వీడియో సాహిత్యం

 ఇటీవల రెండు స్వీయ కవితలు, ఒక స్కెచ్ వీడియోగా రూపొందించాను. మీకు ఆసక్తి వున్నట్లైతే చూడండి ప్లీజ్! 

పాపాయి మనస్సు వీడియో కవిత

 నేను రాసిన “పాపాయి మనస్సు “ కవిత ను వీడియో ముఖంగా చదివి వినిపించాను. ఎప్పడో పదిహేనేళ్ళ క్రితం బ్లాగ్ తో మొదలుపెట్టి ఇలా వీడియో లో  స్వీయ కవితలు కథలు వినిపించడం మొదలెట్టాను. ఈ వీడియో చూసేయండి. ధన్యవాదాలు 🙏 

వీక్షించండి. .. 

వాగ్ధానం

 నాశనం చేసినదాన్ని చూసి దుఃఖించడానికి కాదు 

ఎలా నాశనం అయ్యిందో పరిశీలించడానికి కాదు

నీ పురాతన ఆత్మ అక్కడ సంచరిస్తున్న 

ఆనవాళ్ళు కూడా వున్నాయనే ఎరుక తో వచ్చాను. 

ఈ పరిసరాల్లో ఈ ప్రకృతి లో ఆ సూర్యోదయాల్లో 

ఆ గాలిలో ఆ పువ్వుల్లో  తెరవబడక బావురుమంటున్న  పుస్తకాల్లో 

మనసు చిలికిన ఆ కవిత్వంలో  వానకు తడిసి పరిమళాలు వెదజల్లుతూన్న మట్టిలో.. 

ఏవో నిశ్శబ్ద వర్ణ చిత్రాల గుసగుసల్లో నువ్వు జీవిస్తున్నావని.

సగం తెరిచి వుంచిన తలుపు

సగం మాత్రమే పంచుకున్న మనసు 

అర్ధోక్తి తో ఆగిపోయిన మాటలు

ఏనాటికైనా పూర్తి అవుతాయనే ఆశను కూకటివేళ్లతో పెకిలించిన ఆ పరువు హత్య

లోకం దర్పణంలో ముక్కలై ఏడుస్తున్న నా ప్రతిబింబాన్ని చూసి జాలిపడుతూ ఎగతాళిగా నవ్వుతూ మీరు

లోపల యుద్ధం జరిగినాక వెలుపల యద్ధం చేయాల్సిన పనిలేదు. 

శాంతి పతాకం యెగరేయడం మినహా

ప్రపంచానికి తెలియని రహస్య దుఃఖాలను మోస్తున్న నేను

నీ  ఆత్మ ను వెదుక్కుంటూ వచ్చాను వస్తూనే వుంటాను నాశనం చేయలేని ప్రేమతో 

నీవు హృదయాన్ని మాత్రమే ఇచ్చావు

నేను జీవితాన్నే విడిచి వచ్చాను. 

ముందు మాట..

" కుల వృక్షం  " కథల సంపుటి ముందు మాట..
 
ఈ అక్షరాలపూలపై వాలిన పాఠక సీతాకోకచిలక మిత్రులకి స్వాగతం.
ఏ కథకా కథ వ్రాసాక నేను వెనుదిరిగి చూసుకుంటాను.  ఓ స్వల సంతోష వీచిక మాటున అనంతమైన అసంతృప్తి. మంచి కథ వ్రాయాలని మళ్ళీ అనుకుంటాను.  ఎందుకో వ్రాసిన  యే కథ నాకు సంతృప్తినివ్వదు. నా కథలన్నీ జీవితంలోనుండి నడిచొచ్చిన కథలు. మూడొంతులు జీవిత సత్యానికి  పావు వంతు కల్పనా శక్తిని జోడించి  యీ కథలని వ్రాసాను .
కథలెలా వ్రాస్తారు అంటే నేను చెప్పలేను. వ్రాసిన తర్వాత ఇది కథగా బాగా కుదిరింది అని వేరొకరు చెప్పేవరకూ,పత్రికల వారు ఆమోదించేవరకూ అదొక సంశయం. వ్రాసే ప్రతి కథని  సరికొత్తగా కథ వ్రాస్తున్నాననుకుని  బెరుకు బెరుకుగా మొదలబెట్టడమే నాపని. కథ ముగిసినాక హమ్మయ్య అని ఊపిరి పీల్చుకుంటాను.
నేను రచయితనై సమాజానికి యేదో సేవ చేస్తున్నానని అనుకోవడంలేదు.  నా రచనలు చదివి సమాజ పురోగవ్రుద్ది సాధిస్తుందనే భ్రమలు నాకు లేవు. నా కాలంలో నా చుట్టూరా ఉన్న ప్రపంచం యెలా వుంది ప్రజల  జీవనం, జీవితాల్లో సంక్లిష్టతని నా దృష్టికోణంతో దర్శించి నా ఆలోచనలనకి అక్షర రూపమిస్తూ  నా కాలాన్ని నమోదు చేసానని అనుకుంటానంతే !
నా మొదటి కథాసంపుటిని చదివిన మిత్రులిచ్చిన ప్రోత్సాహంతో రెండో కథాసంపుటిని మీ ముందుకి తీసుకొచ్చే ప్రయత్నం చేస్తున్నాను. ఈ కథా సంపుటిలో ఇరవై నాలుగు కథలున్నాయి. ఇందులో పదిహేను కథలు వివిధ పత్రికలలో వచ్చినవి. మిగతావి బ్లాగ్ లో ప్రచురించుకున్నవి.  ఒక విధంగా నా స్వయం చోదకశక్తితో కథ వేదికపై  నన్ను నేను నిలబెట్టుకుంటూ ..  నేనుగా  జయప్రదం చేసుకునే  ప్రయత్నమిది. చదివి మీ సద్విమర్శలని ,సలహాలని అందించి నా అక్షరాన్ని పునీతం చేసి  రాబోయే రచనలకి మరింత వన్నెనిస్తారని ఆశిస్తూ ..
వెనుదిరిగి చూసుకుంటూ ముందుకు  నడుస్తున్న నా రచనా ప్రయాణంలో ఆగి కాసేపు మీతో ముచ్చటించే ఈ భాగ్యానికి మురిసిపోతూ .. .
                                                                                   నమస్సులతో ..
                                                                                  వనజ తాతినేని.

   

శంఖం ఊదుతున్నా ..

పొద్దున్నే దినపత్రిక  చూసినా , వార్తా ఛానల్ ని చూసినా , ఎక్కడ విన్నా స్త్రీలపై ,పసిపిల్లలపై అత్యాచార వార్తలు. విని వినీ అది అలవాటుగా అయిపోయింది. ఎంతగా అంటే అదొక సాధారణ విషయంలా . జ్యోతి వలబోజు గారూ  2015. లో మహిళా దినోత్సవం సందర్భంగా ... మాలిక  వెబ్ పత్రిక కోసం అత్యాచారాల పై నిరసన తెలుపుతూ కవిత్వం వ్రాయండి వనజ గారూ  అని అన్నారు . ప్రేమగా చెపుతున్న, కోపంతో చెపుతున్నా శిక్షలు వేస్తున్నా సమాజంలో అత్యాచారాలు  జరగడం ఆగలేదు. చాలా  కోపంగా వున్నానేమో .. ఆవేశంలో కవిత వ్రాసేశాను .  ఆ కవిత చదివిన చాలామంది ఆ తీవ్రతకి ఆశ్చర్యపోయారు. కొంతమంది చదివి వినిపించండి అన్నారు .. రేవతీ రావూరి మీ గొంతుతో వినాలని వుంది అన్నారు. అప్పుడు అంత పట్టించుకోలేదు కానీ ఇప్పుడు కథలని  శబ్దంతో రికార్డ్ చేయాలన్న తలంపులో వున్న నాకు ఈ "పునీత" కవిత  ను  నా గొంతుతో వినిపించాలనిపించింది. అందుకే ..ఈ ప్రయత్నం.

ఒక స్నేహితురాలైతే ..తల్లీ ..నీ గొంతుతో ఈ కవిత వినిపిస్తే చెవుల్లో నుండి రక్తం కారడం తధ్యం అని దీవించింది ..అది మరీ మంచిది అన్నాను. భావతీవ్రత తెలియాలి కదా ! సరే నా ఈ ప్రయత్నం చెవిటి వాడి చెవిలో శంఖం ఊదినట్లుగా కాకుండా కొంచెమైనా ప్రయోజనం వుంటే బాగుండును. అదేనండీ ..విన్నవారు కాస్త ఆలోచించి విచక్షణతో మెలిగితే చాలు. మరి వింటారు కదూ .. 

పునీత ..కవిత .. టెక్స్ట్ లో ఇక్కడ .. 

కవితా పఠనంలో ..

11-05-2013 శనివారం సాయంత్రం 06:00 కి బంజారా హిల్స్ రోడ్ నంబర్ 1 లామ్ కాన్ వేదికగా జరిగిన కవిసంగమం లో నేను ఒక కవిగా పాల్గొన్నప్పుడు చదివి వినిపించిన కవిత్వం . విని యెలా వుందో చెప్పండి ..ప్లీజ్ !

అయిపోయిన పెళ్ళికి .. బాజాలాగా .. 

అయిదేళ్ళ తర్వాత.. ఇలా రూపొంది ..అందరి ముందుకు వచ్చింది . 

కథ చెపుతా ..

కథ చెపుతా .. వూ కొడతారా, వులికి పడతారా ....ఫ్రెండ్స్ ..
ఇదో ప్రయోగం .. బాగుంటే ఇంకా బాగా కృషి చేస్తాను. చదవడం అంటే చాలామందికి ఆసక్తి లేదు. అందుకే ఈ రకమైన బాదుడు :).

ఇదిగో .."మురికి మనసు " ని .. నా గళంతో వినండీ ..