అక్షయ అక్షర తూణీరం

అక్షయ అక్షర తూణీరం

మనం..చూస్తున్నవన్నిఒకోసారి నిజమే కావచ్చు..

మనం చూడనివి అన్నిఅబద్ధం కాకపోవచ్చు..

జాతుల వైరంలో .. జ్ఞాతుల దాడిలో..

విరిగిన పాళీల సాక్షిగా..

శ్వేతశకటం ఒకటి స్వైరవిహారం చేసి

నాణానికి రెండోవైపును చూపుతున్న

కలాల కుత్తుకలను.. నులిమివేసింది..

ఆ..రావణ కాష్టంలో నిజాల నిగ్గులో..

లోకమే నివ్వెరపోయింది..

కలలోకూడా.. వెంటాడుతున్న

దృశ్య మాలికలు ఎన్నెన్నో..

విస్ఫోటనాల మధ్య ప్రాణాలు అరచేతపెట్టుకుని

పరుగులు తీసిన అమాయకపు జీవులు..

ఊచ కోతలో నేలకొరిగిన పులుల శౌర్యపరాక్రమాలు ..

రక్షణ పేరిట బంధవిముక్తి పేరిట

బందొలదోడ్డిలాంటి నిర్భంధ  శిబిరాలలో..

జీవచ్చావాలుగా  ..మగ్గుతున్న పౌరులు ..

హింసకి హింసే జవాబుగా..

విరామ చిహ్నాలపై సైతం..

రాజ్య హింస నగ్నీక్రుతై .

కరాళ నృత్యం చేసి ..

పులిని మట్టి కరిపించి..

ఆధిపత్యం సాధించింది..

ఎంతైనా రాజసింహం కదా..!

ఒక జాతిని అణచివేసి జాతి కృతమైన వైరం

సమసిందని సంబరపడుతూ..

రక్తసిక్తమైన నేలను ముద్దాడిన

నృపాలుడు వద్ద గాయాలను

మాపగల మంత్రదండం ఉండేనా..?

శిధిలమైన జీవితాలమీద

నవ నిర్మాణంకి పూజాదికాలు నిర్వహించటం ఏల.!?

 మత్స్య న్యాయం అమలుజరిగే చోట

శాంతి ప్రవచనాలు పలుకనేల.!?

దెయ్యాలు వేదాలు వల్లించినట్లు లేదు..

ముందు వెనుకగా జాతి జాతికొక..

నాయకుడు జనియిస్తాడు.

అతనిని అణచేందుకు

అధినాయకుడు తయారుగా ఉంటాడు..

మన వీక్షనని బట్టి వారి స్థానాలు మారుతుంటాయి.

సమతాభావం లోపించిన సమాజంలో..

మనకి నిత్యం కనిపించే దృశ్యాలు ఇవే..

చరిత్రని తిరగతోడితే

మనకు నేర్పిన అనుభవ పాఠాలు ఇవే..

అభాగ్యుల పాలిట అండ ఉండేందుకు

ఒక నాయకుడు కావాలి..

అన్యాయాలను ప్రశ్నించేందుకు

ఒక గళం కావాలి..

వర్తమానంకై పరుగులు తీసే

ఒక మానవీయ హృదయం కావాలి..

గాలిలో ధూళిలో.. కలసిన అ త్యాగాలు ..

ఆ జాతికి సంకల్ప బలం కావాలి..

బడబానలంని దాచుకున్న

ఆ దేశాన్ని చూసి ప్రపంచమే చైతన్య దీప్తం కావాలి..

ఆ చీకటి నిజాలను వెలుగెత్తి చాటడానికి ..

సహస్రాక్షుడైన పాత్రికేయ ఇంద్రుడు కావాలి.

ఎల్లెడలా...అతని కలం..

అక్షయ అక్షర తూణీరం కావాలి..

విశ్వజన నీరాజనాలు అందుకునే

అతని కలం అండ మనకు కావాలి ..

ది పెన్.. ఆల్వేస్ ..ట్రూత్ ... లసంత  విక్రమ తుంగే

(లసంత  విక్రమా తుంగే  మరణం , తర్వాత ప్రభాకరన్ కాల్చివేత తరువాత స్పందించి వ్రాసిన కవిత)

12|12|12.(కవి సంగమంలో)