మట్టి బాట మాయాజాలం

 

మట్టి బాట  మాయాజాలం   - వనజ తాతినేని. 

ఆ మట్టి బాటను చూస్తే చాలు.. 

నా హృదయం నడక తీరు మార్చుకుని 

ముని వ్రేళ్ళ పై నెమలి నాట్యం చేస్తుంది. 

మంచు తెరలపై లేత నారింజ రంగు కాంతి ధారని 

చూస్తే చాలు..ఏ దివ్యత్వమో నన్ను స్పృశించి 

పునీతం చేయబోతోందని సృహ కల్గుతుంది. 

ఆ జనప పూల పంట పశువులకు రుచికరమైన 

భోజనం కాకమునుపే.. 

నా సౌందర్య దాహానికి  దప్పికై నిలువెల్లా తడిపింది 

ఆ జొన్న కంకులపై  పిచ్చి ఆనందంతో గెంతులాడే 

చిన్ని పక్షుల కిచకిచలు వింటూ 

నా పెదవులపై భూపాల రాగం మొలిచింది. 

బాట పక్కన గడ్డి పూవు కూడా తల ఊపుతూ..  

అన్యాపదేశంగా ఏదో సందేశాన్ని అందించింది. 

ఈ ఉదయం మట్టి బాటల మాయాజాలం 

నన్ను పూర్తిగా కమ్మేసింది.కొంత సమయం ఆత్మతో

 కలిసి జీవించడమనే అనుభూతిని మిగిల్చింది. 

(ప్రతి రోజూ బైట్ ల కొద్దీ సందేశాలు చదివే వినే..   

నాకు ప్రకృతి సందేశం హాయినిచ్చిన అనుభవం తో) 

12 April 2026. 08:00am