ఊరు పిలుస్తోంది

 

దూరంగా ఊరు పిలుస్తోంది 

రా రమ్మని పిలుస్తోంది 

ఆకుపచ్చని స్వాగత గీతంతో ఎదురొస్తుంది 

అలికిన మనసుపై ఆత్మీయత ముగ్గు వేసి 

చేతులు బారచాచుతూ లోనికి ఆహ్వానం పలుకుతోంది 

బంతి చామంతి దారుల మధ్య నడుస్తుండగానే

నులివెచ్చని గుమ్మపాలు చెంబుతో ఎదురొచ్చింది. 

ఇంకో చెంబుతో కాళ్ళు కడుక్కోవడానికి నీరు వచ్చింది.

 కుశలప్రశ్నలు అడుగుతూనే  గోరువెచ్చని ఎండకి 

ఒళ్ళు వెచ్చబెట్టుకోమని నులకమంచమేసింది. 

చుట్టమొచ్చిన వాసన కమ్మి ఇరుగుపొరుగొచ్చి

పలకరింపుల దడి కట్టారు. 

పదుంపుల్లతో పళ్ళు తోమి పొంతపొయ్యి నీళ్ళతో తానమాడి 

ఆవిరిగ్రక్కుతున్న కాఫీ చప్పరిస్తూ.. వుంటే.. 

ఈ గాలి ఈ వేళ ఈ ఊరు సెలయేరు 

నను గన్న నా వాళ్ళు.. నా కళ్ళ లోగిళ్ళూ… 

ఊరికి పోవాలనిపిస్తుంది. 

జ్ఞాపకాల నెగడు రగులుతోంది.