇన్ ఇండియా కూడా   చేయవలసిన తీరులో చేసుకుంటూ పోతేనే సాధ్యం. టీవీ ముందు కూర్చుంటేనో,  కంప్యూటర్  ముందు కూర్చుంటేనో, మొబైల్ లో చాట్ చేస్తూంటూ కూర్చుంటే తయారవదు. మన PM లాగా విదేశాలు చుట్టేస్తున్నంత మాత్రానే రాదు.  కుళ్ళు జోక్స్ మీకు మాత్రమే వచ్చనుకోకండి .. కచ్చగా అనేసి వచ్చినంత స్పీడ్ గా వెళ్ళిపోయింది  వంటింట్లోకి.




పిన్ డ్రాప్ సైలెన్స్.  ముగ్గురూ  ... ఆలోచనలో పడ్డారు. కాసేపటికి  నాన్న డిష్  డిస్ కనెక్ట్ చేసేసాడు . అబ్బాయి, అమ్మాయి కొంత అసంతృప్తి తోనే మొబైల్స్ స్విచ్ ఆఫ్ చేసి .. షో కేస్ లోపల పెట్టేసి మధ్యాహ్నానికల్లా పండగ కి వెళ్ళడానికి  రెడీ అయిపోయారు. అమ్మ అందరికి సంతోషంగా వడ్డించింది. అందరూ కలసి PWD గ్రౌండ్స్  (స్వరాజ్య మైదానం ) దగ్గర బస్ దిగి తల పైకెత్తి కనబడుతున్న హోర్డింగ్ వొంక చూసారు . 
                      ఇదిగో ఇలా ..  కనబడింది ఆ  నలుగురికి. ఇదే  మా విజయవాడ కి వచ్చే అసలైన పండగ .


 రాత్రయ్యేవరకూ ... ఇలా జనాల్లో కలసి తిరుగుతూ ... ఉన్నారు.
అన్ని పండుగల కంటే ఇదే అసలైన పండగని ఇక్కడ ఖర్చైన ప్రతి రూపాయిని సద్వినియాగం చేసుకుంటే .. బావుంటుందనే ఆలోచనతోనే...  ఈ పోస్ట్ .
(ఈ పండగ గురించి మళ్ళీ ఇంకో పోస్ట్ లో ... )

16, సెప్టెంబర్ 2013, సోమవారం

జగ్గయ్యపేట రంగు రాళ్ళు చాలమ్మా ! .

ప్రతి రోజూ మెయిల్ బాక్స్ చెక్  చేసుకునేటప్పుడు.. నవ్వుకోవాలో, ఏడవాలో, జాలి పడాలో తెలియని పరిస్థితి.  .

నేను .. మెయిల్ బాక్స్ ఓపెన్ చేసానా .. ఇదిగో.. ఇలా ఉంటాయి విద్యుల్లేఖలు ..

"వనజా  ఐ యాం ఆనంద్  29  ఫ్రం బెంగళూరు, మ్యూజిక్ లవర్ , డు   యు మేరీ  మీ .."  మెయిల్ ఓపెన్ చేయకుండానే పైన కనబడుతూఉంటుంది .  వెంటనే గుండె గుబేల్  మంటుంది కానీ  కొంచెం సేపటిలోనే  తేరుకుని

నేనిలా అనుకుంటాను.." నీ బొంద, నా  కొడుకుకి  ఇంకో మూడేళ్ళు ఉంటే  నీ అంత వయసు ఉంటుంది . నేను నిన్ను పెళ్లి చేసుకోవడం ఏమిటిరా ? ఏదో రాంగ్ ID  కి పంపినట్టున్నావ్ ! పనిచూసుకో .. వెళ్ళవయ్యా వెళ్ళు  వెళ్ళూ." డిలీట్ బాక్స్ లోకి పంపేస్తాను.

మళ్ళీ తెల్లవారే .." వనజా ఐ వాంట్ సి యు ప్లీజ్ ! డు  యు మేరీ  మీ" ఇలా ఉన్న మెయిల్ చూసి చిరాకు వచ్చేస్తుంది .

"ఒరేయ్ నీకు  ఒకసారి చెపితే అర్ధం కాదా ! వెర్రి ముండా  కొడకా .. నీకేమన్నా పైత్యమంటరా ? ఒకే పాటలు ఇష్టపడినంత మాత్రాన  పెళ్ళిళ్ళు  చేసేసుకుంటారటరా!?  ఇప్పుడు నిజంగా నాముందుకు వస్తే పీలర్ తో తోలు తీసి ఉప్పు, కారంలో పొర్లించి మరీ...  బెంగుళూరుకి ప్లైట్ ఎక్కిస్తా .. ముందు నా ముందుకు రారా చూద్ద్దాం ".. అంటూ  మళ్ళీ డిలీట్ బాక్స్ లోకి పంపేస్తాను.

ఆ పైనే .. నీకు  ఈ రోజు మంచి అవకాశం  కలసి వస్తుంది ..కావాలంటే . మీ  జాతకంలో ఈ రోజు ఏం జరుగుతుందో  ఇక్కడ చూసుకోండి  అంటాడు .Horoscop  free  వాడు .

"నా జాతకం వద్దు, నీ పిండా కూడు వద్దు .. పోరా బాబు పో .. నీ దారి నువ్వే చూసుకోరా" అని వాడిని బలవంతంగా డిలీట్  బాక్స్ లోకి పంపుతాను

ఇంకొకటి ..  "వనజా!  మీరు సామ్సంగ్ గెలాక్సీ   ఫోన్ గెలుచుకున్నారు 664 రూపాయలకే ".అంటాడు ఇంకొకడు .

సామ్సంగ్ గెలాక్సీ .. ఆ .. నాకొద్దు .. నా iphone 5 ఉంది ముద్దు ముద్దుగా .. నువ్వు ఫ్రీగా ఇస్తానన్నా నాకొద్దు పోవయ్యా.. అంటూ గిరాటు వేసినట్లు .. వాడిని  డిలీట్  బాక్స్ లోకి పంపుతాను

 కేవలం వెయ్యి రూపాయలకే మీరు  యెన్ఐఐటి సర్టిఫికేట్ పొందవచ్చు వివరాలకు సంప్రదించండి  అని మెయిల్ లో కనబడి మూర్చపోయాను . ఓర్ని! ఇంత  సులభమైన  పద్దతిలో  యెన్ఐటి పూర్తయిపోతుంటే మన ఆంద్ర వాళ్ళు కిండర్ గార్డెన్ స్కూల్ దగ్గరనుండే ఐ ఐ టి కోచింగ్ కోసం కార్పోరేట్ స్కూల్స్ కి,  కాలేజ్ లకి లక్షలు లక్షలు ఖర్చుపెట్టేవాళ్ళు కదా ! తెలియక  వారికి ఎంత అన్యాయం జరిగిపోయింది . ఇవాళ కనీసం ఒక వందమంది పేరెంట్స్ కైనా..  ఈ విషయం తెలియజేయాలని కంకణం కట్టుకున్నాను .
 ఇక తరువాత  మెయిల్ చూస్తే .. "వనజా ! మీకు కేవలం  150 రూపాయల ప్యాక్ తో  ఐ  బ్రోస్ , పేషియల్ , పెడిక్యూర్, మేనిక్యూర్, బాడీ వాక్స్ అన్నీ ఇస్తాం. మా పార్లర్ కి ఒకసారి  విజిట్ చేయండి " .. అంటూ ఉంటుంది

ఓర్ని ! ఇంత ఛీఫ్ .ఆఆఆఆఆఆఅ    మొన్నీమధ్య నా హెయిర్ స్టైల్ ట్రిమ్  చేయించుకుంటేనే  650 దొబ్బేసారే ! ఎంత మోసం అనుకుంటూనే .. ఓహో .అర్ధమయిందిలే !  పంక్షన్స్  సీజన్ అయిపోయిందిగా తల్లీ .. ఈగలు తోలుకుంటున్నారా .. అనుకుంటూనే  .. నాకు ఇలాంటివి అలవాటు లేదండి.. నేనంత నాగరికం కాదులే! పూర్ విల్లెజ్ వుమెన్ ని...  అంటూ  వారిని సాగనంపేస్తాను

మీ హాస్పిటల్ బిల్ల్స్ ఎవరు  పే చేస్తారు?  అంటూ అడుగుతారు...   ఇంకొకరు  

 మీకు పుణ్యం ఉంటుంది అదేదేదో మీరు" పే"  చేసేయండి . చాలా రోజుల నుండి టోటల్ హెల్త్  చెకప్ చేయించుకోవాలి అనుకుంటున్నా,, అంటూ .. వారిని పంపేస్తాను

"బెస్ట్ ఇన్స్యూరెన్స్ పాలసీ చేయమంటారా? .. అంటారు ఇంకొకరు

అబ్బే ! అవసరం లేదండి ..కోట్ల  రూపాయలు ఆస్తులు ఉన్నా..చాలా మందికి లాగానే  మాకు రాజీవ్ ఆరోగ్య శ్రీ కార్డ్ ఉందండీ ..  మాకు ఆ కార్డ్  ఉన్నదన్నమాట మీకు తెలిసినట్లులేదు.   మీతో నాకవసరం లేదండీ .. వెళ్లి రండి .. అంటూ మర్యాదగానే పంపిస్తాను .

డాలర్ రేట్ ఎక్కువైతే ఏమిటండి ? మా ట్రావెల్  పాక్ తీసుకోండి ..ఎంజాయ్ చేసి రండి హాట్ హాట్ బిల్స్ తర్వాత  మేమిస్తాం అంటాడు ట్రావెల్  హాట్ వాడు .

 ఇంత వరకు ప్రక్కనే ఉన్న పాపికొండలు చూడటానికే వెళ్ళలేదు .. మా రూపాయి అంత  ఎత్తు ఎగరలేదులే బాబు .. ఇంకో జంటని వెతుక్కొ.. అంటూ వాడిని బలవంతంగా డిలీట్ బాక్స్ లోకి  తోసేస్తాను

"వనజా .గెట్  మేరీడ్ అగైన్ ?" రెండవ పెళ్ళిళ్ళు చేసే ఓ  వివాహబంధ డాట్ కమ్ .. వాడు అడుగుతున్నాడు

ఒక్కసారి పెళ్ళి  చేసుకోవడానికే  చాలా  కష్టంగా మా అత్తారింటి వాళ్ళ మెడలు ఒంచేసా .. మళ్ళీ రెండో సారి పెళ్ళా ! మొన్నేగా  "స్వాతి వాళ్ళ అమ్మ"  పెళ్లి గురించి  "సారంగ " లో చెప్పించా.. ఆ కథ నేనే వ్రాసానని నీకు తెలియదా .. బుద్దిలేని వెధవ  .. రెండో పెళ్లి అంట రెండో పెళ్లి... అంటూ  తిడుతూనే..

 మా వారికి ఫోన్ చేసి "ఏమండీ! వీడెవడో నన్ను రెండవ  పెళ్లి చేసుకుంటావా ? అని అడుగుతున్నాడండి, ఏం  చెప్పమంటారు?" అని అడిగాను . అందుకు ఆయన ఇలా చెప్పేరు "నేనన్నా కొన  ప్రాణంతో  మిగిలివున్నాను వాడికి  బతుకు మీద ఆశ లేకపోతే యిప్పుడే చేసుకోమనవే! నేను వెంటనే విడాకులిచ్చేస్తా!" అని  ..

"ఇదిగో.. మా వారి మాటలు విన్నావా..? వెనక్కి తిరక్కుండా పరిగెత్తు" ...అంటూ వాడిని పంపించాను .

అమ్మయ్య ! ఇవాల్టికి  ఇక్కడ పిల్టర్  అయిపోయిందికాబట్టి  అవసరమయినవి చూసుకుందాం .. అని పనిలో మునిగిపోయాను

ఇంతలో లాండ్ లైన్ మ్రోగింది . అబ్బా.. ఇప్పుడు అక్కడి వెళ్ళాలంటే ఈ సిస్టం ముందు నుండి లేవాలి . లేచి వెళ్ళేటప్పటికి రింగ్ ఆగిపోతే కాల్  బాక్ చేయాలి .  ఎవరైనా సోది వేస్తారు వాళ్ళ బిల్ కాదుగా...  అనుకుంటూ మోకాలు నొప్పి కలుక్కు మంటున్నా .. గబా గబా వెళ్లి రిసీవర్ తీశాను . ఎవరో అపరిచితురాలు .

మేడమ్ .. కాంతి ఎంటర్ ప్రైజెస్  నుంచి కాల్ చేస్తున్నాం . మీ ఫోన్ నంబర్ లక్కీ నంబర్ గా  సెలెక్ట్ అయింది . నాలుగు చిమ్నీస్  ఉన్న   గ్యాస్ స్టవ్  600 రూపాయలకే ఇస్తున్నాం . మీ  ఇంటి అడ్రస్ ఇస్తే డోర్ డెలివరీ ఇస్తాం అడ్రెస్స్ చెప్పండి మేడం .. చాలా మర్యాదగా అడిగింది.

ఏమ్మా .. ఫోన్ నంబర్ ఇచ్చిన టెలీఫోన్  డైరక్టరీ ఇంటి నంబర్ ఇవ్వలేదా తల్లీ  అని మనసులో అనుకుని ..  వద్దమ్మా ! రెండు చిమ్నీలు ఉన్న స్టవ్ పైనే గిర గిర తిరిగి  గంట లోపలే వంట చేసి పడే స్తున్నా... నువ్వు నాలుగు పొయ్యిల స్టవ్ తెచ్చి పెడితే అరగంటలో వంట చేసి అక్కడ పడేసి .. ఫేస్ బుక్  లో కూర్చుంటా .. మా ఆయన తిట్లు నుండి కాస్త నన్ను బ్రతకనీ తల్లీ! అంటూ ఫోన్  పెట్టి పడేసాను .

మళ్ళీ ఇలా ఫేస్ బుక్ ముందు కూర్చున్నానా .. మొబైల్ రింగ్ అయింది . ఎవరిదో .. ఈ కొత్త నంబర్ !!??
అనుకుంటూ .. హలో .. అన్నాను.

"మేడమ్ .... ఈ మొబైల్ నంబర్  మీదేనా అండీ? " అడిగింది . "అవునండీ ..  తొమ్మిదేళ్ళ  నుండి అచ్చంగా నాదేనూ, మీకేమిటి సందేహం?"  అనడిగాను  .

మీరు చాలా లక్కీ మేడం ! .. హైదరాబాద్ భాగమతి పెరల్స్ వారు .. లక్కీ డీప్  తీస్తే మీ నంబర్ సెలక్ట్ అయింది . మా షాప్ వార్షి కోత్సవం  సందర్భంగా మీకు నలబై వేల రూపాయలు విలువ చేసే ముత్యాల హారం కేవలం 3,300 రూపాయలకే వస్తుంది . మీ అడ్రెస్స్ చెపితే మీకు వి.పి.పి లో పంపబడుతుంది మీరు ఆ డబ్బు కట్టి తీసుకొవచ్చు . అని చెప్పింది .

మా బంగారు తల్లే! మీ తెలంగాణా వారిది  ఎంత ఉదార హృదయం . నేను సీమాంధ్రా మనిషినని తెలియక నాకు బహుమానంగా   ముత్యాల హారం  ఇస్తున్నారు కానీ,  ముత్యాలు నా ఒంటికి సరిపడవు తల్లీ! మా జగ్గయ్యపేట రంగు రాళ్ళు చాలమ్మా   నాకు "  అంటూ ఫోన్ కట్ చేసాను .

నేను ఎంత మూర్ఖురాలినో కదండీ! ఎన్ని ఆఫర్లు .. ప్చ్ .. ఒక్కటన్నా ఉపయోగించుకోవడం రావడం లేదు అనుకుంటున్నాను .

మావారు అప్పుడప్పుడూ అంటూ ఉండేవారు .. "తింగరి బుచ్చి" అని

నిజమేనేమో.. అనుకుంటున్నారా ! ఇలాంటి వెధవ ట్రిక్  లకి పడిపోవడానికి .. నేనేమన్నా .."ఒట్టి  వనజ " అనుకుంటున్నారేమో .. హా.. నేను  బ్లాగర్ "వనజ వనమాలి " అని తెలియదు కాబోలు . :) :)

(రోజూ  అనేక రకాల మార్కెటింగ్ మాయాజాలం కి గురి కాకుండా, బలి కాకుండా   ఉండటం చాలా కష్టం సుమీ !అనుకుంటూ సరదాగా ఈ పోస్ట్ .. హాయిగా నవ్వేసుకోండి నచ్చితే నాలుగు అక్షింతలు వేయండి)
.


11, సెప్టెంబర్ 2013, బుధవారం

నాయనమ్మ చెప్పిన కథ



అది వర్షా కాలం . ధర్మం  కుంటి  నడక నడుస్తున్నా నెలకి నాలుగు వానలు కురిసే కాలం .

 కృష్ణానదీ గమనంలో రెండు పాయలుగా చీలిపోయి మధ్యలో ఉన్న దివిసీమ గ్రామాలు.
పడవ మీద యేరు దాటి అవతలకి వెళ్ళడమే తప్ప రవాణా సౌకర్యం అంతగా లేని ఆ ఊర్లకి ..  వేరే మార్గమే లేదు .

ఆ రోజు ప్రొద్దుట నుండి  తెర్లు  తెర్లుగా  కడుపులో నొప్పి వచ్చిన మాదిరిగా జల్లులు పడుతూనే ఉన్నాయి . యేరు ఉదృతంగా ప్రవహిస్తూనే ఉంది .. అయినా ఆ ఏటి తీరాన పుట్టి పెరిగిన వారికి ఏటి నడకలు తెలుసు కాబట్టి  అటునిటు రాకపోకలు సాగిస్తూనే ఉన్నారు . నాలుగు పడవలు  అటుఇటు తిరుగుతూనే ఉన్నాయి .  వాన కురుస్తూనే ఉంది చీకటి పడుతుండగా .. యేరు దాటి ఆవలోడ్డుకి వెళ్ళిన పడవలు  రెండు తిరిగి రానేలేదు .
ఈవల ఉన్న రెండు పడవలు  ఇక అటువైపుకి వెళ్ళ నట్టే!

పడవ రాముడు  ఏటి ఒడ్డున ఉన్న పాకలో కూర్చుని తీరిగ్గా చుట్ట కాల్చుకుంటూ ఉన్నాడు . అంతలో అదరాబదరా.. పరిగెత్తుకుంటూ .. ఏటి ఒడ్డుకి వచ్చి నిలబడింది రంగమ్మ..  చేతిలో తాటాకు గొడుగు ఉంది .. ఆ గొడుగు క్రింద  పదేళ్ళ కొడుకుని తడవకుండా చూసుకుంటూ తానూ తడుస్తూ మనిషి అంతా ముద్ద ముద్దగా తడిసి పోయి  ఒంటికి చుట్టుకుపోయిన చీరతో నడక కష్టంగా సాగిస్తూ వచ్చింది .

ఆమెని చూసి ఇప్పుడు ఈ మనిషిని యేరు దాటించాలి కాబొలు.. ఒక్క మనిషి కోసం ఆవలోడ్డుకి ఏమి  వెళతాం ? ఎక్కడోచోట  చుట్టాలో, తెలిసిన వాళ్ళో ఉండి  ఉంటారులే ! పడవ  వెళ్ళదని  చెప్పేస్తే పొలా ? పెందరాడే  ఎక్కడో చోట .సర్దుకుంటాది ... అని మనసులో అనుకుని

ఇప్పుడు ఆ పక్కకి ఎల్లేదానికి కుదరదమ్మా.. ఇక రేపోద్దునే  పడవ  విప్పేది .కేకేసి  చెప్పాడు .

అయ్యో! అలా అంటే  ఎట్టాగయ్యా .. పిల్లగాడికి బాగోకపోతే ఆచార్యుల గారి దగ్గరకి తీసుకొచ్చా..  ఒళ్ళు మాడిపోతా ఉంది  ఇట్టా ఉన్న బిడ్డని పెట్టుకుని ఎవరింటికి పోతాను .. ? అదీగాక ఇంటి కాడ పాలు తాగే  పసి పిల్ల ఉంది . పాలు తీయాల్సిన గేదెలు ఉన్నాయి. ఇద్దరమే ఉన్నామని అనుకోకుండా కాస్త అటుప్రక్క దింపయ్యా ! బతిమలాడుకుంది

రంగమ్మ మాటలు విననట్టే..లేచి నిలబడి తుండు ముక్క దులుపుకుని తలకి చుట్టుకుంటూ ఊరివైపుకి  అడుగులు వేయసాగాడు . ఆడమనిషి అంతలా బతిమలాడుతుంటే అలా వెళ్ళిపోవడం న్యాయంగా ఉందా ! వచ్చే  సాలుకి ధాన్యం కొలిచేటప్పుడు నాలుగు మానికలు ఎక్కువ కొలిపిస్తాను ..కాదనకుండా  రాయ్యా .. నన్ను కాస్త దించి రా..
కావాలంటే  మా ఇంటికాడే అన్నం తిని గుడికాడ పడుకుందువు  గాని ..  అని బ్రతిమలాడింది.

అయినా రాముడు వినడంలేదు .. అప్పుడు రంగమ్మ ఒక మాట అంది . నువ్వు గనక నన్నుఅవతలోడ్డున దించితే .. నీకొక బహుమానం ఇస్తాను " అంది .

"ఏమిస్తావు" అడిగాడు వాడి మనసులో వంకర ఆలోచనలు

" మా ఆయనకీ కూడా చూపనిది నీకు చూపిస్తాను " అంది .

ఆ మాట వినగానే నడుస్తున్నవాడల్లా  గిరుక్కున వెనుదిరిగాడు . పడవ తాడు విప్పుతూ .." మాట తప్పకూడదు" అని హెచ్చరించాడు

 "ఇచ్చిన మాట తప్పను"  అంటూ ...  ఆమె మరో మారు మాట ఇచ్చింది

సన్నగా వర్షం కురుస్తూనే ఉంది . తాటాకు గొడుగు క్రింద పిల్లవాడు .. కురుస్తున్న జల్లులో తడుస్తున్న ఆమెని చూస్తూ .. రంగమ్మ ఇచ్చే బహుమతి ఏమై  ఉంటుందా.. అని  ఆలోచిస్తూ .. లభించబోయే బహుమానం కోసం   ఆత్రంగా  చూస్తున్నట్లు .. ఆవలోడ్డుకి  త్వరత్వరగా తీసుకువెళ్ళి .. పడవ ఆపాడు .

రంగమ్మ ముందు దిగి .. తర్వాత పిల్లవాడిని దించుకుని పదేళ్ళ పిల్లవాడిని చంకన వేసుకుని .. నడక సాగించింది .

ఆమె వెనుకనే .. రాముడు   నడవసాగాడు .. ఆమె వడి వడిగా అడుగులువేసుకుంటూ వెళ్ళిపోతుంది ...

నాకు ఇస్తానన్న బహుమానం ఇవ్వలేదు .అంటూ  దారికెదురుగా ...వెళ్లి అడ్డంగా నిల బడ్డాడు .

సరే ! చూపిస్తాను .. ఉండు అంటూ .. పిల్లవాడిని క్రిందకి దించింది  రంగడి ఎదురుగా నిలబడింది .  అప్పుడామే మొహం  మీద సన్నటి వెలుగు పడతా ఉంది ..  ఆ వెలుతురు లోనే .. ఆమె నుదుట ఉన్న కుంకుమ ని గట్టిగా తుడిచేసుకుంది .

రాముడు కి  ఆమె ఎందుకల్లా చేస్తుందో అర్ధం కాలేదు . ఆశ్చర్యంగా చూస్తూనే ఉన్నాడు . .. నుదు టున ఉన్న కుంకుమంతా  శుభ్రంగా తుడి చేసుకున్నాక.. "ఇదిగి.. ఇది మా  ఆయన చూడకుండా ఉండేది ..నువ్వు చూసేది " అంది .

అమ్మ నీయమ్మ ! ఎంతటి జాణవే  నువ్వు !  అనుకుని ఉసూరుమంటూ ..వెనుదిరిగాదు రాముడు  .

అప్పటి కాలంలో నుదుట కుంకుమ లేని భార్యని భర్త చూడలేడు . ఎందుకని అంటే .అతను మరణిస్తే తప్ప ఆమె నుదుట కుంకుమ లేకుండా ఉండనే ఉండదు . రంగమ్మ అందుకే ..భర్త చూడనిది చూపిస్తాను అని అంత  నమ్మకంగా చెప్పింది .

నాకు ఈ కథ తలచుకున్నప్పుడల్లా తెగ నవ్వు వచ్చేస్తూ ఉంటుంది .

ఇలాంటి కథలెన్నో మా నాయానమ్మ నాకు చెప్పేది . ఆ కథలలో ఎక్కువగా.. మగవారి అవకాశవాదం ,ఆడవాళ్ళ సమయస్పూర్తి ,ఆపద వస్తుందనుకున్నప్పుడు .. ఆడవారు ఎలా తమని తాము కాపాడుకునేవారో ,చాకచక్యంతో పనులు చేయించుకునే వారో ..లాంటి విశేషాలు ఉండేవి .

ఏదో ఒక సామెత ఉంది కదా ! యేరు దాటేదాక పడవ  మల్లాయ్ ! ఏరు దాటాక ఓటి  మల్లాయ్ (కరక్టేనా ?}  అనడం  ఇలాంటిదే అనుకుంటాను .

ఇక ..కొన్ని విషయాలలో .. నేనెలా ఉంటానంటే .. చెపుతాను

నాయనమ్మ చెప్పే కథలలో ,... సాంప్రదాయం, కొన్ని మూడాచారాలు ఉండేవి  . ఇప్పుడు కాలం లో చూస్తే భర్త భార్య నుదుటున కుంకుమ కాకపోయినా స్టిక్కర్ బిళ్ళ అయినా చూస్తున్నాడా? అని అనిపిస్తూ ఉంటుంది  బొట్టు లేకుండానే .. పతి  దేవుడు ముందు ..నేను తిరిగేస్తూ ఉండేదాన్ని ఒకోసారి గాజులు, ఆభరణాలు కూడా బరువే! వాటికి వ్యతిరేకం అని కాదు . ఎందుకో నిరాసక్తత .

 ఏ పార్టీలకో, శుభ కార్యాలకో,గుడికో వెళ్ళేటప్పుడు తప్ప ఇంట్లో ఉండే  మహిళలు కళ్ళకు కాటుక పెట్టుకుని ... నుదుటున కుంకుమ పెట్టుకుని,  మట్టిగాజులతో, తలలో పువ్వులతో కళ  కళ  లాడుతూ తిరుగుతూ ఉన్నారంటే నిజంగా గ్రేటే ..కదా!

అలాంటి వారందరికీ మహిళలకి వందనం .

నిజం చెప్పొద్దూ ..నేను అలా ఉండను .. నన్ను చూస్తే ఏ కొత్త మతం పుచ్చుకున్నానో అనుకునే ప్రమాదం ఉంది కూడా!  బొట్టు, అలంకారాలు మనసుకి నచ్చితే చేసుకోవాలి, బలవంతంగా కాదని నేను అనుకుంటాను. ఖచ్చితంగా చెప్పాలంటే మనసుకి నచ్చి నట్టు చేస్తాను .

ఒక మనిషి మరణిస్తే అలంకారాలన్నింటిని  బలవంతంగా త్యజించాలి అనుకునే దానికి నేను పూర్తీ వ్యతిరేకం. మా తాత గారు మరణిస్తే  మా..నానమ్మని  నిండుగా అలంకరింపజేసి ..నలుగురిలొ కూర్చోబెడుతుంటే రోజు అభ్యంతరం చెప్పేవాళ్ళం. పద్నాలుగో రోజు .. ఏవేవో చెయబొతుంటే  చేయనీయకుండా బలవంతంగా అడ్డుకున్నాం కూడా.

ప్రతి నిత్యం ముగ్గులు పెట్టుకుంటాం . దీపం పెడతాము  కొన్ని సంప్ర దాయాలు తప్పనిసరిగా పాటిస్తాం.
కానీ ఏదీ బలవంతంగా ఆచరించం .

( ముత్యమంతా పసుపు ముఖమంతా ఛాయ .. అలాంటి పాటలు మీకు ఇష్టం ఉండవా ? అలాంటి పాటలు గురించి చెప్పరు   అని  ఒక  ఫ్రెండ్ అడిగారు .. అప్పుడు ఈ కథ .. గుర్తుకొచ్చింది).

30, మార్చి 2013, శనివారం

చిలిపి + చిరు పరీక్ష


సోదర సోదరీ బ్లాగర్ మహాశయులకు... మీ అందరికి  ఒక చిలిపి + చిరు పరీక్ష పెట్టి ఎవరు గెలుస్తారో తెలుసుకోవాలని ఉంది.  సరదాగానే నండోయ్ !!

మనమందరం మన తోటి వారి బ్లాగులను చదువుతూనే ఉంటాం కదా! ఒక్కొకరిది ఒకో శైలి.  శైలి ని బట్టి మీరు వారిని గుర్తించ గలరా!?  ఒకోసారి  రచయిత  పేరు చెప్పకుండా  ఒక రచన ఇచ్చి చదివి  ఎవరు వ్రాసారో చెప్పమన్నట్లు  అన్నమాట

అలా చేయగలరేమో ప్రయత్నించండి. కామెంట్ ద్వారా మీ ఆన్సర్ చెప్పవచ్చు . ఖచ్చితమైన సమాధానం చెప్పినవారికి  బహుమానం గా వీరతాళ్ళు వేయబడును

దీనికి ఒక కారణం ఉంది/

 అది ఏమంటే  నేను క్రింద జత పరుస్తున్న  విషయం .. నాకు ఒక బ్లాగ్  ఫ్రెండ్  జన్మదిన శుభాకాంక్షలను ఇలా అందించారు. అది నాకు ఎంతగానో నచ్చింది   విలువైన మణి  మాణిక్యాలు తో సమానమైన ఈ ఆత్మీయ శుభాకాంక్షలు నాకు ఎంతో   విలువైనవి. అందుకే భద్రంగా దాచుకున్నాను హృదయం లోనూ.. అక్షరాల బోషాణం లోనూ  కూడా ,   ఆ ఫ్రెండ్ కి .. ఈ పోస్ట్ ముఖంగా మనసారా ధన్యవాదములు తెలుపుతూ నా మనసులో మాట ఇంకొకటి ...

ఈ బ్లాగ్ ప్రపంచం లోకి రాక మునుపు మనం ఎవరు ఎవరికీ ఏమి కాము. కానీ ఇక్కడి వచ్చిన తర్వాత మన వ్రాతలని బట్టి ఒకరికి ఒకరు అంతగా అభిమానించు కుంటున్నామో, వేరు వేరు సందర్భాలలో ఎలా స్పందించు కుంటున్నామో .. అన్నది గమనించుకుంటే  ఎన్నో ఆనంద,  అనుభూతి  క్షణాలు మన ఖాతాలో జమ చేయబడి ఉంటాయో కదా ! ఆ జ్ఞాపకాల నిధి ని  మనం అందరం సొంతం చేసుకుందాం

 శైలిని బట్టి  వ్రాసిన వారి ని  మీరు గుర్తించండి   మీకు అత్యంత  సూక్ష్మ గ్రాహి అన్న బిరుదు ఇవ్వడానికి తయారుగా ఉంది

ఇదిగో .. మీ పరీక్షా పత్రం .

ప్రియమైన వనజ గారు!
"జన్మదిన శుభాకాంక్షలు"
కుశలమేనని తలుస్తా!
ఏ ఒక సద్గుణాన్ని అలవర్చుకుంటే ఇతర సద్గుణములు యావత్తు తమంతట తాముగా వచ్చి వరిస్తాయో, ఆ సద్గుణం - 'స్ఫూర్తి సాహస సందేశాత్మకతలతో కూడిన "దైర్యం" '.
బహుశా ఈ కధ మీకు తెలిసే ఉంటుందనుకుంటాను -
ఓ రోజు ఒకానొక రాజు అంతఃపురం నుండి ఓ స్త్ర్రీ వెళ్లిపోతుంటే, అది చూసిన రాజుగారు, 'అమ్మా! ఎవరు నీవు?' అని ప్రశ్నించగా 'నేను ధనలక్ష్మీని, నీ అంతఃపురం వీడి వెళ్ళుతున్నాను' అని బదులిచ్చి వెళ్ళిపోయినా, అటుపై అదేరీతిలో ధాన్య, గజ, విజయ, మోక్ష ..... తదితర ఆరుగురు లక్ష్ములు తనని వీడి వెళ్ళిపోతున్న చలించని రాజు, ధైర్యలక్ష్మి వెళ్ళిపోతుండగా "అమ్మా! నీవు మాత్రం నన్ను వీడి వెళ్ళకు తల్లీ, నీవుంటే చాలు" అని ప్రార్ధించగా, ఆమె ఉండిపోయిందని, ఆమె ఉన్నచోటే మేమూ ఉంటామని ముందు వెళ్ళిన లక్ష్ములందరూ వెనక్కి తిరిగి వచ్చారని ఓ కధనం. దైర్యమనే ఒక్క సద్గుణం ఉంటే చాలు... ఉన్న స్థితి నుండి ఉన్నతస్థితికి ఎదగడానికి! ఆ ధైర్యం మీకు పెట్టని ఆభరణం.
వ్యాఖ్యలు పెట్టలేకపోయినను మీ ప్రతీ పోస్ట్ చదువుతుంటాను.
మీ రచనల్లో సూటిదనం ఉంటుంది, అది హృదయాన్ని తాకుతుంటుంది.
మీ రచనల్లో స్ఫూర్తి ఉంటుంది, అది చక్కటి సందేశాన్ని ఇస్తుంటుంది.
మీ రచనలు ఆలోచనాత్మకంగా ఉంటాయి, అవి బుద్ధిని పదునెక్కిస్తాయి.
వివిధ కోణాల్లో మీ రచనలు చదువుతుంటే, అందులో అంతర్లీనంగా ఓ ఉద్యమశీలిలా, ధైర్యశీలిలా, బుద్ధిశాలిలా, శక్తిశాలిలా, సాహసోపేతవనితలా ... విభిన్న రీతులో మీరే కదులాడుతున్నఅనుభూతి కల్గుతుంటుంది.
ఇక మీ మాతృప్రేమ వెల్లడి అవర్ణ్యం.

ఉద్యమం సాహసం ధైర్యం బుద్ధి: శక్తి: పరాక్రమః
షడతే యత్ర వర్తంతే తత్ర దేవః సహాయకః 

ప్రయత్నం,సాహసం, దైర్యం, బుద్ధి, శక్తి, పరాక్రమం ... ఈ ఆరూ ఉన్నచోట దైవం నుండి కూడా సహాయం లభిస్తుంది.
వనజ గారు!

పై ఆరు గుణాలున్న మీకు దైవానుగ్రహం సర్వదా సర్వత్రా ఉంటాయి. మీ మనోబీష్ట ప్రకారం మీ జీవనం నిండు నూరేళ్ళు ఆనందంగా ఆదర్శవంతంగా కొనసాగాలని ఆశిస్తూ -
మరోసారి చెప్తున్నా - 'జన్మదిన శుభాకాంక్షలు'.



ఇక కనిపెట్టడం మీ పని. వీరతాళ్ళు ఇవ్వడం నా పని. 

22, ఫిబ్రవరి 2013, శుక్రవారం

నవలా పఠనం

ఈ రోజు బుక్స్ షాపు కి వెళ్లి కొని నవలలు కొని తెచ్చుకున్నాను.

అవన్నీ చదివే వరకు కాస్త ఈ బ్లాగ్ కి ( కొన్ని బ్లాగ్స్ చదవడానికి, నేను  వ్రాయడానికి ) విరామం  ఇవ్వాలి అనుకున్నాను.

ఈ మధ్య పేస్ బుక్ లో కూడా తెగ తారట్లాడుతూ ఉన్నాను. కొద్ది రోజులు మరో ప్రపంచంలో మసిలి రావాలని ఉవ్విళ్ళూరుతూ ..  లీవ్ లెటర్ కి అప్లై చేసినట్లు ఈ పోస్ట్ వ్రాస్తున్నాను.

లీవ్ శాంక్షన్ చేసేసాం వెళ్ళమ్మా ..వెళ్ళు  అనుకుంటారు అని తెలుసు. :)

వెళ్ళే ముందు ఓ ముక్క  చెప్పి పోదామని .  ఆ ముక్క ఏమంటే .. నవల  అంటే ఏమిటి  అని.

చాలా మందికి తెలుసు . అయినా నాకు తెలుసు అని చెప్పి  పోవడం  ఎందుకంటే  ఏక బిగిన పది నవలలు చదవాలని కంకణం కట్టుకున్నాను

నవల అంటే .. ఏమిటి  అసలు నవల అనే ఎందుకు అనాలి ? అన్న ఆసక్తి కలిగి తెలుసుకున్న విషయం ఇది.

నవల అనే పదం "నావెల్ " అనే ఇంగ్లీష్ పదం నుండి పుట్టింది అంట, నూతనత్వం కల్గి ఉన్నది అని అర్ధం.

తెలుగులో మొదటి నవల నరహరి గోపాల కృష్ణమ శెట్టి "శ్రీ రంగరాజ చరిత్ర" అనే నవల రంచించారు. (1872)
తర్వాత కందుకూరి వీరేశ లింగం పంతులు గారు "రాజశేఖర చరిత్ర " అనే నవల రంచించారు. వారు దానిని  "వచన ప్రబంధం " అన్నారు

నవలని తోలి రోజులలో  "ఆఖ్యాయిక , ఉపన్యాసం ,కాదంబరి " అని వ్యవహరించే వారట.

మొట్ట మొదట "నవల " అని నామకరణం చేసిన వారు.. కాశీభట్ల బ్రహ్మయ్య శాస్త్రి గారు.

ఆఖరికి 1896 లో వచన రచనకి నవల అనే పేరు స్థిర పడింది .

మన  తెలుగు నవలలో పేరెన్నిక గల నవల "మాలపల్లి " గొప్ప సంచలనం కల్గించింది అని చెపుతారు. ఆ నవలా రచయిత ఉన్నవ లక్ష్మి నారాయణ . . జీవితాన్ని కథా వస్తువుగా స్వీకరించి కల్పనలతో,ఊహా శక్తి తో .. వ్రాసుకుంటూ పోయే పెద్ద రచనే నవల.

మన  తెలుగు లో  పేరెన్నిక  గల ఒక వంద నవలలు అయినా  చదివి బాగా బాగా ఆకళింపు చేసుకోవాలనే నా ఆశ.

శత వసంత సాహితీ మంజీరాలు పేరిట ఆకాశ వాణి  విజయవాడ కేంద్రం ప్రసారం చేసినప్పుడు  విని అమిత ఆసక్తి  తో  చాలా నవలలు  చదివాను.

మళ్ళీ ఇప్పుడు మొదలెట్టాను   ఈ నవలా పఠనం



అన్నట్లు ఇంకో విషయం ఏమంటే  కడప ఆకాశవాణి  కేంద్రం సత్యం శంకరమంచి "అమరావతి కథలు" ప్రసారం చేస్తుంది .ప్రతి సోమవారం ఉదయం ప్రసారాలలో " క్రాంతి  రేఖలు " అనే   కార్యక్రమం లో .  ఆసక్తి కల్గిన మిత్రులు అక్కడ ట్యూన్ చేసి వినవచ్చు.

నవలా పఠనమ్ లో  మునిగి తేలుతూ అప్పుడప్పుడు తిరిగి చూడాలనిపించే  ఈ అష్టమ వ్యసనం  నన్ను వదలకుంటే  నేను మళ్ళీ ఇక్కడ ప్రత్యక్షం అవుతానేమో ... చెప్పలేను కూడా .  :)