ది ఫెడరల్ తెలంగాణ లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
ది ఫెడరల్ తెలంగాణ లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

5, మే 2026, మంగళవారం

ఊటల జలధి



 ఊటల జలధి -వనజ తాతినేని

నడివీధిలో ఒంటరి చందమామని చూసి

అప్రయత్నంగా ఆగి... 

అందరూ నిన్ను వదిలేసి వెళ్ళిపోయారా?. 

నువ్వు నాలాగే ఒంటరిగా ఊరేగుతున్నావ్ 

రా! ఇలా కాసేపు కూర్చుందాం.

పాత కాలం నాటి కబుర్లు చెప్పుకుందాం.


ఎందుకో రగిలిపోతున్నావ్ స్వభావానికి విరుద్ధంగా. 

కమలం చందనం కలిపి  కలపంలో నూరి తెచ్చాను.

కాస్త పూసుకుందువుగాని  రా! 

రాలుతున్న రేలపూలు కూడా ఏవో ఊసులు చెబుతాయట. 

చెరొక చెవిని వేసుకుందాం సరేనా! 


నడిరాత్రి కూడా ఈ సెలయేటి గలగలలు వింటూ 

కొన్ని సీతాకోకచిలుకలు బుల్ బుల్ పిట్టలు కూడా 

రెక్కలు విప్పుకుని నాట్యం చేస్తున్నాయి. 

ఉండి ఉండి చిమటలు కూడా  అరుస్తున్నాయి 

అటువైపు రాలుతున్న చినుకుల శబ్దాన్ని మింగిన

గాలి కూడా కరతాళ నృత్యం చేస్తోంది.  


ఇది విన్నావా? 

మా ఆశా దీది వెళ్ళిపోయింది. స్వరామృతాన్ని  

మనుష్య లోకం పైకి విరజిమ్మి.. అందుకోగల్లిన వాళ్ళు 

అందుకోమని నవ్వుతూ వెళ్ళిపోయింది. 

ఎన్ని హృదయాలు స్వార్థంతో కన్నీళ్ళతో ప్రార్ధించాయో 

వెళ్ళొద్దు వెళ్ళొద్దు అని.

 

రోజుకోసారైనా ఓ సాతిరే.. అని ఆర్తితో పాడుకునే  నేను.. 

ఇప్పుడు పూటకు పదిసార్లు వింటున్నా తనివితీరడం లేదు. 

నా నిద్ర పట్టని రాత్రులను ఎవరికి త్యాగం చేయాలో తెలియడం లేదు. 

ఏంటీ.. నువ్వు కూడా పాట కోసం వెతుక్కుంటున్నావా? 

పాటల పెట్టె తాళం తీసాను. సరే,

ఏం పాట వినాలని వుంది చెప్పు? 


ఏ క్యా జగహ్ హై దోస్తోన్, యే కౌన్ సా దయార్ హై

ఏంటీ!!? ఈ పాటా? 

చంపేసావ్ పో చంద్రమా! 

ఇప్పుడు నా ఏడుపులో ఇంకో ఏడుపు కూడా జత చేసావు.


నేనిప్పుడు ఉమ్రావ్ జాన్ గురించి మాత్రమే కాకుండా

రేఖ గురించి కూడా ఏడుస్తాను. 

నీ గురించి నా గురించి కూడా ఏడుస్తాను. 

ఈ దుఃఖాన్ని పంచుకోవడానికే కదూ.. 

రోడ్డున పడి తిరుగుతున్నావ్. 

నేను నీకూ, నీకు నేనూ దొరికాం. 


ఈ దుఃఖం ఆశా జీ ఇచ్చి వెళ్ళిన సౌగత్ (saugat) కదా! 

ఆనందంగా స్వీకరిద్దాం. సరేనా! 

తీపి చేదు కలగలిపి రుచి చూసినట్లు

హంసధ్వని రాగ్ భూపాలి కలిసి వింటున్నట్టు వుంది.


తొలి కోడి కూస్తుంది.వెళ్ళి రా! మళ్ళీ రాత్రికి కూడా వస్తావుగా! 

కావ్య రసాన్నో సంగీత రసాన్నో ఒంటిగా ఆస్వాదించలేము.

ఆనందం లాగానే విషాదాన్ని రోజుకొకమారైనా

కలిసి అనుభవంలోకి.. తెచ్చుకుందాం.

ఊటల జలధిలో మునిగి తేలుదాం, సరేనా! 


**********************

18 April 2026. 09:30 am.



12 April 2026 న ప్రముఖ హిందీ గాయని ఆశా బోస్లే మరణించారు. ఆమెకు నివాళిగా ఈ కవిత రాసాను. 26 April 2026 న “ది ఫెడరల్ తెలంగాణ డాట్ కామ్” వారు ఈ కవిత ను ఫ్రచురించారు. 

నా YouTube Channel లో ఈ కవితను వినిపించాను. వింటారు కదూ! 

ఊటల జలధి  వినండీ 






25, ఫిబ్రవరి 2026, బుధవారం

ప్రేమ ప్రకటనా పత్రము




 ప్రేమ ప్రకటనా పత్రము   - వనజ తాతినేని

నా ఏకాంత యోగాన్ని భస్మీపటలం చేసి  

ఏళ్ళ తరబడి నా కలలోకి వస్తున్న గ్రీకు శిల్ప సుందరి నీవు. 

నీ కోసం జీవితాంతం నిరీక్షించగలను. 

ఈ ఎదురుచూపులో నన్ను నేను సంభాళించుకోవడం మరిచాను. 

ఓ జవరాలా! కూరిమి వరాలిచ్చే దేవత ముందు దోసిలి పట్టి  

ఇంతగా ఎదురు చూడాలా!?

దయచేసి నా ముందుకు రాకూడదూ!  


ఒక్కసారి నీ కళ్ళలో కళ్ళు పెట్టి చూడనీ 

కిరణాల జడి వానలో నన్ను నిలువెల్లా తడిసిపోనీ.. 

దయచేసి నువ్వు వస్తావని మాటిచ్చావంటే చాలు

నా పొదరిల్లు చుట్టూ వసంతాన్ని సమావేశపరుస్తాను. 


నా పాటకు తోడుగా స్వరాల్ని జతచేయమని 

గండు కోయిలను వేడుకుంటాను. 

పూల తీగెలను తోరణాలుగా వ్రేలాడదీస్తాను. 

నీకు విసుగు లేకుండా ముచ్చట్లు చెప్పడానికి 

మైనా పక్షులను బహుమానంగా ఇస్తాను 


మనోహరంగా వుండే సీతాకోక చిలుకలు నీ చుట్టూ

నిత్యం సంచరించేలా పూలతోటను వేస్తాను

పన్నీరు పూలతో శయ్య ను అలంకరిస్తాను. 

వేసవిలో విరబూసే జాజులు మల్లెలతో పాటు 

నా మమతను మాలలుగా మార్చి నిన్ను అలంకరిస్తాను.

పూట పూటకి వలపు హరిచందనాలతో సత్కరిస్తాను

మధుర ఫలాలను పలహారం పెడతాను

చీకటెరుగని రాత్రుల్లో గూటి పడవలో విహారం చేద్దాం 


నువ్వు చలం ఊర్వశి వా! అయితే నేను  పురూరువుడినౌతా!

తేనెలో పడి ఈగ మరణించడానికి సిద్దపడినట్లు 

నీ విరహంతో అలమటించటం కూడా నాకు సమ్మతమే.  


నాలో రసమయ భావాలకు ద్వారాలు తెరిచిన

నీ పరువాల కొమ్మపై రోజూ కాసేపు నన్ను ఊగనివ్వు

సొగసుకాడిని నేను,  దేదీప్య మానసి వి నీవు.

మనమిద్దరం కలిసి మన అందమైన సంతానమౌవుదాం, సరేనా!?  


విధి లిఖితం కాకపోతే నువ్వు నాకెందుకు తారసపడినట్లు !?  

ఇంకా అనేక జన్మలు యెందుకు చెప్పు?

ఈ జన్మలోనే మనని భగవంతుడు తప్పక ఆశీర్వదిస్తాడు. 

ఆశీర్వదించబడేవి అందమైన జీవితాలు

వారి హృదయాల్లో ఆనందం నిశ్శబ్ద నదులుగా ప్రవహిస్తాయి.


మహల్ విడిచి రా చిలకా! నా మనస్సరస్సులో  దాగిన ఆరాధన

నీటిబుగ్గలా ఉబికి నిన్ను  నిలువెల్లా అభిషేకిస్తుంది.

నాది పేద హృదయమని తృణీకరించకు, 

నా స్నేహానికి రంగులు హంగులూ లేవు 

నాలో వేళ్ళూనుకుని పోయిన ప్రేమకి సమాధి కట్టకు.  

తర్వాత విలపించినా ఆ సమాధి  బద్దలు కొట్టుకుని రాలేను. 


ఈ ప్రకటనా పత్రాన్ని స్వీకరించు. నా విన్నపం మన్నించి 

ఆమోదం తెలుపు ప్రియా!  ఒంటి స్తంభం మేడలో వున్న రాకుమారి కోసం 

ఉద్విగ్నత తో  వేసారిపోతున్న పోతుటీగ లాంటి తోటరాముడు

సాహోసేపేతంగా నిచ్చెన వేస్తున్నాడు. సముద్రాలు ఈది వస్తున్నాడు.

నీ మనస్సనే సముద్రం లోతు తెలుసు కనుక.


వచ్చేయ్ ప్రియా! ఈ అనామకుడి సాంగత్యం కొరకు వచ్చేయ్

మదిలో ముద్ర వేసిన నీ సత్యం నిన్ను వెతుక్కుంటూ వచ్చాక 

ఒంటరిగా దిగులు రాగాలాపన యెందుకు?

జనులేం అనుకుంటే మనకెందుకు?

ఏక కంఠంతో ప్రణయ గీతాలాపన చేద్దాం.

వచ్చేయ్! రాజు పేద ప్రేమకు పట్టాభిషేకం చేసుకుందాం 

ప్రియా, వచ్చేయ్!! పొదరిల్లు స్వాగతం పలుకుతుంది. 


**************End****************


19 Feb 2026 The Federal Telangana. Com లో ప్రచురితం




31, జనవరి 2026, శనివారం

నీవూ నేనూ ఊహల్లో…

 



నీవూ నేనూ ఊహల్లో..     - వనజ తాతినేని. 


నీ కథలో నువ్వు శ్రీరామ చంద్రుడివి

నా కథలో నేను జానకి ని

నా కథలో నువ్వు లేవు

నీ కథలోనూ నేను లేను

మన ఇరువురి కథలూ కలిసింది లేదు.


మనమిద్దరం ఆ ఒడ్డున ఒకరు ఈ ఒడ్డున ఒకరు కూర్చుని.. 

ఇద్దరు బాల్యస్నేహితుల్లా ఖాళీ అగ్గిపెట్టెలకు 

దారం వాహకంగా చేసుకుని సరదాగా కబుర్లు విరజిమ్ముకుంటాం.

నదిపై రహస్యంగా అనుబంధపు వంతెన నిర్మించుకుంటాం.

మనని చూసి మన పిల్లలు హాయిగా నవ్వుకుంటారు. 

వారి మానసిక కుటుంబంలో మనకి కొత్త సభ్యత్వం ఇచ్చేస్తారు. 


జీవితాన్ని మధించగా వచ్చిన హాలాహలం మింగిన వాళ్ళం 

అమృతం కోసం ఎదురు చూస్తామా? 

భూమిని గునపాలతో తవ్వి పోసినప్పుడు కనబడని

లంకె బిందెలు అంజనం వేసి చూస్తే కనబడతాయనుకుంటామా? 

చంద్రుని వెన్నెల కిరణాలు చంద్రకాంతి శిలలను కరిగిస్తాయని 

గుడ్డిగా నమ్ముతామో కానీ చాపల్యంతో రేగుపండ్ల కోసం 

వెలగా మంచి ముత్యాలు వొదులుకుంటామా? 

నిరంతరం ఇతరులను మెప్పించడానికి చేసే ప్రయత్నం లో.. 

మనకు మనంగా ఏం మిగులుతున్నామని? లెక్కలు తేలవు

తమస్సు ఉషస్సు భేదం తెలియని బధిరులం కాము

ఎందుకీ.. వృధా ప్రయాస అని కూడా అనుకోము.


మర్యాదల సరిహద్దులు దాట లేని

నేనొక మెటానోయా   (Metanoia)

నువ్వొక ఐసోలోఫిలియా(Isolophilia)

తోడు నీడ అర్థాలు మారిపోతున్న కాలం ఇది.

అయినా.. ఏదో విముఖత మరేదో కొత్త ఆశ. 

తెగనీయక, ముడి పడనీయక, కనుమరుగుగాక.


మన మధ్య 

ఆఖరి చూపు ఆఖరి మాట ప్రాప్తం వుంటాయో లేదో! 

ఏదో ఒకనాడు శక్తి ఉడిగి గుండె ఆగి  కళేబరం శిథిలమైపోతుంది.

ఎప్పుడో.. తెలిసాక ఏం చేయగలం చెప్పు? 

నాలుగునాళ్ళు కన్నీరు కార్చడం తప్ప. 


మన జీవయాత్ర ముగిసే లోగా..  

హృదయ కవాటాల్లోకి వెలుగుల్ని వెదజల్లిన మాటలు

గుండె గొంతుకను కోటి గొంతులు చేసి వినిపించిన పాటలన్నీ 

మూగబోకముందే.. ఇదే ఆఖరి లేఖ అన్నంత ఇదిగా 

 అనేక సంగతులతో నాలుగు ఉత్తరాలు  రాసుకుందాం.

రహస్యంగా రాసుకుని పోస్ట్ చేయని లేఖలు

చేరవలిసిన చోటుకు చేరకుండానే పెట్టెలోనో రహస్యపు అరల్లోనో దాగి 

అటుపిమ్మట ముక్కలై పోవడం ఏం బావుంటుంది చెప్పు? 


నేనేమో మాక్సీం గోర్కీ రాసిన ప్రణయ పత్రాలు కథలో “టెరెసా” లా కాకుండా

నువ్వేమో ఎడ్మండ్ జలో రాసిన ఆఖరి ఉత్తరం లోని “డేనియల్” లా కాకుండా

మనసంతా విప్పి ప్రేమ లేఖలు రాసుకుందాం. 

తప్పకుండా మనదాకా చేరేదాక జాగ్రత్తలు తీసుకుందాం.

ప్రతిరోజూ నాలుగు ముద్దలు రసానుభూతి అన్నాన్ని భుజిద్దాం.

బతుకు తీపి పంచుకుందాం. 


ఒక లేఖ లో …

రావోయ్, నా కనురెప్ప మాటుగా కలలో జీవించి పో అంటాన్నేను. 

నువ్వు ఇరవై ఏళ్ల కోడెకారు పిల్లాడివి అయిపోతావ్.  

నువ్వేమో, రా.. పిల్లా!  నా గుండె కింద నవ్వులు రువ్వుతూ అల్లరి చేసిపో! 

అనడంలో  నేను పదహారేళ్ళ పడుచు పిల్లని అయిపోతాను. 

.  

మరో  ప్రేమ పత్రంలో   

వానకి తడుస్తున్న పక్షి పిల్లను తల్లి రెక్కతో జవురుకుని 

డొక్కలోకి పొదువుకున్నట్టు నన్ను నీ హృదయంలోకి పొదువుకుంటావు.

నేనేమో.. నా ఒడిలో నీ తలని వుంచుకుని 

సుతి మెత్తగా మర్దన చేస్తూ జోల పాట పాడతాను.

అలా ఊహల్లో లేఖల్లో జీవిద్దాం. 

కాలానికి కాస్త కవిత్వాన్ని బహుకరించి పోదాము. 

దృశ్యం అంతా …నీవూ నేనూ ఊహల్లో..

గాలికి ఊగుతున్న  గుత్తుల గులాబీలా వుంది కదా! 

రాయడం ప్రారంభించు, ఎదురుచూపు గుమ్మానికి వ్రేలాడదీసెను.

 

***********************End***********************


పుట్ నోట్స్.. *ఐసోలోఫిలియా (Isolophilia) *మెటానోయా (Metanoia) ఎడ్మండ్ జలో (ఫ్రెంచ్ రచయిత) రాసిన “ఆఖరి ఉత్తరం” కథ. మాక్సీం గోర్కీ రాసిన “Her Lover” ప్రణయ పత్రాలు కథ.




 





25, జనవరి 2026, ఆదివారం

కొత్త కవిత ..

 నా కొత్త కవిత  “నీవూ నేనూ ఊహల్లో”  

ది ఫెడరల్ తెలంగాణ డాట్ కమ్ లో 

ఆదివారం మేటి కవిత గా ప్రచురితం. 

తప్పకుండా చూడండి. ఎడిటర్ గారికి ధన్యవాదాలు 🙏

ఈ కవిత లో ఉదహరించిన అంశాలకి 

పుట్ నోట్స్.. 

*ఐసోలోఫిలియా (Isolophilia) 

*మెటానోయా (Metanoia)

ఎడ్మండ్ జలో  (ఫ్రెంచ్ రచయిత) రాసిన “ఆఖరి ఉత్తరం” కథ. 

మాక్సీం గోర్కీ రాసిన “Her Lover” ప్రణయ పత్రాలు  కథ. 

ఈ లింక్ లో  కవిత చదవండీ.      నీవూ నేనూ ఊహల్లో

#వనజతాతినేని #vanajatatineni  #hilights #follower #poetry #thefedaraltelangana


24, జనవరి 2026, శనివారం

గాయాల గానం




గాయాల గానం   - వనజ తాతినేని.


ఇవాళ దుఃఖం పలుకరించింది. గాయాల సలపరం

ఎన్నో పురాతన దుఃఖాలను తవ్వి తీసింది.

కాలం గాయాలను మాన్పుతుందని ఎవరైనా అంటే 

గాయం లోపల ఓ అగ్నిపర్వతం దాగి వుంది అంటాను.


గాయం చెద రేగినట్టు రేగుతూనే వుంటుంది.

అది ఎన్నటికీ అదృశ్యం కాదు. 

ప్రతి గాయం ఒక విస్ఫోటనం

శకలాలు శకలాలుగా శరీరాన్ని తాకిన గాజు పలక

శరం లా గుచ్చి రంపంతో  పర పరా కోసిన అటవిక క్రీడ  


మానిపోయిన మచ్చల పై  తడిమి చూస్తే గాయం లోతు అందకపోవచ్చు

నది లోతు ఎంతో మనకు తెలుస్తుందా, అంతే! 

పోనీ నది కింద ఉన్న భూమి లోతు నదికి తెలుస్తుందా?  

నదిని దాటడానికి తెప్ప సాయం తీసుకున్నట్టు 

గాయానికి గాయానికి మధ్య వంతెన వేసి

జీవితాన్ని దాటడానికి యత్నిస్తున్నా.


గాయపడినప్పుడు కల్గిన బాధ నొప్పిని కూడా 

సృజనాత్మకంగా చిత్రీకరించే వుంటాను. 

పనిముట్టు మనదే అయినప్పుడు రూపాలకు ఏమి కొదవ ? 

తుఫానులా పలకరించి పోయే గాయాల జ్ఞాపకం మంచిదే!


గాయాలు చేసిన మనిషిని క్షమించేసి వుంటాను

ఆ గాయాల గుర్తు మాత్రం  మాసిపోదు. 

మనుషుల ముఖాన్ని గాయంతో పోల్చుకుంటాను 

ఆసరా తెచ్చుకుని మరీ గాయపరిచాడు కనుక.

గాయం నా పాత సహచరుడు.

నా నడక అతను చేసిన గాయాల జ్ఞాపకాలే! 


ఉంగరంలో పళ్ళ మధ్య  చక్కని బిగింపుతో  

కూర్చున్న వజ్రంలా నాలో మాయని గాయం

గాయ గేయంలో లయ తూగు బరువు  

అన్నీ సరిగ్గా అమిరాయి.  రుజువు కావాలా?

నా మణికట్టును పట్టుకుని నాడి ని చూడు. 

గాయాలు ప్రవహిస్తున్న సవ్వడి వింటావ్. 

వినబడని పాట అది.


నాకుగా.. నేనేం మిగల్లేదు. గాయాలుగా మిగిలాను.

 గాయాలపై పూలు పూయడం చూసారా ఎవరైనా! 

జీవన మకరందాన్ని ఆస్వాదించేది ఎలా?

గాయం నా జీవన గానం, యానం.  

గాయం నాలో జ్వాల, నా జీవశక్తి 

మానడానికి పట్టే సమయం నా జీవిత కాలం.


(18/01/2026 ఆదివారం ధి ఫెడరల్ తెలంగాణా డాట్ కామ్ లో ప్రచురింపబడింది)