వాట్ నెక్స్ట్ !!?

 What next !!!??

పెళ్ళి సంప్రదాయంగా.. ఆడంబరాలు లేకుండా జరగడం పోయి చాలా ఏళ్ళు అయింది. ఎంగేజ్మెంట్  ఫ్రీ వెడ్డింగ్ షూటింగ్స్ మెహందీ ఫంక్షన్ మంగళ స్నానం పెళ్ళి రిసెప్షన్.. ఇవన్నీ తప్పనిసరిగా ఆడంబరంగా తాహతుకుమించి జరుపుతున్నారు. 

యువతీయువకులు కూడా కష్టపడి పెళ్ళి ఆడంబరంగా జరుపుకోవడం కోసం డబ్బు దాచుకుంటున్నారు. చాలకపోతే క్రెడిట్ కార్డ్ లు. తల్లిదండ్రులు కూడా ఇరుగుపొరుగు వారిని బంధువులను చూసి తమ తాహతుని మించి ఆడంబరంబంగా పెళ్ళి జరిపిస్తున్నారు. తల్లిదండ్రులకు స్థోమత లేకపోయినా పిల్లల గొంతెమ్మ కోర్కెలకు తలవొంచక తప్పడంలేదు. 

ఇంతా చేసాక ఆ పెళ్ళి వలన పిల్లలు ఆనందంగా వుంటున్నారా లేదా అని తరచి చూసుకోవాల్సిన పరిస్థితి. వారానికి సంవత్సరం లోపు విడాకులకు వెళ్ళిన ఉదంతాలు యెన్నో. ఉన్న డబ్బు ఖర్చు పెట్టేసి.. పైగా అప్పులు అయ్యి విడాకులు పుచ్చుకున్న బిడ్జలను చూసి ఏడ్చుకునేది ఎందరో. 

మా ఫెండ్ వొకరు కూతురు పెళ్ళి చేసింది. అమ్మాయి అబ్బాయి ఆరు నెలలు సహవాసం చేసి వొకరికి వొకరు నచ్చి అన్ని లెక్కలు వేసుకున్నాకనే భారీగా పెళ్ళి జరిపించుకున్నారు. పది రోజుల తర్వాత విడాకులకు వెళ్లారు. తల్లుల మధ్య భేదాభిప్రాయాలంట. మా అమ్మ కరెక్ట్ అంటే మా అమ్మ కరెక్ట్ అని. విడాకులన్నాక వియ్యపురాళ్ళిద్దరూ సారీ చెప్పుకుని సర్దుకుంటాం అన్నా కూడా పిల్లలు వొప్పుకోలేదు అంట. అసలు స్వరూపాలు తెలిసాయి. ఇక మనకు కుదరదు లే అన్నారంట. విడాకులు అయ్యాయి. 

మా ఫ్రెండ్ వొకటే ఏడుపు. ఉన్న సొమ్మంతా అయిపోయింది. పట్టు చీరలు ఆల్బమ్ లు చూసుకుని ఏడ్వడం  అప్పులు తప్ప ఏమీ మిగలలేదు అని. 

మళ్ళీ తనే అంది. “సహజీవనాలు” అంటున్నారు గా. అదేదో చేసుకుంటే కన్నవాళ్ళ కు ఈ బాధలు తప్పుతాయి.. అని. 

అప్పుడు నా మనసులో మెదిలిన ఆలోచనలు ఇలా.. 

అది మాత్రం తప్పు ఏం వుంది లే ? తప్పు అనే భావన కల్గితే మరీ అంత ఫాస్ట్ యుగంలో మనం జీవించడం ఎందుకులే అనుకుంటే.. సింపుల్ గా పదిమంది దగ్గర వారందరి మధ్య రిజిస్టర్ మ్యారేజ్ చేసుకుని చిన్న టీ పార్టీతో పెళ్ళి తంతును ముగించుకుని భవిష్యత్ అవసరాలకు డబ్బు ఉపయోగించుకుంటే మంచిది. 

బంధువుల కోసం స్టేటస్ ల కోసం ఉన్నదంతా ఊడ్చి చేసే పెళ్ళిళ్ళు పిల్లలకేమో గానీ పెద్దలకు మానసిక వేదనే! 

ఇంకొక విషయం ఏమంటే.. కన్యాశుల్కం కాలం నాటి నుండి వరకట్నం లోకి మారాం. వరకట్నం లో నుండి కులాంతర మతాంతర ప్రేమ వివాహాలను ఆమోదించడం ఆడంబరాలు ప్రదర్శించడంలో మెడకు ఉరితాళ్ళు తగిలించుకోవడం పెళ్ళి సక్సెస్ అవుతుందా లేదా అన్న టెన్షన్ ల మధ్య బ్రతకడం వరకూ వచ్చాం కాబట్టి.. 

సహజీవనం అంటే కూడా ఉల్కి పడకుండా.. ఆమోదించడం కి అలవాటు కావాలి. ఎలాగూ వచ్చే దశాబ్దాల్లో చట్టబద్దమైన వివాహం కన్నా సహజీవనాలే ఎక్కువ అయ్యేటట్టు వున్నాయి. అనిపిస్తుంది.

ఇంకో తరహా వాళ్ళ గురించి.. ఇది విదేశాల్లో వున్న వారి గురించి.. మాత్రమే!

ముఖ్యంగా అమ్మాయిల గురించి.. 

చాలామంది అమ్మాయిలు అన్నింటిలోనూ అన్ని జాగ్రత్తలు తీసుకుని ప్రేమ పెళ్ళి విషయంలో తప్పటడుగలు వేయడం పరిపాటి అయిపోయింది. ఒకసారి దెబ్బతిన్నాక కానీ వాస్తవం లోకి రాలేకపోతున్నారు. 

నా పరిచితుల్లో అమ్మాయిలు ఇలా వున్నారు. (30-30+ లు అంతా)

సహజీవనం వద్దు.. అందులో చాలా రిస్క్ లు వున్నాయి. 

అమ్మ నాన్న కుదిర్చే సంబంధం వద్దు. జాతకాలు ఆస్తులు అంతస్తులు చూస్తారు. అది మరీ నరకం.

పోనీ మనమే యెన్నుకుందాం.. నాకు నచ్చితే వాళ్ళకు నేను నచ్చడం లేదు. మరి ఏం చేయాలి?

అతని లాగే తనకూ H1-B వుంది. అయినా కట్నం యెంత యిస్తారు? ఇన్నేళ్ళు సంపాదించిన డబ్బు ఏం చేసావ్ అని అడుగుతారేంటి? అని పెళ్ళి వద్దు ఒంటరి జీవితం మంచిది అనుకున్నట్టు వుంటున్నారు. 

ఇకపోతే అబ్బాయిలు.. ఇలా.. 

పెళ్లికి డైమండ్ నగలు పెట్టాలంట. వాళ్ళ సంపాదన వాళ్ళ ఇష్టం అంట. 

 పెళ్ళవగానే సింగిల్ హోమ్ పడవ లాంటి కారు,ఫ్యామిలీ ఇన్సూరెన్స్, పిల్లలు ఇవన్నీ మగవాడికే పరిమితమైన భాద్యతలు. 

స్వదేశంలో తల్లితండ్రులుతో పాటు మరికొన్ని భాద్యతలుంటాయి. అవి ఇవి కావాలంటే ఇవ్వన్నీ మన వల్ల కాదు. బ్యాచులర్ లైఫ్ హాయి. అనుకుంటున్నారు. 

అందుకే ఈ కాలం అమ్మాయిలు చాలా జాగ్రత్తలు తీసుకుంటున్నారు. అమ్మాయిలకు కానివ్వండి అబ్బాయిలకు కానివ్వండి.. ఇద్దరికీ భాధ్యతలుంటాయి. పైగా ఉద్యోగ భద్రత కూడా అంతంత మాత్రం. ఎవరూ దేనికీ సర్దుకోరు.. మరి అలాంటపుడు సహజీవనాలు చొచ్చుకుని రావడంలో ఆశ్చర్యం ఏముంది?

పెళ్ళి లో సామరస్యం కుదరడం లేదు.  సహజీవనం లో కూడా  అనేక సమస్యలు ఉత్పన్నం. 

ఇంకొకటి తప్పక జోడించాలి. సహజీవనం తర్వాత వివాహం బాగానే వుంటుంది. వివాహం తర్వాత సహజీవనం గురించి ఆలోచించాలి అనుకున్నప్పుడు విడాకులు పిల్లలు ఈ రెండు విషయాలు గురించి బాగా ఆలోచించాలి.