ఊటల జలధి

 ఊటల జలధి -వనజ తాతినేని

నడివీధిలో ఒంటరి చందమామని చూసి

అప్రయత్నంగా ఆగి... 

అందరూ నిన్ను వదిలేసి వెళ్ళిపోయారా?. 

నువ్వు నాలాగే ఒంటరిగా ఊరేగుతున్నావ్ 

రా! ఇలా కాసేపు కూర్చుందాం.

పాత కాలం నాటి కబుర్లు చెప్పుకుందాం.

ఎందుకో రగిలిపోతున్నావ్ స్వభావానికి విరుద్ధంగా. 

కమలం చందనం కలిపి  కలపంలో నూరి తెచ్చాను.

కాస్త పూసుకుందువుగాని  రా! 

రాలుతున్న రేలపూలు కూడా ఏవో ఊసులు చెబుతాయట. 

చెరొక చెవిని వేసుకుందాం సరేనా! 

నడిరాత్రి కూడా ఈ సెలయేటి గలగలలు వింటూ 

కొన్ని సీతాకోకచిలుకలు బుల్ బుల్ పిట్టలు కూడా 

రెక్కలు విప్పుకుని నాట్యం చేస్తున్నాయి. 

ఉండి ఉండి చిమటలు కూడా  అరుస్తున్నాయి 

అటువైపు రాలుతున్న చినుకుల శబ్దాన్ని మింగిన

గాలి కూడా కరతాళ నృత్యం చేస్తోంది.  

ఇది విన్నావా? 

మా ఆశా దీది వెళ్ళిపోయింది. స్వరామృతాన్ని  

మనుష్య లోకం పైకి విరజిమ్మి.. అందుకోగల్లిన వాళ్ళు 

అందుకోమని నవ్వుతూ వెళ్ళిపోయింది. 

ఎన్ని హృదయాలు స్వార్థంతో కన్నీళ్ళతో ప్రార్ధించాయో 

వెళ్ళొద్దు వెళ్ళొద్దు అని.

 

రోజుకోసారైనా ఓ సాతిరే.. అని ఆర్తితో పాడుకునే  నేను.. 

ఇప్పుడు పూటకు పదిసార్లు వింటున్నా తనివితీరడం లేదు. 

నా నిద్ర పట్టని రాత్రులను ఎవరికి త్యాగం చేయాలో తెలియడం లేదు. 

ఏంటీ.. నువ్వు కూడా పాట కోసం వెతుక్కుంటున్నావా? 

పాటల పెట్టె తాళం తీసాను. సరే,

ఏం పాట వినాలని వుంది చెప్పు? 

ఏ క్యా జగహ్ హై దోస్తోన్, యే కౌన్ సా దయార్ హై

ఏంటీ!!? ఈ పాటా? 

చంపేసావ్ పో చంద్రమా! 

ఇప్పుడు నా ఏడుపులో ఇంకో ఏడుపు కూడా జత చేసావు.

నేనిప్పుడు ఉమ్రావ్ జాన్ గురించి మాత్రమే కాకుండా

రేఖ గురించి కూడా ఏడుస్తాను. 

నీ గురించి నా గురించి కూడా ఏడుస్తాను. 

ఈ దుఃఖాన్ని పంచుకోవడానికే కదూ.. 

రోడ్డున పడి తిరుగుతున్నావ్. 

నేను నీకూ, నీకు నేనూ దొరికాం. 

ఈ దుఃఖం ఆశా జీ ఇచ్చి వెళ్ళిన సౌగత్ (saugat) కదా! 

ఆనందంగా స్వీకరిద్దాం. సరేనా! 

తీపి చేదు కలగలిపి రుచి చూసినట్లు

హంసధ్వని రాగ్ భూపాలి కలిసి వింటున్నట్టు వుంది.

తొలి కోడి కూస్తుంది.వెళ్ళి రా! మళ్ళీ రాత్రికి కూడా వస్తావుగా! 

కావ్య రసాన్నో సంగీత రసాన్నో ఒంటిగా ఆస్వాదించలేము.

ఆనందం లాగానే విషాదాన్ని రోజుకొకమారైనా

కలిసి అనుభవంలోకి.. తెచ్చుకుందాం.

ఊటల జలధిలో మునిగి తేలుదాం, సరేనా! 

**********************

18 April 2026. 09:30 am.

12 April 2026 న ప్రముఖ హిందీ గాయని ఆశా బోస్లే మరణించారు. ఆమెకు నివాళిగా ఈ కవిత రాసాను. 26 April 2026 న “ది ఫెడరల్ తెలంగాణ డాట్ కామ్” వారు ఈ కవిత ను ఫ్రచురించారు. 

నా YouTube Channel లో ఈ కవితను వినిపించాను. వింటారు కదూ! 

ఊటల జలధి  వినండీ 

The Lotus

 

‘ది లోటస్' (తామర పువ్వు) గీతాంజలిలో 20 వ పద్యం. చాలా కాలం క్రింద చలం గారి అనువాదంలో చదివినప్పుడు నాకు సామాన్యంగానే అర్దమైంది.  ఇటీవల రవీంద్రనాథ్ ఠాగూర్ కవిత్వం చదువుతూ  మరొకసారి The Lotus ని చదివినప్పుడు సరికొత్తగా అర్ధం అయ్యింది. ఈ కవితలోని తామరపువ్వు, కవి మనస్సులో  రేగిన ఆధ్యాత్మిక భావన. ఆధ్యాత్మికతలో పద్మం అనేది అత్యంత ముఖ్యమైన యోగ చక్రమైన సహస్రారం పేరు. ఈ చక్రం క్రియాశీలమైనప్పుడు, ఒకరు సంపూర్ణ జ్ఞానోదయం మరియు ఆత్మసాక్షాత్కారం పొందుతారని నమ్ముతారు. హిందువులకే కాదు బౌద్దంలో కూడా ఎనిమిది రేకుల పద్మం జ్ఞానానికి ప్రతీక అంటూంటారు కదా! 

ఇక పద్యం వివరణ లోకి వస్తే…

మన సాధారణ యాంత్రిక జీవనంలో లేదా అనేక చింతల మధ్య పరధ్యానం మధ్య మనకు నిజంగా కావాల్సినది ఏమిటో తెలియదు. తెలిసినా మనం పెద్దగా ప్రాముఖ్యత ఇవ్వం. అది జ్ఞానం కావచ్చు ఆధ్యాత్మిక జ్ఞానం కావచ్చు, శాంతి కావచ్చు, ప్రేమ కావచ్చు. మనం చాలా ఖాళీగా (emptyగా) వుంటాం. కానీ మన చుట్టూనే వుంటూ వచ్చిన మనకి లభ్యం అవుతున్న వాటి పట్ల ఒక విధమైన నిర్లక్ష్యంతో వుంటాం. తర్వాత ఎప్పుడో గ్రహింపుకు వస్తుంది. మనకు సమీపంలో వున్నా మనం అప్పుడు గుర్తించని విషయం. అచ్చం అలాంటి విషయాన్నే మనకు బోధిస్తుంది ఈ పద్యం. అశాశ్వతమైన జీవితం మానవ స్వభావం నిర్లక్ష్యం  గురించి ఈ పద్యం లోతుగా విడమర్చి చెబుతుంది.    

మనకు జీవితం అందించే కానుకలను వాటి సంపూర్ణతను గుర్తించడంలో విఫలమైనప్పుడు కలిగే తీవ్రమైన విచారాన్ని వ్యక్తం చేస్తూ, కోల్పోయిన అవకాశాలకు మరియు నెరవేరని ఆశలకు ప్రతీకగా కవి ఒక ఖాళీ బుట్ట ను ఉదహరిస్తారు

తామర పువ్వు స్వచ్ఛతకు సౌందర్యానికి ఆధ్యాత్మిక జ్ఞానానికి చిహ్నం. తామర పువ్వు వికసించడాన్ని, తన చంచలమైన మనస్సు కారణంగా గమనించలేకపోయిన వ్యక్తిని (కవి) ఈ పద్యం వర్ణిస్తుంది.నాలుగు చరణాలు గల ఈ పద్యాన్ని లోతుగా అర్ధం చేసుకోకపోయినా పైపైన చదివినా అర్ధవంతమైనదే! నిజానికి ఈ పద్యం ఒక ఆధ్యాత్మిక పద్యం.తాను వెతుకుతున్న నిజమైన సౌందర్యమో జ్ఞానమో శాంతి లేదా ప్రేమో అది  తన హృదయంలోనే వుందని అది తామర పువ్వులా తనలోనే  వికసిస్తోందని పద్యంలో అతను తరువాత గ్రహిస్తాడు.(కవి)

ఈ సత్యం అర్థమైన మానవుడు మంచుకొండల్లో ఇల్లు వాకిలి లేకుండా ఏ బంధాలు లేకుండా ఆకలి ఎరుగకుండా శ్వాసను కూడా బంధించి ఆధ్యాత్మిక ధ్యానంలో ఆనందంగా జీవిస్తాడు.(యోగులు సిద్ధులు సాధువులు మొదలగువారు) అర్థం కాని వాళ్ళు ఐశ్వర్యంలో మునిగి తేలుతున్నా సరే అన్నీ వున్నా సరే ఇంకా ఏవేవో కోరుకుంటూ విచారంతో జీవితాన్ని ఈడ్చుకుంటూ సాగుతుంటారు. నాకు వయస్సు పెరుగుతున్న కొద్దీ కవిత్వం కూడా బాగా అర్ధం అవుతుంది. జ్ఞానానికి తలుపులు కిటికీలు ఇప్పుడే తెరుచుకున్నట్టు.  నిజంగా మనకు కావాల్సింది మనలోనే వుంది. బయట యెక్కడో లేదు. ఠాగూర్ లో  నాకు ఇష్ట కవి రచయిత నవలాకారుడు చిత్రకారుడు స్వరకర్త గాయకుడు ఉపాధ్యాయుడు ..  అన్నీ కలిసి ఓ స్ఫూర్తి ప్రదాత వుంటారు. తెలుగు అనువాదంలో లభించిన సాహిత్యం అంతా దాదాపుగా చదివాను. మళ్ళీ చదివినప్పుడల్లా కొత్తగా వుంటుంది.. ముఖ్యంగా గీతాంజలి. నాలుగురోజుల క్రితం  "The Homecoming" కథ చదివి ఏడ్చాను కూడా. ఠాగూర్ లో కరుణ రసం ఎక్కువ ఇష్టం. మానవుడు ప్రకృతి దేవుడు మధ్య  మనిషి ని బహు సున్నితంగా చిత్రించాడు ఆయన. బహుశా.. ఆ సున్నితత్వం నా కళ్ళకు మెదడుకు సంకెళ్ళు వేసి పదే పదే చదివిస్తుంది. గురుదేవ్ కి 🙏. 

The lotus - తామర పువ్వు

తామర పువ్వు వికసించిన ఆ రోజున, 

అయ్యో! నా మనసు ఎటో వెళ్ళిపోతుందని నాకు తెలియలేదు. 

నా బుట్ట ఖాళీగా ఉంది, అయినా..

ఆ పువ్వు నా కంట పడకుండానే ఉండిపోయింది.

అప్పుడప్పుడు మాత్రమే నాపై ఒక విచారం ఆవరించింది, 

నేను నా కల నుండి ఉలిక్కిపడి లేచి, దక్షిణపు గాలిలో ఒక వింత సువాసన యొక్క మధురమైన జాడను అనుభూతి చెందాను.

ఆ అస్పష్టమైన మాధుర్యం నా హృదయాన్ని ఒక తపనతో బాధపెట్టింది,

అది తన పరిపూర్ణత కోసం ఎదురుచూస్తున్న వేసవి యొక్క ఆత్రుతతో కూడిన శ్వాస అని నాకు అనిపించింది. 

అది అంత దగ్గరగా ఉందని, అది నాదేనని, మరియు ఈ పరిపూర్ణమైన మాధుర్యం నా  హృదయాంతరాలలో వికసించిందని అప్పుడు నాకు తెలియదు. 

The Lotus   - Rabindranath Tagore.

On the day when the lotus bloomed, alas, my mind was straying, and I knew it not. My basket was empty and the flower remained unheeded. Only now and again a sadness fell upon me, and I started up from my dream and felt a sweet trace of a strange fragrance in the south wind. That vague sweetness made my heart ache with longing and it seemed to me that is was the eager breath of the summer seeking for its completion. I knew not then that it was so near, that it was mine, and that this perfect sweetness had blossomed in the depth of my own heart.

అంతులేని ప్రేమ

 అంతులేని ప్రేమ   - రవీంద్రనాథ్ ఠాగూర్  Unending Love

నేను నిన్ను లెక్కలేనన్ని రూపాల్లో, లెక్కలేనన్ని సార్లు ప్రేమించినట్లుంది...
జన్మ జన్మల్లో, యుగయుగాల్లో, శాశ్వతంగా.
మాయలో పడిన నా హృదయం పాటల హారాన్ని అల్లింది, మళ్ళీ అల్లింది.
దాన్ని నువ్వు ఒక కానుకగా తీసుకుని, నీ అనేక రూపాల్లో మెడలో ధరించుకుంటావు,
జన్మ జన్మల్లో, యుగయుగాల్లో, శాశ్వతంగా.

నేను పాత ప్రేమ గాథలు విన్నప్పుడల్లా, అది యుగాల నాటి వేదన,
అది కలిసి ఉండటానికో లేదా విడిపోవడానికో సంబంధించిన పురాతన గాథ.
నేను గతాన్ని అలా చూస్తూ ఉండిపోతుండగా, చివరికి నువ్వు ఉద్భవిస్తావు,
కాలపు చీకటిని చీల్చే ధ్రువ నక్షత్రపు కాంతిలో:
నువ్వు శాశ్వతంగా గుర్తుండిపోయే ఒక ప్రతిబింబంగా మారతావు.

నువ్వు నేను, ఊట నుండి ప్రవహించే ఈ సెలయేటిపై ఇక్కడ తేలియాడాం.
కాలపు హృదయంలో, ఒకరిపై ఒకరికి ఉన్న ప్రేమ.
మనం లక్షలాది ప్రేమికులతో కలిసి ఆడుకున్నాం, కలిసినప్పుడు ఉండే అదే
సిగ్గుతో కూడిన మాధుర్యాన్ని, వీడ్కోలు పలికేటప్పుడు ఉండే అదే బాధాకరమైన కన్నీళ్లను పంచుకున్నాం.
- పాత ప్రేమే అయినా, ఎప్పటికీ కొత్త కొత్త రూపాల్లో.

ఈనాడు అది నీ పాదాల చెంత పోగుపడింది, నీలోనే దాని అంతాన్ని కనుగొంది.
గడిచిపోయిన, శాశ్వతమైన సమస్త మానవాళి దినాల ప్రేమ:
సార్వత్రిక ఆనందం, సార్వత్రిక దుఃఖం, సార్వత్రిక జీవం.
సమస్త ప్రేమల స్మృతులు మన ఈ ఒక్క ప్రేమతో విలీనమవుతున్నాయి –
మరియు గడిచిపోయిన, శాశ్వతమైన ప్రతి కవి గీతాలు. 

రాలు పూల రాగం

 

రాలు పూల రాగం  - వనజ తాతినేని

నిండా విరిసిన పూల తరువును చూసి నా ఆశ్చర్యం రెక్కలు తొడుక్కుని పరుగులు తీస్తుంది. 

నా ఆనందం లెక్కలేనన్ని పూలలోని మకరందం వలె తూగుతుంది. 

కన్నులు జీర్ణించుకోలేని సౌందర్యం ముందు 

నా మనసు మోకరిల్లుతుంది 

చిన్నప్పుడెప్పుడో విన్న జావళి పెదాలపై గంతులేస్తూ పువ్వుల మూగ రహస్యాన్ని విప్పేస్తుంది 

 పూలను కోయని నాకు ప్రేమతో చెట్టు నాలుగుపూలను రాల్చి కానుక చేస్తుంది. 

అల్ప సంతోషంతో అడుగులు వేస్తాను అనంత సౌందర్యాన్ని విడిచి. 

ధూళి పై అడుగుల ముద్ర పడినట్లు వసంతం నా లోపల గాఢమైన ముద్ర వేసింది.

01 May 2026. 07:25 am 

Mera kuch saaman

 ఇజాజత్ సినిమా ఇటీవల తెరపైకి వచ్చింది. ఈ చిత్రం సుబోద్ ఘోష్ రచించిన “జాతుగృహ” అనే బెంగాలీ నవల ఆధారంగా తెరకెక్కింది. గుల్జార్ దర్శకత్వంలో వచ్చిన సున్నితమైన ముక్కోణపు ప్రేమకథ చిత్రం. వర్తమానం ప్లాష్ బ్యాక్ ల మధ్య సినిమా నడుస్తుంది. 

సంగీతం లో రెండు జాతీయ అవార్డులు గెలుచుకున్న చిత్రం ఇది. ఆశా బోస్లే యొక్క ఆత్మను కదిలించే స్వరం “మేరా కుచ్ సామాన్” కి జాతీయ చలనచిత్ర పురస్కారం లభించింది. ఉత్తమ సాహిత్యం అందించిన గీత రచయిత “గుల్జార్ “ కి మొదటిసారి జాతీయ అవార్డు లభించింది. 

అనూరాధ పటేల్ పై చిత్రీకరించారు. 

ఈ చిత్రంలో నాలుగు పాటలు ఆశాబోస్లే ఆలపించారు. “మేరా కుచ్ సామాన్” పాటకు కోట్లాదిమంది అభిమానులు వున్నారు. మన సమయంలో రెండు గంటల పదిహేడు నిమిషాలు ఈ సినిమా కోసం కేటాయించవచ్చు. రేఖ,నసీరుద్దీన్ షా అనూరాధ పటేల్ నటన బాగుంది. ముఖ్యంగా సుధ పాత్రలో రేఖ నటన మనసుకు హత్తుకుంటుంది. మేరా కుచ్ సామాన్ పాట సాహిత్యం మనసులను పట్టేస్తుంది. స్త్రీలు తమ మనసులో భావాలను బాధను వ్యక్తపరుచుకోవడానికి కవిత్వం ఉపకరిస్తుంది. గుల్జార్ కవిత్వం చాలా చాలా సున్నితమైన భావ ప్రకటన కల్గింది.  ఈ పాట ఆశా బోస్లే పాటల బోషాణంలో అమూల్యమైన నిధి. మెత్తగా మంద్రంగా మనసును కోసేస్తుంది. ఆర్ డి బర్మన్ స్వరాలు వల్ల ఈ పాటకు ప్రాణం పోసింది అంటే అతిశయోక్తి కాదు. పాట వినండీ.. వింటూనే వుంటారు. పాటల పిచ్చి ఎక్కువగా ఉన్న వారిని వదలని పాట ఇది. 116 రాత్రులు పుట్టుమచ్చ, వర్షం, తడి హృదయం, వెన్నెల , గోరింటాకు వాసనలు.. ఇవన్నీ ముడిపడిన ప్రేమ సున్నితమైన  వ్యక్తీకరణ మనసులను కదిలిస్తాయి.. ఇజాజత్  అంటే అనుమతి అని అర్ధం. 

********************

मेरा कुछ सामान, तुम्हारे पास पड़ा है

सावन के कुछ भीगे-भीगे दिन रखे हैं 

और मेरे एक ख़त में लिपटी रात पड़ी है

वो रात बुझा दो, मेरा वो सामान लौटा दो

Some of my things are still lying with you - 

Some drenched monsoon days,

And a night wrapped in my one of my letters

Extinguish that night, and send these things back to me 

నా  వస్తువులు కొన్ని నీ దగ్గర ఉన్నాయి.

కొన్ని వర్షాకాలపు  తడి రోజులు  నీ దగ్గర ఉన్నాయి.

మరియు నా ఉత్తరాలలో ఒకదానిలో చుట్టబడిన ఒక రాత్రి.

ఆ రాత్రిని ఆర్పేసి, నా వస్తువులను తిరిగి ఇచ్చేయ్.

पतझड़ है कुछ, है ना?

पतझड़ में कुछ पत्तों के गिरने की आहट

कानों में एक बार पहन के लौटाई थी

पतझड़ की वोह शाख अभी तक काँप रही है

वो शाख गिरा दो, मेरा वो सामान लौटा दो

Remember, it was autumn....

In autumn, I gave you the sound of falling leaves, 

After trying it on as earrings.

That branch from autumn is still trembling in winds

Make that branch fall, and send these things back to me

శరదృతువు అద్భుతం, కదూ?

శరదృతువులో ఆకులు రాలే శబ్దం

ఒకప్పుడు దాన్ని చెవుల్లో పెట్టుకుని తిరిగి ఇచ్చేశాను.

ఆ శరదృతువు కొమ్మ ఇంకా వణుకుతోంది.

ఆ కొమ్మను కింద పడేయండి, నా వస్తువులు నాకు తిరిగి ఇచ్చేయండి.

एक अकेली छतरी में जब आधे-आधे भीग रहे थे 

आधे सूखे, आधे गीले, सूखा तो मैं ले आई थी

गीला मन शायद बिस्तर के पास पड़ा हो

वो भिजवा दो, मेरा वो सामान लौटा दो

Remember, once when we were both getting drenched, 

since we were sharing one umbrella...

Half the things were drenched. The things that were still dry, I brought with me

But I think I left behind my rain-soaked heart beside the bed

Send that, along with the other things I've left behind.

మనమిద్దరం ఒకే గొడుగు కింద సగం తడిసిపోయినప్పుడు,

సగం పొడి, సగం తడి, నేను పొడి వాటిని తెచ్చాను.

తడి హృదయం మంచం పక్కన పడి ఉండవచ్చు.

దాన్ని పంపండి, నా వస్తువులను తిరిగి ఇవ్వండి.

एक सौ सोलह चाँद की रातें, एक तुम्हारे काँधे का तिल 

गीली मेहँदी की खुशबू, झूठ-मूठ के शिकवे कुछ

झूठ-मूठ के वादे भी सब याद करा दूं

सब भिजवा दो, मेरा वो सामान लौटा दो

One hundred and sixteen nights of the moon, and that one mole on your shoulder

The scent of undried henna, and those moments of mock tantrums

Let me also remind you about all those false promises

Return everything that's mine, but still lying with you

నూట పదహారు వెన్నెల రాత్రులు, నీ భుజం మీద ఒక పుట్టుమచ్చ

తడి గోరింటాకు సువాసన, కొన్ని అబద్ధపు ఫిర్యాదులు

ఆ అబద్ధపు వాగ్దానాలన్నీ కూడా నీకు గుర్తు చేస్తాను

అన్నీ పంపించు, నా వస్తువులు తిరిగి ఇచ్చేయ్

एक इजाज़त दे दो बस, जब इनको दफ़नाऊगी 

मैं भी वहीँ सो जाऊंगी, 

मैं भी वहीँ सो जाऊंगी 

Just grant me this one wish, that when I bury these things,

I will also breathe my last

నాకు అనుమతి ఇవ్వండి, నేను వాళ్ళని పాతిపెట్టినప్పుడు

నేను కూడా అక్కడే పడుకుంటాను,

నేను కూడా అక్కడే పడుకుంటాను

………….(*)……………….

జ్ఞానగుళికలు

 ఈ ఉదయం completely నా మిత్రులకు అంకితం.. ఈ పోస్ట్. ముఖాన తిట్టలేక.. ఇలా! ఈ విషయంతో సంబంధం లేని వారు లైట్ తీసుకోండి. పోనీ చదివారా! ఈ జ్ఞానగుళికల్లో ఏదో మీరూ ఏరుకోవచ్చు. 😊👍

********

ఇతరులు మనకు చేసే హాని కన్నా మనకు మనం చేసుకునే హాని యెక్కువ. 

ఎవరో ఏదో అంటూంటారు అని మానసికంగా ఇబ్బంది పడతుంటారు. 

లేదా ఎదుటి వారు మోసం చేసారని మోసపోయామని బాధపడతారు. 

ఇతరుల తప్పు ఎంతుందో మన తప్పు కూడా కొంత వుండనిదే ఏమీ ఏవీ జరగవు. పోనీ..జరిగినాయా.. తట్టుకోవాలి. చతికిలపడకూడదు.  శక్తి ఉడిగి ముదుసలి అయి పరుగులు తీయలేకపోవచ్చు కానీ నడవగలరు, లేదా ప్రాకగలరు. అంతంత చదువులు చదివి వుంటారు. వేలమందికి బోధించి వుంటారు. చేతిలో యేదో ఒక సృజన వుంటుంది. అయినా.. యేదో కోల్పోయినట్టు వుండటం బాగుండదు. 

జీవితం యేమి నేర్పింది!? మీరు యేమి నేర్చుకున్నారు!? కడుపున పుట్టిన బిడ్డలే ద్రోహం దగా చేస్తున్న కాలంలో కుడి చెయ్యికి యెడమచెయ్యికి ద్రోహం చేస్తున్న కాలంలో 

యెవరో మోసం చేసారనో అవమానించారనో బాధపడటం మన లోపాలను మనమే బయటపడేసుకుంటూ ఆప్తులను దూరం చేసుకోవడం యెందుకు? 

తత్వశాస్త్రం చదవడం మొదలుపెట్టండి. లేదా నాలుగు కథలు చదవండీ. వేటి మీద ఆసక్తి లేకుండా యే పని పై శ్రద్ధ లేకుండా జీవితాల్లో అద్భుతాలు జరగవు. 

ఆలోచనలంత వృధా ప్రయత్నం వేరొకటి లేదు. 77 సంవత్సరాల చంద్రబాబు నాయుడు గారిని చూడండి. ఎలా కష్టపడుతున్నారో! మనం కీ బోర్డ్ పై నాలుగు పేరాలు రాయడానికి బాధపడి పోతాం. అనవసర దుఃఖాలు మోస్తూ.. కాలం బలవంతంగా అరగదీయడం. 

తెలుగు సాహిత్యం అనువాదానికి నోచుకోక ఏడుస్తుంది. ఆంగ్ల సాహిత్యం యూరోపియన్ కవిత్వం అర్థం చేసుకోలేని విద్యార్థులు వున్నారు. ఆన్ లైన్ పాఠాలు చెప్పవచ్చు. పోసుకోలు కబుర్లు అతి తక్కువ జ్ఞానాన్ని మాత్రమే ఇవ్వగలవు. మనుషులు వారి ప్రభావాలు చైతన్యం ఇవ్వాలి. బాధను మిగల్చకూడదు. మనం ఇతరులను బాధ పెట్టకూడదు. ఇతరులకు నువ్వు యేమి ఇచ్చావో అదే వస్తుంది. గుర్తు పెట్టుకోండి. 

నన్ను చూడండి, తెల్లవారుజామున లేచి నాలుగు కథలు చదువుకున్నాను. నా ఆనందం కోసమే! తర్వాత ఇది రాస్తున్నాను. 

ZEE5 లో కొరియన్ సీరీస్ “మదర్” చూడమని చెప్పాను, అన్నా కరెనినా నవల చదవండి. కానీ అన్నా లాగా ఆత్మ హత్య చేసుకోవద్దు అని చెప్పాను. అమృత సంతానం, ఆ వెన్నెల రాత్రులు నవలలు చదవమని చెప్పాను. ఒక్కరు కూడా చదివామని చూసామని చెప్పలేదు. కనీసం ఒక కథ చదవమని సూచిస్తే చదవలేరు. ఒక్క కవిత చదవలేరు. మేం గీసుకున్న గీతల్లోనుండి బయటకు రాలేము. కానీ..

మా జీవితాల్లో అద్భుతాలు మాత్రం జరగాలి అంటారు. 

హే.. పోండి. మీతో స్నేహం చేస్తే.. నా మైండ్ ఖరాబు అవుతుంది. మా ప్రకాశం బ్యారేజ్ వరకూ వెళ్లి కాసిని చిల్లర నాణాలు నదిలో వదిలినట్టు మిమ్మల్ని వొదిలేస్తాను. పీడా పోద్ది. ఎక్కువకాలం toxic people ని నేను మోయలేను. 

కనీసం స్త్రీ మిత్రులు అయినా “దారులేసిన అక్షరాలు“ చదవండి. అది చదివాక కూడా.. మీ ఏడుపుగొట్టు మాటలు చేతలు స్థితి మారకపోతే.. అది మీ ఖర్మ. 

ఎవరూ ఏమీ చేయలేరు. మీ సొద వ్యథ నేనూ వినలేను. నా గుండె కూడా అనేక రకాలు మోయలేకపోతుంది. 

ఎవరికి యెవరు యీ లోకంలో .. 

ఎవరో వస్తారని యేదో చేస్తారని.. 

రెండు పాటలు అయినా వినండీ. 

కనీసం.. మీ ఆలోచనలు అయినా లిపిబద్దం చేయండి. నేనిప్పుడు అదే చేశాను. 

PS: ఈ పోస్ట్ నా దగ్గర మిత్రులను ఉద్దేశించి రాసింది. మీరు లైట్ గా తీసుకోండి. వాళ్ళు సీరియస్ గానే తీసుకుంటారు. నాకు తెలుసు. ఈ మాత్రం dose సరిపోతుందని నేను అనుకుంటున్నాను. 😊👍😘

Phone చేస్తే పీక నొక్కుతా! 😊😘

#వనజతాతినేని

#vanajatatineni

కవితా నివాళి

 ప్రముఖ గాయని   “ ఆశా బోస్లే” జీ కి నివాళిగా ఈ కవిత రాసాను . 

ది ఫెడరల్ తెలంగాణ డాట్ కామ్ వారు ఈ రోజు కవిత గా ప్రచురించారు. 

ఈ లింక్ లో     ఊటల జలధి. కవిత ను చదవండి.., 

మీ స్పందన తెలియజేయండి ప్లీజ్! 

చిత్తం ఒకటే రూపాలు అనేకం

 చిత్తం ఒకటే! రూపాలు అనేకం                                 

                                   -వనజ తాతినేని

మీది పరగడుపు ఆకలి కాదు 

రుచులు కోసం వెంపర్లాడే ఆకలి

మీ ఆకలి తీర్చడానికి కొన్ని తడవలు మేము  

వేశ్యలం అయితే  వచ్చిన నష్టం ఏమీ లేదు కానీ.. 

సూటి ప్రశ్న ఒకటి. 

వేశ్యలకు మనసు వుండదా? నిజం చెప్పండి! 

ఒక వేశ్య కు మనసు ఇవ్వడం చాతవునా మీకు?

దైర్యం వుందా మీకు? మీ గౌరవాలను పణంగా పెట్టగలరా! 

ఆమెతో జన్మాంతం జీవించగలరా? 

మీదైనదేది యేది ఒదులుకోను ఇచ్చగించరు

భద్రజీవితంలో మిమ్మల్ని మీరు ఇముడ్చుకుని 

ఒంకర మనసుతో పక్క చూపులు చూస్తారు.. 

ఎర గా ఏం వేయాలో మీకు బాగా తెలుసు

మీ నైపుణ్యానికి వలలో పడని చేపలు చాలా. 

ఆ పడని చేపలను మీ ఉక్రోషపు మాటల్లో రాతల్లో

వేశ్యలగా సమర్థవంతంగా చిత్రీకరిస్తారు.  

అలవాటుగా మీ బహు ప్రియా లోలత్వం నిత్యం

సంక్షిప్త సందేశాల సేవలతో వర్ధిల్లుతుంది 

మీరూ మీ రంగు జుట్టూ కాట్లో తగలబడే దాకా 

అయినా.. మీ  కృష్ణావతారానికి సోషల్ మీడియాలో కనబడే 

స్త్రీలందరూ రాధలా గోపికల్లా కనబడతారేమో!

ప్రతి రాత్రి వారి దేహాలకు భార్య ముఖాన్ని అతికించుకుని 

రోజుకొక రకంగా మానసిక వ్యభిచారం చేస్తారేమో కదా! 

చిత్తం ఒకటే! రూపాలు అనేకం, 

మీరు  అనుకున్నంత అమాయకంగా 

ఎవరో అరుదుగా వుంటూంటారు. 

మాలో చాలా మందికి లోకాన్ని చూసిన అనుభవం 

జాగురుకత  వుందని మర్చిపోకండి.తాడే పామై కాటేస్తుందని 

మరువకండి.

ఇందిరా గోస్వామి కలం కత్తి ఝళిపించిన విషాద కామరూప లో 

బృందావనమనే వధ్య శాల గురించిన 

వాస్తవిక సృహ మాకూ  వుందనే సంగతి మర్చిపోకండి. 

శరీరాలను పీక్కుతినడానికి వ్యాపారం చేయడానికి 

ఆకలితో అలమటించే మహిళలే కావాలన్న సత్యాన్ని 

మేడిపండు సమాజాన్ని పొట్ట విప్పి  ప్రపంచానికి  

చూపించిన అలెగ్జాండర్ కుప్రీన్ యమా ది పిట్  

సంగతి మర్చిపోకండి. 

మాలో కూడా మీలాంటి కామరూపాలను సర్కస్ లో

కోతిని చేసి ఆడించడం తెలిసిన వారు వుంటారు 

కుక్క కాటుకు చెప్పు దెబ్బ లాగా 

మీ సర్వాధికారాలను చేజార్చి మిమ్మల్ని బానిసలుగా మార్చి 

మీ చేజేతులా భార్యని చంపించే, బిడ్డలను దూరం చేసే 

దుర్మార్గ స్త్రీలు వుంటారు జాగ్రత్త! 

మీ భాషలోనే చెబుతున్నాం వినండి గోముఖ వ్యాఘ్రాల్లారా! 

ఎదురైన ప్రతి స్త్రీని కెలక్కండి. కావాలంటే కొనుక్కోండి. 

దేహాలు వస్తువులే కదా! స్త్రీలు మాత్రమే వేశ్యలు కదా! 

పతితుల పావనోద్దరణకు పురుషులు నడుంబిగించారా?

దేహ రాజకీయాల్లో పురుషుడికి మాత్రమే ఉంటాయ్

వ్యక్తిగత అవయవాలు. స్త్రీల కి మాత్రం ఉండవు. బహుశా

మీ దృష్టిలో మీ కుటుంబ స్త్రీలవి మినహా మిగతా వాళ్ళందరివి

సమాజంలో పురుషజాతి కంతటికీ చెందినవి అవి. 

స్త్రీలను అవయవాల లెక్కలతోనో  దేహం ఒంపులతోనో .

మీ దృక్కోణంతోనో  కాదు చూడాల్సింది. హృదయంతో చూసి 

మనిషిగా గౌరవించండి. మీతో సమానంగా నడవనీయండి. 

సమానంగా సమాజంగా నడవనీయండి. 

******************** 

(2026 April కొలిమి వెబ్ మాసపత్రికలో.. ప్రచురితం)