పాపాయి బొమ్మ

 పాపాయి బొమ్మ  -వనజ తాతినేని 

అరుణిమ తో  అచ్చెరువు గా వుంది పాపాయి 

ఉదయం. ఆనందంలో తలమునకలై పోయింది. 

ఎవరో పాపాయి బొమ్మను దొంగిలించి విసిరికొట్టారు 

వెక్కి వెక్కి ఏడుస్తూ ముక్కలన్నీ యేరి బుట్టలో భద్రంగా దాచుకుంది 

ఇల్లంతా వెలుగురేకలు. దాచి పెట్టాలన్నా దాగని కాంతులు

అమ్మా..  ఎవరో నా బొమ్మని పగలగొట్టారు అని పిర్యాదు చేసింది

అయినా చూడూ..  ముక్కల వెలుగు ఎలా అలుముకుందో ఇల్లంతా.. అని సంబర పడింది కూడా.

అవును చిట్టితల్లీ.. నేను కూడా నా

చిన్నతనంలో  అమ్మమ్మకు ఇలాగే పిర్యాదు చేసాను నీ లాగే సంబరపడ్డాను 

అద్దం పాపాయి లకు యిష్టమైన బొమ్మ

పగిలినా ముక్కలైనా.. ఇంటిని వెలుగుతో నింపేస్తుంది. 

పాపాయికి ఏం అర్థం అయ్యిందో మరి.. 

 నాకు ఈ వెలుగులే కావాలి కొత్త బొమ్మ వద్దు

అని బొమ్మల బుట్ట ముందు కూర్చుని

బొమ్మరిల్లు కడుతూ వుంది.  

అమ్మ పాపాయి వైపు చూస్తూ ఇంటికి హృదయం లాంటి అద్దం వద్దు.

ముక్కలైన అద్దం సరిపోతుంది అనుకుంది

సాలోచనగా . 

అనాదిగా శపించబడినవి పాపాయిల హృదయాలు 

18/01/2025.  07:07 am