సంతృప్తి జీవితానికి ముడి సరుకు

 

కొందరు తమకు ఉన్నదాంతో లభించిన వాటితో సంతృప్తి పడరు. నిత్యజీవీతావసరాలకు సరిపడ సంపాదిస్తున్నప్పుడు దానిని ఎలా ఖర్చు పెట్టాలో ఏం చేయాలో ఏం చేయకూడదో అనే ప్లానింగ్ లేకుండా నడుచుకోవడం వల్ల నిద్ర లేవగానే .. ప్రతిరోజూ రూపాయి కోసం వెతుక్కోవడమే! సంపాదనలో కొంత భాగం కొత్త వ్యాపారాలకు పెట్టుబడి పెట్టడం.. అందులో విజయవంతం కాకపోతే నిరాశలో కృంగిపోవడం. పెద్ద పెద్ద లక్ష్యాలు వున్నప్పుడు ఓపిక అవసరం. డబ్బులు లేక ఓపిక సహనం లేక ఎవరినో వొకరిని నిందించడం “నువ్వు అప్పుడు అలా చేసావు కాబట్టే నేనిలా వున్నాను” అనడం అనుకోవడం ఇతరులను blame చేయడం మంచి పద్దతి కాదు. నిర్ణయాలు తీసుకోవడంలో జాప్యం నిర్లక్ష్యం అతి విశ్వాసం తో పాటు పరిస్ధితులు సహకరించకపోవడం వుంటుంది. వాటిని తట్టుకోగల్గే సామర్ధ్యం లేనప్పుడు.. జీవితంతో ప్రయోగం చేయకూడదు. ఉన్నవాటితో లభించినదానితో 

ప్లానింగ్ చేసుకుని సౌకర్యంగా బతకడం అలవాటు చేసుకోవాలి. 

రెండు నిమిషాలు తల్లిదండ్రులు చెప్పే అనుభవపూర్వకమైన మాటలు సలహాలు వినిపించుకోని వాళ్ళు…. ఫ్రెండ్స్ అని చెప్పుకునే వాళ్ళతో గంటలు తరబడి మాటలతో కాలాన్ని వృధా చేస్తారు. 

కొందరు మెగుడూ పెళ్ళాం బాగానే వుంటారు ఒకరు గీచిన గీత మరొకరు దాటకుండా. మధ్యలో వెర్రివాళ్ళు కన్న తల్లిదండ్రులు. వారిని తమ జీవితాల్లో వచ్చే ప్రతి సమస్య కి కారకులను చేయడం పరిపాటి అయిపోతుంది. 

జన్మ ఇచ్చినందుకు ఇప్పటిదాకా ఎన్నో ఇచ్చి ఖాళీ అయిపోయి  రిక్త హస్తాలతో నిలబడి ఇంకా ఏమి ఇవ్వాలో అర్దం కాని నిస్సహాయతలో..  కన్నీరు కార్చే తల్లిదండ్రులున్న లోకం ఇది. 

మనిషి అంటే అనంతమైన కోర్కెలు కాదు. విఫలమైన ఆశలు అపజయాలు నిరాశ నిసృహలు కూడా! అన్నీ కలిపితే జీవితం. 

నెలవారీ సంపాదనలో నుండి కుటుంబ అవసరాలు తీరకముందే వాటిని వాయిదా వేసి ఆ డబ్బుతో బిట్ కాయిన్స్ కొనేవాడు షేర్ మార్కెట్  లో  పెట్టుబడి పెట్టేవాడు లాటరీ టికెట్ కొనేవాడు వొకటే నా దృష్టిలో.

అత్యవసర పరిస్థితుల్లో మాత్రమే అప్పు చేయాలనే మాట మరిచి.. లగ్జరీ గా బతకడానికి అప్పు చేసేవాళ్ళకు జీవితంలో సుఖం శాంతి రెండూ శూన్యం..

ఆఖరిగా చెప్పొచ్చే మాట.. 

తల్లిదండ్రులు... తమ జీవితకాలం పెట్టుకునే భ్రమలు పిల్లలు.  physically mentally emotionally... అయినా తల్లిదండ్రులకు బుద్ధి రాదు. బిడ్డలకు మనసూ వుండదు. తొక్కేసుకుంటూ వెళ్ళిపోతారు అంతే! అయినా వాళ్ళకు శాంతి సంతృప్తి వుండదు. 

సంతృప్తి జీవితానికి ముడి సరుకు.