వినబడని పాట

వినబడని పాట

తలపుల నిషేధం విధించినా సరే ఆజ్ఞలు ఉల్లంఘిస్తూ 

వెలుగు లాగానో సవ్వడి లాగానో చీకటి లాగానో లోపలికి జొరబడి పోతావ్  

*********

నేను లోలోపల పాడుతున్న పాటలు కూడా 

పక్షుల వలె సీతాకోకచిలుకలు కు మల్లే ఎగురుతూ నీ వద్దకు చేరుకుంటాయ్. 

*********

నువ్వు నా ప్రపంచాన్ని దోచుకున్నావు. 

విస్తరించుకున్నావు. ఆఖరికి నా ఇంటిని కలల ప్రపంచాన్ని కూల్చేసి పోయావ్ 

*********

విడిపోయి మళ్ళీ కలుసుకునేటప్పుడు లోపాలు నీలో కన్నా నాలోనే ఎక్కువగా  

కనబడతాయ్,  నువ్వు మగవాడివోయ్. 

*********

రాత్రంతా నిన్ను గుర్తుచేసుకుంటూనే వున్నాను.జ్ఞాపకాల చంద్రుడు 

నా హృదయంలో  అమావాస్య చీకట్లు నింపుతూ,

                     - వనజ తాతినేని