18, ఫిబ్రవరి 2013, సోమవారం

సఖికి ఇష్ట సఖులు వీరు


 సఖులందరికి   ఇష్ట సఖులు వీరు.

భారతీయురాలికి అమెరికన్ కరేజ్ అవార్డ్..

ఆసక్తి కలిగింది ..వెను  వెంటనే గూగులమ్మని సాయం అడిగాను.

ఇదిగో.. ఎదురుగా,వివరంగా ఈ సఖిని నిలబెట్టింది. http://en.wikipedia.org/wiki/Mallika_Dutt




అమెరికాలో గృహ హింసకి గురవతున్న దక్షిణ ఆసియా మహిళల కోసం సఖి ని ఏర్పాటు చేసారు . స్తానిక అమెరికన్ తెగల హక్కులకి సంబంధించిన కేసులలో కూడా మల్లికా దత్ వాదించారు. అలాగే డిల్లీ లో ఫోర్డ్ పౌండేషన్ అధికారిగా పని చేసినప్పుడు కూడా దళిత,ఆదివాసీల మహిళా ల హక్కుల కోసం పోరాడారు. 
 వింటుంటేనే చాలా ఉత్తేజంగా ఉంది కదా! 

అలాగే ఇంకొక మహిళా మణి పూస ని చూడండి.




ఈమె పేరు..ఈమని విజయ లక్ష్మి  ఈమె గురించి నేను ఎందుకు ఉదహరించాల్సి వచ్చిందంటే.. ఆమె గురించి చాలా ఆసక్తి కల్గించే విషయాలు చాలా ఉన్నాయి.


.ఈ లింక్స్ అన్నీ ఆమె గురించి తెలిపేవే! సింగల్ విమెన్  ఉంటూనే  కుటుంబ హింస కి వ్యతిరేకంగా ఆమె సాగించిన పోరాటం గొప్పది కదా! ఎందరికో ఆమె సహాయంగా నిలిచారు. ఒక యాక్సిడెంట్ లో మరణించారు.అమెరికన్ ప్రెసిడెంట్ :ఒబామా" చేతుల మీదుగా ఆమె కుమార్తెలిరువురు..ఆమెకి లభించిన పురస్కారాన్ని అందుకున్నారు.


http://www.thehindu.com/news/article2559603.ece


http://www.cleveland.com/open/index.ssf/2011/10/white_house_today_will_honor_s.html


http://nriinternet.com/NRI_Accidents/USA/A_Z/E/Vijaya_Emani/index.htm


http://www.clevelandpeople.com/hof/2011/hof-2011-vijaya-emani.htm


http://sepiamutiny.com/blog/2011/10/21/white-house-recognizes-vijaya-emani/

అలాగే మన హైదరాబాద్ నగరంలో కూడా.. ఒక మహిళా మణి  ఉన్నారు. 

ఆమె మెహజబీన్. మంచి కవయిత్రి.



 మైనారిటీ మహిళలు మరియు పిల్లలు సంబంధించిన సమస్యలపై అవగాహన కార్యక్రమాలు రూపొందించారు. . ఆమె హైదరాబాద్ హైకోర్టులో న్యాయవాదిగా ఉంటూ  మైనారిటీ స్త్రీలకి  ఉచిత న్యాయ సహాయ అందిస్తుంది. దూరదర్శన్, ప్రభుత్వం TV ఛానల్ ద్వారా మహిళలకు చట్టపరమైన అవగాహన మరియు సలహా మరియు కుటుంబ సలహా కార్యక్రమం  "చేతన" నిర్వహించింది. బాల కార్మిక (నిర్మూలన) చట్టాలు సమర్థవంతంగా అమలు చేయడం కోసం  ప్రచారం చేస్తున్నారు.

ఆమె గురించి మరింత వివరంగా ఈ లింక్ లో

http://www.maachittoor.com/nellore/important-person/mahe-jabeen.html

వీరి ముగ్గురి గురించి నేను చెప్పడం కన్నా మీరే స్వయంగా తెలుసుకోవచ్చు అనే ఉద్దేశ్యం తో లింక్స్ ఇచ్చాను.
విసుగ్గా తోస్తే మన్నించండి.

 వీరందరూ స్పూర్తి కరమైన మహిళలు కదా! మరి కొందరు గురించి మరొక పోస్ట్ లో.. 


16, ఫిబ్రవరి 2013, శనివారం

కాల్లీఫ్లవర్ పచ్చడి


వంట చేయడం అంటే నాకు విసుగు. ఇంతకూ ముందు కూడా నేను ఏ వంట గురించి వ్రాసి ఉండను.ఏదో ఒక పోస్ట్ తప్ప. 
మొన్న ఈ మధ్య ..  కాలి పోర్నియా లో ఉన్న మా మరిది గారి అమ్మాయి.."భవ్య" ..చాట్ లో ఇలా అడిగింది.. ఏం చేసావు పెద్దమ్మా..అని రెండు మూడు వంటలు చెప్పాను. మరి నాకూ ..అంది. జాలి వేసింది. ఏమిటో.. ఈ విదేశాల నివాసం.ఈ పిల్లలకి ఏమి చేత కాదు. ఏమి తినలేరు అనుకున్నాను. 
మా భవ్య కి కాల్లీ ఫ్లవర్ పచ్చడి చాలా ఇష్టం. నేను అదే రోజు కాల్లీ ఫ్లవర్ పచ్చడి చేసాను. ఈ రెసిపీ చూసి భవ్య అక్కడ తయారు చేసుకుంటుందని ఓ..చిన్ని ఆశ. 












కాల్లీ ఫ్లవర్  పచ్చడి చాలా మందికి తెలిసే ఉంటుంది. కూర చేసి తినేకన్నాపచ్చి ముక్కలతో పచ్చడి చేస్తే   చాలా బాగుంటుంది

కాల్లీ ఫ్లవర్ పంట (పూల దిగుబడి ) నవంబర్ మాసం నుండి ఉంటుంది. కూరగాయల పంటలలో అన్నింటి కన్నా అత్యధిక రసాయన మందులు పిచికారీ చేసే పంట ఈ కాల్లి ఫ్లవర్. చాలా మందికి ఒక విదమైన పచ్చి వాసన రావడం వల్ల  ఈ పువ్వుల వాడటం ఇష్టం ఉండదు.  నేను అయితే.. ఈ కాల్లీ ఫ్లవర్ చూస్తేనే దూరంగా జరిగి పోతాను. కూర చేయాలంటే కూడా నాకు విముఖత ఎందుకంటే.. ఆ పూల వాసన,  (ఒక విధమైన ఏదుం వాసన) మొక్క నాటినప్పటి నుండి పంట దిగుబడి వరకు కొట్టే పురుగు మందులు,ఇంకా అందులో దాగి ఉండే పురుగులు.. అన్నీ.. అంటే అయిష్టం.


జనవరి తర్వాత అంటే పువ్వు తెల్లగా ఉండటం తగ్గిన తర్వాత ఆ పువ్వులని అసలు వాడనే  కూడదు. మంచు కురిసే సమయాల్లోనే కాల్లీ ఫ్లవర్ బాగుంటుంది ఎండలు ముదిరేటప్పటికి పురుగు ఉదృతి ఎక్కువ కూడా.. రైతు ఎలాగోలా రసాయన మందులు జల్లి పంటని మార్కెటింగ్ చేసుకునే ప్రయత్నం చేస్తారు. ఇదంతా నాకు ఎలా తెలుసు అంటే.. మా పొలాల లొ పండించేవారు నేను అన్నీ స్వయంగా చూసిన దాన్ని కాబట్టి.

ఒక వేళ  కాల్లీ ప్లవర్ ని ఉపయోగించాలంటే.. పూవుని చిన్న చిన్న గుత్తులుగా విడదీసుకుని.. పురుగులు లేకుండా
చూసుకుని బాగా ఎక్కువ నీళ్ళల్లో ఉప్పువేసి ఒక గంట ఆ నీళ్ళ నే ఉండనివ్వాలి.  ఇలా చేయడం వల్ల  పువ్వుల లోపల ఉన్న పురుగులు వెలుపలకి వచ్చేస్తాయి. ఒక గంట తర్వాత మళ్ళీ రెండు మూడు సార్లు ..ఆ పువ్వుల గుత్తులని  కడిగి..ఉంచి పెట్టుకుని.. బాగా మరిగిన నీటిలో ఆ ముక్కలని వేసి వెంటనే నీరు వార్చేసుకోవాలి. అప్పుడు ఆ ముక్కలు అంత పచ్చి వాసన రావు. రసాయన అవశేషాలు మిగిలి ఉండవు కూడా. అప్పుడు ఏ విధంగా కావాలంటే ఆ విధంగా వాడుకోవచ్చు.

కాల్లీ ఫ్లవర్ ని  ఏక రకంగా వండకుండా.. వంకాయ,లేదా చిక్కుడు కాయ లతో కలిపి వేపుడు చేయవచ్చు. లేదా టమోటా తో కలిపి కలగలుపు కూర చేయవచ్చు. కాల్లీ ఫ్లవర్ కూర ఏ విధంగా వండినా ..ఆ కూరకి అల్లం వెల్లులి మిశ్రమం వేస్తేనే తగినంత రుచి.

ఇక ఇప్పుడు పచ్చి ముక్కల కాల్లీ ఫ్లవర్  పచ్చడి సంగతి చూద్దాం.

వేడి నీటిలో వేసి వార్చి తడి ఏ మాత్రం లేకుండా   శుభ్రంగా ఆరపెట్టిన

కాల్లీ ఫ్లవర్ ముక్కలు  సుమారు కొలతలో ఒక శేరు

కారం ఒక కప్పు  75గ్రాములు.

ఉప్పు ఒకటిన్నర కప్పు (కళ్ళు ఉప్పు = క్రిస్టల్ సాల్ట్ )

నిమ్మ పులుసు ఒక కప్పు

వెల్లులి పాయలు ఒక కప్పు ని ముద్దగా చేసి కలపాలి.

వేయించిన మెంతులు పిండి చిటెకెడు

వేరుశెనగ నూనె ఒకటిన్నర కప్పు.

పసుపు కొద్దిగా

అన్నీ కలిపి ఒక రోజు తర్వాత  ఈ పచ్చడిని వాడుకోవచ్చు.  నా  వంట మీద నమ్మకం ఉంటే మీరు ప్రయత్నించండి. :)

ఈ పచ్చడి కి తాళింపు  అవసరం లేదు. ఆవకాయ పచ్చడి లాంటిది ఈ పచ్చడి కూడా. అయితే ఒక వారం కన్నా ఎక్కువ నిలువ ఉండదు. ప్రిజ్ద్ లో పెట్టుకుంటే ఎన్ని రోజులైనా ఉంటుంది.

15, ఫిబ్రవరి 2013, శుక్రవారం

వెలుతురు బాకు

మనసు క్రోధాన రగిలినప్పుడు
వాదాలు భేదాలు ఇజాలు
తీవ్ర రూపం దాల్చినప్పుడు వికృత స్వరూపంతో
తన ఉనికిని చాటే వినాశకం హింస

దేశాల మద్య యుద్ధమా జీహద్ పేరిట చేసే ఉగ్రవాదమా
జాతుల మనుగడకై చేసే అంతర్యుద్ధమా!
కుటిల రాజకీయ తంత్రమా ఆయుధ వ్యాపారమా
ఏదైనా హింసా.. నీ పేరు వినాశకమే

విద్వంస రచనల మధ్యనూ భద్రత ముసుగులోనూ
భయం గుప్పిట్లోనూ ఏ తలుపు చాటునో నక్కి
కిటికిరెక్క మాటునో దాగి
సైనిక కవాతుల కరాళ నృత్యాలని
పిట్టలా రాలిపోతున్న ప్రాణాలనికని
రాబందుల రెక్కల చప్పుళ్ళని విని
నిలువెల్లా కంపిస్తున్నసామాన్యజీవనం
దుఃఖ విభాజనమూ శృంఖలాల విచ్చేదనమూ
తెలియని అయోమయ జనం

ఏ తల్లి రోదనో ఏ తండ్రి వేదనో ఏ చంటి బిడ్డడి దుఖమో
ప్రత్యక్ష ప్రసారాలలో చూసిన ఉన్మత్తవాదులలో
పరివర్తన కలిగేనా
హృదయ విహీనులైన వారి
జ్ఞాన చక్షువులు తెరుచుకునేనా
మానవత్వపు జీవ గంగ ఉద్భవించేనా!?
ఆ రణ రక్కసి దాడికి లక్షలాది
గుండె గాయాలు రగులుతూనే ఉన్నాయి
కవిత గేయాలు ఆలపిస్తునే ఉన్నాయి

రెండు దేశాల మద్యనో రెండు ఇజాల మద్యనో
సరిహద్దుల వెంబడి మానవత్వపు నది
మెలికెలు తిరుగుతూ ప్రవహిస్తూనే ఉంది
దానిని మళ్ళించి మన హృదయసీమల్లో
శాంతిని పండించే విత్తనాలు నాటాలి
హృదయాలని తట్టి లేపే పని మొదలెట్టాలి

ఉగ్రవాదం ఉసురు తీసేలా తిట్టిపోయడం కాదు
ఉనికిని మాపేందుకు ప్రతి గుండెలోతుల్లోకి
ప్రేమ మధువులొలికించి
అనురాగ పాశాన్ని నాటుదాం
శాంతి చినుకులలో తడిచే క్షణంకై
చకోర పక్షులై ఎదురు చూద్దాం
మతమవసరంలేని
మానవాలయాలని నిర్మింప జేసుకుందాం
మనిషి మనమున మసిలే
మానసిక చీకట్లను రూపుమాపడానికి
రహస్య ఖార్ఖానాలో తయారు చేసుకున్న
వెలుతురుబాకులతో దండయాత్ర చేద్దాం.

(2006 ముంబై ప్రేలుళ్ళ నేపధ్యంలో వ్రాసిన కవిత )